ലോക അഞ്ചാം നമ്പർ താരത്തെ തോൽപിച്ച് മലയാളി താരം പ്രണോയ് സ്വിസ് ഓപ്പൺ ഫൈനലിൽ ; പി.വി . സിന്ധുവും ഫൈനലിൽ

ബേണ്‍: സ്വിസ് ഓപ്പണ്‍ ഫൈനലില്‍ മലയാളി താരം എച്ച്‌എസ് പ്രണോയ് ഫൈനലില്‍. പി.വി. സിന്ധുവും ഫൈനലില്‍ പ്രവേശിച്ചു.

ലോക ഏഴാം നമ്പര്‍ താരവും സ്വിസ് ഓപ്പണില്‍ രണ്ടാം സീഡുമായ പി.വി. സിന്ധു തായ്‌ലാന്റിലെ സുപാനിഡയെ 79 മിനിറ്റ് നീണ്ട പോരാട്ടത്തില്‍ കീഴടക്കി (സ്‌കോര്‍: 21-18,12-21, 21-19). തുടര്‍ച്ചയായി രണ്ടാം തവണയാണ് സിന്ധു സ്വിസ് ഓപ്പണ്‍ ഫൈനലില്‍ കടക്കുന്നത്. തായ് താരം നാലാം സീഡുകാരി ബുസാനനെ സിന്ധു ഞായറാഴ്ച ഫൈനലില്‍ നേരിടും.

ഇന്തോനേഷ്യയുടെ ലോക അഞ്ചാം നമ്പര്‍ താരം ആന്‍റണി ഗിന്‍ടിങ്ങിനെ തോല്‍പ്പിച്ചാണ് പ്രണോയ് ഫൈനലിലേക്ക് കടന്നത്. ഒരു മണിക്കൂര്‍ 11 മിനിറ്റ് നീണ്ട പോരാട്ടത്തില്‍ 21-19,19-21,21-18 എന്ന സ്‌കോറിലാണ് പ്രണോയ് വിജയിച്ചത്.2017 ല്‍ യുഎസ് ഓപ്പണ്‍ വിജയിച്ച ശേഷം പ്രണോയിയുടെ ആദ്യ ഫൈനലാണിത്.പുരുഷ സിംഗിള്‍സില്‍ ഇന്ത്യന്‍ താരങ്ങളുടെ ക്വാര്‍ട്ടര്‍ പോരാട്ടത്തില്‍ പി കശ്യപിനെ നേരിട്ടുള്ള ഗെയിമുകളില്‍ തോല്‍പ്പിച്ചാണ് പ്രണോയ് സെമിയിലെത്തിയത്. മറ്റൊരു സെമിയില്‍ ഇന്ത്യന്‍ താരം കിഡംബി ശ്രീകാന്തും ഇന്തോനേഷ്യക്കാരന്‍ ജോനാഥന്‍ ക്രിസ്റ്റിയും തമ്മിലുള്ള മത്സരത്തിലെ വിജയിയെ പ്രണോയ് ഫൈനലില്‍ നേരിടും.