വാഷിങ്ടൺ: യുഎസ് ഇടക്കാല തിരഞ്ഞെടുപ്പിൽ റിപ്പബ്ലിക്കൻ സ്ഥാനാർഥികൾക്കായി ശതകോടീശ്വരനും ടെസ്‌ല, സ്പേസ് എക്സ് മേധാവിയുമായ ഇലോൺ മസ്ക് ചെലവഴിച്ചത് 474 ദശലക്ഷം ഡോളറിലധികം (ഏകദേശം 4,700 കോടി രൂപ). റിപ്പബ്ലിക്കൻ പാർട്ടിയുടെ തിരഞ്ഞെടുപ്പ് പ്രചാരണങ്ങൾക്കും സ്ഥാനാർഥികളുടെ വിജയത്തിനുമായി വൻതുക ചെലവഴിച്ചിട്ടും പാർട്ടിക്ക് കനത്ത തിരിച്ചടി നേരിടേണ്ടിവന്നു. കോൺഗ്രസിന്റെ ഇരുസഭകളിലും ഡെമോക്രാറ്റുകൾ മുന്നേറ്റം നേടിയതോടെ മസ്കിന്റെ രാഷ്ട്രീയ ഇടപെടലുകളും ചർച്ചയാകുകയാണ്.
മസ്കിന്റെ പ്രധാന ബിസിനസ് കേന്ദ്രങ്ങളിലൊന്നായ ടെക്സസിൽ റിപ്പബ്ലിക്കൻ പാർട്ടിയുടെ സ്വാധീനം നിലനിർത്തുക എന്നതും സാമ്പത്തിക പിന്തുണയ്ക്ക് പിന്നിലെ ലക്ഷ്യങ്ങളിലൊന്നായിരുന്നു. 2024ലെ യുഎസ് പ്രസിഡന്റ് തിരഞ്ഞെടുപ്പിൽ ഡോണൾഡ് ട്രംപിനെ വിജയിപ്പിക്കാൻ കാൽ ബില്യൺ ഡോളറിലധികം ചെലവഴിച്ച മസ്ക് ഇത്തവണയും റിപ്പബ്ലിക്കൻ സ്ഥാനാർഥികൾക്കായി സജീവമായി രംഗത്തിറങ്ങിയിരുന്നു.
തിരഞ്ഞെടുപ്പ് പ്രചാരണത്തിന്റെ അവസാന ഘട്ടത്തിൽ റിപ്പബ്ലിക്കൻ സ്ഥാനാർഥികൾക്ക് വോട്ട് ചെയ്യണമെന്ന് മസ്ക് അനുയായികളോട് അഭ്യർഥിച്ചിരുന്നു. എന്നാൽ ഫലം പുറത്തുവന്നപ്പോൾ ഡെമോക്രാറ്റുകൾ കോൺഗ്രസിന്റെ ഇരുസഭകളുടെയും നിയന്ത്രണം തിരിച്ചുപിടിച്ചു. ടെക്സസിൽ മൂന്ന് പതിറ്റാണ്ടിലേറെക്കാലത്തിന് ശേഷം ആദ്യമായാണ് ഒരു ഡെമോക്രാറ്റിക് ഗവർണർ തിരഞ്ഞെടുക്കപ്പെട്ടത്.
മസ്കിന്റെ ബിസിനസ് സാമ്രാജ്യത്തിനെതിരെ അന്വേഷണം?
ഡെമോക്രാറ്റുകൾ അധികാരസ്ഥാനങ്ങളിൽ സ്വാധീനം വർധിപ്പിച്ചാൽ തന്റെ ബിസിനസ് സ്ഥാപനങ്ങൾക്കെതിരെ അന്വേഷണങ്ങൾ ശക്തമാകുമെന്ന റിപ്പോർട്ടുകളോടും മസ്ക് പ്രതികരിച്ചു. എക്സിലെ കുറിപ്പിൽ, തനിക്കെതിരെ നീങ്ങുന്നവരെ കണ്ടെത്തി അവർക്കെതിരെ നടപടിയെടുക്കുമെന്ന മുന്നറിയിപ്പാണ് അദ്ദേഹം നൽകിയത്. ‘വാളെടുക്കുന്നവൻ വാളാൽ’ എന്ന പരാമർശത്തോടെയായിരുന്നു പ്രതികരണം.
ടെസ്‌ല, സ്പേസ് എക്സ് ഓഹരികൾക്ക് ഇടിവ്
തിരഞ്ഞെടുപ്പ് ഫലത്തിന് പിന്നാലെ പ്രീമാർക്കറ്റ് വ്യാപാരത്തിൽ ടെസ്‌ലയുടെ ഓഹരികൾ 3.6 ശതമാനവും സ്പേസ് എക്സുമായി ബന്ധപ്പെട്ട ഓഹരികൾ 3.8 ശതമാനവും ഇടിഞ്ഞു.
ഡാറ്റാ സെന്ററുകൾക്കുള്ള അനുമതികൾ വൈകുന്നത് മസ്കിന്റെ ബിസിനസ് പദ്ധതികൾക്ക് വെല്ലുവിളിയാകുമെന്നാണ് വിലയിരുത്തൽ. സ്പേസ് എക്സിന്റെ ഭാവി വളർച്ചയ്ക്കും ഐപിഒയ്ക്ക് മുന്നോടിയായുള്ള നിക്ഷേപക താൽപര്യത്തിനും ഇത്തരം തടസ്സങ്ങൾ പ്രതിസന്ധിയാകാം.
മറ്റ് ശതകോടീശ്വരന്മാരും കോടികൾ ചെലവിട്ടു
മസ്കിനെ കൂടാതെ അമേരിക്കയിലെ പ്രമുഖ വ്യവസായികളും തിരഞ്ഞെടുപ്പ് പ്രചാരണത്തിനായി വൻതുക ചെലവഴിച്ചിട്ടുണ്ട്. ഡെമോക്രാറ്റിക് പാർട്ടിയുടെ പ്രചാരണങ്ങൾക്കായി മൈക്കിൾ ബ്ലൂംബെർഗ് 84.2 മില്യൺ ഡോളറാണ് നൽകിയത്.
റിപ്പബ്ലിക്കൻ പാർട്ടിക്കായി ഹെഡ്ജ് ഫണ്ട് മാനേജർ പോൾ സിംഗർ 53.5 മില്യൺ ഡോളറും സംരംഭകനായ ഗ്രെഗ് ബ്രോക്ക്മാനും അന്ന ബ്രോക്ക്മാനും ചേർന്ന് 50 മില്യൺ ഡോളറും സംഭാവന ചെയ്തു.
വൻകിട വ്യവസായികളുടെ സാമ്പത്തിക പിന്തുണയും രാഷ്ട്രീയ ഇടപെടലുകളും അമേരിക്കൻ തെരഞ്ഞെടുപ്പ് രാഷ്ട്രീയത്തിൽ നിർണായക ചർച്ചയായി മാറുന്നതിനിടെയാണ് ഇത്തവണത്തെ ഫലം പുറത്തുവന്നിരിക്കുന്നത്.
