ലണ്ടൻ : സൈനിക ജോലി ഉപേക്ഷിച്ച് ലൈംഗികത്തൊഴിലാളിയായി യുവതി. റോയൽ എയർ ഫോഴ്സിലെ (അർഎഎഫ്) ഉദ്യോഗസ്ഥയായിരുന്ന ഗ്രേസ് പാർക്കർ ആണ് പുതിയ ജീവിതം തെരഞ്ഞെടുത്തത്. ഇറാഖിലും അഫ്ഗാനിസ്ഥാനിലും നടന്ന സൈനിക നീക്കത്തിൽ അംഗമായി പ്രവർത്തിച്ച ഗ്രേസ് വിഷാദരോഗത്തിന് അടിമപ്പെട്ടതോടെയാണ് ജോലി ഉപേക്ഷിച്ചതെന്ന് ‘ദി സൺ’ റിപ്പോർട്ട് ചെയ്തു.
യുദ്ധമടക്കമുള്ള സാഹചര്യങ്ങളിലൂടെ കടന്ന് പോയതോടെ കടുത്ത വിഷാദമാണ് തനിക്ക് നേരിടേണ്ടി വന്നതെന്ന് 35കാരിയായ ഗ്രേസ് പറഞ്ഞു. മാനസിക സമ്മർദ്ദവും വിഷാദവും ശക്തമായതോടെ 2019ൽ ജോലി ഉപേക്ഷിക്കുകയായിരുന്നു. റോയൽ എഞ്ചിനീയർമാരിൽ അധികം സ്ത്രീകളില്ല. സൈനിക ജീവിതത്തിൽ വളരെയധികം നേട്ടങ്ങൾ കൈവരിക്കാൻ സാധിച്ചെങ്കിലും വിഷാദം ശക്തമായതോടെ നേട്ടങ്ങൾ ഒന്നുമല്ലെന്ന തോന്നൽ ഗുരുതരമായെന്ന് യുവതി പറയുന്നു.
മാനസിക സമ്മർദ്ദത്തിനും വിഷാദത്തിനും അടിമപ്പെടുന്നവരെ സഹായിക്കുന്ന നടപടികൾ അധികൃതരുടെ ഭാഗത്ത് നിന്നുമുണ്ടാകുന്നില്ലെന്ന് ഗ്രേസ് ആരോപിച്ചു. “ഇക്കാര്യത്തിൽ എനിക്ക് ആരോടും പരാതിയില്ല, അതിനാൽ കുറ്റപ്പെടുത്താനുമില്ല. ഒരു വർഷത്തോളം ചികിത്സ തേടിയിരുന്നു. ആ ഘട്ടത്തിൽ സൈനികർക്ക് മെച്ചപ്പെട്ട സാഹചര്യം ഉണ്ടായിരിക്കണം. സൈനിക ജീവിതം തെരഞ്ഞെടുക്കാനുള്ള മോശം തീരുമാനമാണ് എനിക്ക് തിരിച്ചടിയായത്. വിഷാദത്തിന് അടിമപ്പെട്ട അവസ്ഥയിൽ കഴിയുമ്പോഴാണ് സർവീസിൽ നിന്നും പുറത്തേക്ക് പോയത്” — എന്ന് ഗ്രേസ് പറഞ്ഞു.
അച്ഛനും മൂന്ന് സഹോദരന്മാരും സൈന്യത്തിലായിരുന്നതിനാൽ അതേ പാതയിലൂടെ സഞ്ചരിക്കാൻ താനും തീരുമനിക്കുകയായിരുന്നുവെന്ന് ഗ്രേസ് പറഞ്ഞു. തെരഞ്ഞെടുക്കപ്പെട്ട ശേഷം 14 വർഷം സൈന്യത്തിൽ പ്രവർത്തിച്ചുവെന്ന് ഗ്രേസ് വ്യക്തമാക്കി. ഇറാഖിലെ മികച്ച പ്രവർത്തനത്തിൽ അംഗീകാരവും അഭിനന്ദനവും ഗ്രേസിന് ലഭിച്ചു.
സൈനിക ജീവിതം അവസാനിപ്പിച്ചതിന് പിന്നാലെ കടുത്ത സാമ്പത്തിക പ്രതിസന്ധി നേരിടേണ്ടി വന്നതായി ഗ്രേസ് പറഞ്ഞു. അഫ്ഗാനിസ്ഥാനിലും ഇറാഖിലും യുദ്ധ സാഹചര്യങ്ങൾ നേരിട്ട് കാണേണ്ടിവന്നതോടെ നിരാശയും വിഷാദവും മാനസികമായി ബാധിക്കുകയും ചെയ്തു. 2019ൽ ജോലിയിൽ നിന്ന് പുറത്തുവന്ന ശേഷം മറ്റു ചില ജോലികൾ ചെയ്തു. കൊവിഡ് വ്യാപനം ഉണ്ടായതോടെ സാമ്പത്തിക പ്രശ്നം ശക്തമായി. ഒരു ഡേറ്റിംഗ് സൈറ്റിൽ സമയം ചെലവഴിക്കുന്നതിനിടെ ഒരാൾ ലൈംഗികത്തൊഴിലാളിയാകാൻ താൽപ്പര്യമുണ്ടോ എന്ന് ചോദിച്ചു. പണമില്ലാതെ സാമ്പത്തിക ബുദ്ധിമുട്ട് അനുഭവിക്കുന്ന സാഹചര്യത്തിൽ ആയിരുന്നതിനാൽ അദ്ദേഹത്തിൻ്റെ ചോദ്യത്തോട് അനുകൂല നിലപാട് സ്വീകരിക്കുകയായിരുന്നുവെന്ന് ഗ്രേസ് പറഞ്ഞു. മണിക്കൂറിന് 120 പൗണ്ട് ആണ് ഗ്രേസ് ആവശ്യക്കാരിൽ നിന്നും ഈടാക്കുന്നത്.