ന്യൂയോർക്ക്: ഖത്തറിന്റെ മധ്യസ്ഥതയിൽ ഇറാനും അമേരിക്കയും തമ്മിലുള്ള സമാധാന ചർച്ചകൾ പുരോഗമിക്കുന്നതിനിടെ ഇറാനെതിരെ വീണ്ടും സൈനിക നടപടി സ്വീകരിക്കുമെന്ന മുന്നറിയിപ്പുമായി യുഎസ് പ്രസിഡന്റ് ഡോണൾഡ് ട്രംപ്. നയതന്ത്ര ചർച്ചകൾ തുടരുമ്പോഴും സൈനിക നടപടിയുടെ സാധ്യത തള്ളിക്കളയാത്ത ട്രംപിന്റെ നിലപാട് പശ്ചിമേഷ്യയിൽ വീണ്ടും സംഘർഷഭീതി ശക്തമാക്കിയിരിക്കുകയാണ്.
ഇതിനിടെ, ഇറാനിലെ ഖേശ്ം (Qeshm) ദ്വീപിൽ അമേരിക്ക നടത്തിയ പരിമിതമായ സൈനിക ആക്രമണവും ആശങ്ക വർധിപ്പിച്ചു. അമേരിക്കൻ സൈനിക കേന്ദ്രങ്ങൾക്ക് ഭീഷണിയായ വ്യോമപ്രതിരോധ സംവിധാനങ്ങളെയാണ് ആക്രമണത്തിൽ ലക്ഷ്യമിട്ടതെന്നാണ് യുഎസ് വൃത്തങ്ങൾ വ്യക്തമാക്കിയത്. ആക്രമണം വ്യാപകമായ സൈനിക നീക്കത്തിന്റെ തുടക്കമല്ലെന്നാണ് അമേരിക്കൻ ഉദ്യോഗസ്ഥരുടെ വിശദീകരണം.
അതേസമയം, ഇറാൻ-അമേരിക്ക ചർച്ചകളിൽ പ്രതീക്ഷയുണ്ടെന്ന് ഖത്തർ വ്യക്തമാക്കി. ഇരുരാജ്യങ്ങളും മധ്യസ്ഥർ മുന്നോട്ടുവെച്ച നിർദേശങ്ങൾ പരിശോധിച്ചുവരികയാണെന്നും സംഘർഷം ഒഴിവാക്കാൻ നയതന്ത്ര ശ്രമങ്ങൾ ശക്തമായി തുടരുകയാണെന്നും ഖത്തർ വിദേശകാര്യ മന്ത്രാലയ വക്താവ് അറിയിച്ചു.
എന്നാൽ, ഇറാന്റെ ആവശ്യങ്ങളോടുള്ള അമേരിക്കയുടെ പ്രതികരണം തൃപ്തികരമല്ലെന്നാണ് ഇറാന്റെ നിലപാട്. ഉപരോധങ്ങൾ നീക്കുക, നാവിക ഉപരോധം അവസാനിപ്പിക്കുക തുടങ്ങിയ ആവശ്യങ്ങളിൽ ഉറച്ചുനിൽക്കുന്ന ഇറാൻ, അമേരിക്കയുടെ ഭാഗത്തുനിന്ന് പുതിയ ആക്രമണമുണ്ടായാൽ ശക്തമായ തിരിച്ചടി നൽകുമെന്നും മുന്നറിയിപ്പ് നൽകിയിട്ടുണ്ട്.
യുദ്ധത്തിലൂടെ പ്രശ്നങ്ങൾക്ക് പരിഹാരം കാണാനാകില്ലെന്നാണ് ഇറാൻ പ്രസിഡന്റ് മസൂദ് പെസഷ്കിയാന്റെ നിലപാട്. നയതന്ത്ര ചർച്ചകളിലൂടെ പ്രശ്നങ്ങൾ പരിഹരിക്കണമെന്നാണ് ഇറാൻ ആവർത്തിക്കുന്നത്.
അമേരിക്കൻ ഇടക്കാല തിരഞ്ഞെടുപ്പിന് പിന്നാലെ ഇറാനെതിരായ സൈനിക നീക്കങ്ങൾ പുനരാരംഭിക്കുമോ എന്ന ആശങ്കയും മേഖലയിലുണ്ട്. ചർച്ചകളിൽ പുരോഗതിയുണ്ടാകുമെന്ന പ്രതീക്ഷ നിലനിൽക്കുമ്പോഴും ഇരുരാജ്യങ്ങളും തമ്മിലുള്ള അഭിപ്രായവ്യത്യാസങ്ങൾ പരിഹരിക്കപ്പെടാത്തത് പശ്ചിമേഷ്യയിലെ സമാധാനശ്രമങ്ങൾക്ക് വെല്ലുവിളിയാകുകയാണ്.
