ഓട്ടവ : ഇന്റർനാഷണൽ എക്സ്പീരിയൻസ് കാനഡ പ്രോഗ്രാം 2024-യുടെ എല്ലാ വിഭാഗങ്ങളിലേക്കുമുള്ള അപേക്ഷകൾ ഡിസംബർ 11 മുതൽ സ്വീകരിച്ച് തുടങ്ങിയതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. വർക്കിംഗ് ഹോളിഡേ വീസ, യംഗ് പ്രൊഫഷണലുകൾ, ഇന്റർനാഷണൽ കോ-ഓപ്പ് (ഇന്റേൺഷിപ്പ്) എന്നീ വിഭാഗങ്ങൾ ഉൾപ്പെടുന്നതാണ് ഇന്റർനാഷണൽ എക്സ്പീരിയൻസ് കാനഡ പ്രോഗ്രാം.
വർക്കിംഗ് ഹോളിഡേ വീസകൾക്കായുള്ള IEC കാൻഡിഡേറ്റ് പൂളിൽ യോഗ്യതയുള്ള 36 രാജ്യങ്ങളിൽ നിന്നുമുള്ള അപേക്ഷകർക്ക് ഇപ്പോൾ അപേക്ഷകൾ സമർപ്പിക്കാം. ആദ്യ റൗണ്ട് ഇൻവിറ്റേഷൻ 2024 ജനുവരി 8-ന്റെ ആഴ്‌ചയിൽ പ്രഖ്യാപിക്കും. അതിനാൽ ഉദ്യോഗാർത്ഥികൾക്ക് അപേക്ഷകൾ സമർപ്പിക്കാനും IEC 2024-ന്റെ ആദ്യ നറുക്കെടുപ്പിൽ പങ്കെടുക്കാനും ഏകദേശം 4 ആഴ്‌ച സമയമുണ്ട്. ഈ വർഷം, രണ്ട് പുതിയ രാജ്യങ്ങൾ കൂടി ഇന്റർനാഷണൽ എക്സ്പീരിയൻസ് കാനഡ പ്രോഗ്രാമിൽ ഉൾപ്പെടുത്തിയിട്ടുണ്ട്. ഫിൻ‌ലാൻ‌ഡ്, ഐസ്‌ലൻഡ് എന്നീ രാജ്യങ്ങളാണ് പുതിയായി ഐഇസി പ്രോഗ്രാമിൽ പങ്കെടുക്കുന്നത്.
കൂടാത്ത ഐഇസി ആപ്ലിക്കേഷനുകൾ വേഗത്തിൽ പ്രോസസ്സ് ചെയ്യുന്നതിന് ഓട്ടോമേഷൻ ടൂളുകൾ ഈ വർഷം മുതൽ ഉപയോഗിച്ച് തുടങ്ങുമെന്നും ഐആർ‌സി‌സി വ്യക്തമാക്കി.
2023-ൽ, IEC വർക്കിംഗ് ഹോളിഡേ വിസ ഓപ്പൺ വർക്ക് പെർമിറ്റിന് അപേക്ഷിക്കാൻ 116,030 ഇൻവിറ്റേഷൻ അയച്ചു. മുൻ വർഷങ്ങളെ അപേക്ഷിച്ച്, IEC അപേക്ഷകർ IEC ഫീസായി 172 കനേഡിയൻ ഡോളർ നൽകണം.
എല്ലാ ആഴ്‌ചയും കനേഡിയൻ വർക്ക് പെർമിറ്റിന് അപേക്ഷിക്കാൻ IEC പൂളുകളിൽ നിന്നുള്ള യോഗ്യതയുള്ള അപേക്ഷകർക്ക് കാനഡ ഇൻവിറ്റേഷൻ നൽകുന്നു.
ഐഇസി സീസൺ അവസാനിക്കുന്നതുവരെ അല്ലെങ്കിൽ എല്ലാ സ്ലോട്ടുകളും എടുക്കുന്നത് വരെ കാനഡയിൽ ഐഇസി സീസണിനായുള്ള നറുക്കെടുപ്പ് നടക്കും. IEC 2023 സീസൺ ഒക്ടോബർ 13-ന് അവസാനിച്ചു. 2023 IEC സീസണിൽ 90,000 ക്വാട്ട ഉണ്ടായിരുന്നു, ഈ വർഷത്തെ ക്വാട്ടയും ഈ സംഖ്യയിൽ ആയിരിക്കുമെന്ന് പ്രതീക്ഷിക്കുന്നു.
ഇന്റർനാഷണൽ എക്സ്പീരിയൻസ് കാനഡ
ഇന്റർനാഷണൽ എക്സ്പീരിയൻസ് കാനഡ (ഐഇസി) പ്രോഗ്രാം കനേഡിയൻ ഗവൺമെന്റ് സംരംഭമാണ്. ഇത് വഴി ചില രാജ്യങ്ങളിൽ നിന്നുള്ള യുവാക്കൾക്ക് ഒരു നിശ്ചിത സമയത്തേക്ക് കാനഡയിൽ ജോലി ചെയ്യാനും യാത്ര ചെയ്യാനും അനുവദിക്കുന്നു. 18-35 വയസ് പ്രായമുള്ള വ്യക്തികൾക്ക് അന്താരാഷ്ട്ര തൊഴിൽ പരിചയം നേടാനും കനേഡിയൻ സംസ്കാരത്തെക്കുറിച്ച് കൂടുതൽ മനസിലാക്കാനും കനേഡിയൻ സമ്പദ്‌വ്യവസ്ഥയിലേക്ക് സംഭാവന നൽകാനും അവസരമൊരുക്കുന്നു. വർക്കിംഗ് ഹോളിഡേ വീസ, യംഗ് പ്രൊഫഷണലുകൾ, ഇന്റർനാഷണൽ കോ-ഓപ്പ് (ഇന്റേൺഷിപ്പ്) എന്നീ വിഭാഗങ്ങൾ ഉൾപ്പെടുന്നതാണ് ഇന്റർനാഷണൽ എക്സ്പീരിയൻസ് കാനഡ പ്രോഗ്രാം.
വർക്കിംഗ് ഹോളിഡേ വീസ
യോഗ്യതയുള്ള ഒരു രാജ്യത്ത് നിന്നുള്ള വ്യക്തിക്ക് IEC വർക്കിംഗ് ഹോളിഡേ വിഭാഗം വഴി ഒരു ഓപ്പൺ വർക്ക് പെർമിറ്റ് നേടാനാകും. ഇതിലൂടെ ഈ വ്യക്തികൾക്ക് കാനഡയിലെ തൊഴിലുടമയ്‌ക്കായി ജോലി ചെയ്യാൻ അനുവാദം ലഭിക്കും.
യംഗ് പ്രൊഫഷണലുകൾ
തൊഴിലുടമ നിർദ്ദിഷ്ട വർക്ക് പെർമിറ്റുകൾ യംഗ് പ്രൊഫഷണലുകൾ വിഭാഗത്തിൽ പെടുന്ന വ്യക്തികൾക്ക് നൽകുന്നതാണ്. ഇതിനായി കാനഡയിലെ ഒരു തൊഴിലുടമയിൽ നിന്ന് നിങ്ങൾക്ക് ഒരു ജോലി വാഗ്‌ദാനം ലഭിക്കണം. ഉദ്യോഗാർത്ഥി കാനഡയിലായിരിക്കുമ്പോൾ ഒരേ സ്ഥലത്ത് ഒരേ കമ്പനിയിൽ മാത്രമേ നിങ്ങൾക്ക് ജോലി ചെയ്യാൻ കഴിയൂ.
ഇന്റർനാഷണൽ കോ-ഓപ്പ് (ഇന്റേൺഷിപ്പ്)
ഇന്റർനാഷണൽ കോ-ഓപ്പ് (ഇന്റേൺഷിപ്പ്) വിഭാഗത്തിന് കീഴിൽ, യോഗ്യതയുള്ള രാജ്യങ്ങളിൽ നിന്നുള്ള പോസ്റ്റ്-സെക്കൻഡറി വിദ്യാർത്ഥികൾക്ക് കാനഡയിൽ അവരുടെ ഇന്റേൺഷിപ്പ് ചെയ്യാൻ തൊഴിലുടമ-നിർദ്ദിഷ്ട വർക്ക് പെർമിറ്റ് അനുവദിച്ചിരിക്കുന്നു. ഇന്റേൺഷിപ്പ് നിങ്ങളുടെ വിദ്യാഭ്യാസ പരിപാടിയുടെ ഭാഗമായിരിക്കണം. ഇൻവിറ്റേഷൻ ലഭിക്കുന്ന വ്യക്തികൾക്ക് കാനഡയിൽ എല്ലാ സമയത്തും ഒരേ കമ്പനിയിലും ഒരേ സ്ഥലത്തും ജോലി ചെയ്യാൻ അനുവാദമുണ്ട്
പുതിയ IEC 2024 സീസൺ മാറ്റങ്ങൾ
ഉഭയകക്ഷി കരാർ പ്രകാരം, 18 നും 35 നും ഇടയിൽ പ്രായമുള്ള ബ്രിട്ടീഷുകാർക്ക് ആകെ 36 മാസത്തേക്ക് രണ്ടുതവണ ഇന്റർനാഷണൽ എക്സ്പീരിയൻസ് കാനഡ പ്രോഗ്രാമിൽ പങ്കെടുക്കാൻ അനുമതിയുണ്ട്. 18 നും 35 നും ഇടയിൽ പ്രായമുള്ള കൊറിയയിൽ നിന്നുള്ള യുവാക്കൾക്ക് യംഗ് പ്രൊഫഷണലുകൾ, ഇന്റർനാഷണൽ കോ-ഓപ്പ് (ഇന്റേൺഷിപ്പ്) വിഭാഗങ്ങളിൽ അപേക്ഷിക്കാൻ ഇപ്പോൾ അനുമതിയുണ്ട്. കൂടാതെ 18 നും 35 നും ഇടയിൽ പ്രായമുള്ള ചിലിയിൽ നിന്നുള്ള അപേക്ഷകർ ഇന്റർനാഷണൽ കോ-ഓപ്പിനായി അപേക്ഷിക്കുന്ന സമയത്ത് ചിലിയിലെ സ്കൂളിൽ ചേർന്നിരിക്കണം.
