തിരുവനന്തപുരം: എൽപിഎസ്ടി നിയമനവുമായി ബന്ധപ്പെട്ട ഉദ്യോഗാർഥികളുടെ സമരത്തിന് നേതൃത്വം നൽകുന്ന വളർമതിയെ ആരോഗ്യനില മോശമായതിനെ തുടർന്ന് വീണ്ടും ആശുപത്രിയിൽ പ്രവേശിപ്പിച്ചു. നിലവിൽ ഐസിയുവിൽ ചികിത്സയിലാണ്. പ്രതിഷേധക്കാരാണ് വളർമതിയെ ആശുപത്രിയിലെത്തിച്ചത്.
വളർമതിയുടെ നിരാഹാര സമരം 18 ദിവസം പിന്നിട്ടിരിക്കുകയാണ്. ആരോഗ്യനില വഷളായിട്ടും സമരത്തിൽ നിന്ന് പിന്മാറാൻ ഉദ്യോഗാർഥികൾ തയ്യാറായിട്ടില്ല. സമരം കൂടുതൽ ശക്തമാക്കാനാണ് സമരസമിതിയുടെ തീരുമാനം.
കഴിഞ്ഞ ബുധനാഴ്ച സമരപ്പന്തൽ പൊളിച്ച് പൊലീസ് ബലംപ്രയോഗിച്ച് വളർമതിയെ ആശുപത്രിയിലേക്ക് മാറ്റിയിരുന്നു. എന്നാൽ ആശുപത്രിയിൽ വെച്ചും നിരാഹാര സമരം തുടർന്ന വളർമതി നിർബന്ധിത ഡിസ്ചാർജ് വാങ്ങി സമരപ്പന്തലിലേക്ക് മടങ്ങിയെത്തുകയായിരുന്നു.
അതിനിടെ, വിവിധ പ്രതിപക്ഷ യുവജന സംഘടനകളും രാഷ്ട്രീയ നേതാക്കളും ഉദ്യോഗാർഥികളുടെ സമരത്തിന് പിന്തുണ പ്രഖ്യാപിച്ച് രംഗത്തെത്തിയിട്ടുണ്ട്. സമരം ശക്തമാകുന്നതിനിടെ വളർമതിയുടെ ആരോഗ്യനില ആശങ്കയുയർത്തുകയാണ്.
