ടൊറൻ്റോ : ഹൈ പാർക്കിലെ വനപ്രദേശത്തേക്ക് ഒരു സ്ത്രീയെ വലിച്ചിഴച്ച് കൊണ്ടുപോയി ലൈംഗികമായി പീഡിപ്പിച്ചതായി ടൊറൻ്റോ പൊലീസ്. ബുധനാഴ്ച രാത്രി പത്തരയോടെ ഹോവാർഡ് പാർക്ക് അവന്യൂവിനും പാർക്ക്‌സൈഡ് ഡ്രൈവിനും സമീപമുള്ള പാർക്കിന്‍റെ കിഴക്കുവശത്താണ് സംഭവം. സംഭവത്തെ തുടർന്ന് പൊതുജന സുരക്ഷാ മുന്നറിയിപ്പ് നൽകിയിട്ടുണ്ട്.
പാർക്കിലെ നടപ്പാതയിലൂടെ നടക്കുകയായിരുന്ന സ്ത്രീയെ അജ്ഞാതനായ ഒരാൾ പിന്നിൽ നിന്ന് സമീപിച്ച് വനപ്രദേശത്തേക്ക് വലിച്ചിഴച്ച് കൊണ്ടുപോയി ലൈംഗികമായി പീഡിപ്പിക്കുകയായിരുന്നു. സംഭവശേഷം പ്രതി രക്ഷപ്പെട്ടതായി പൊലീസ് പറയുന്നു. പ്രതിയിൽ നിന്ന് രക്ഷപ്പെട്ട സ്ത്രീ ഒരു വഴിയാത്രക്കാരന്‍റെ സഹായം തേടിയെന്ന് അന്വേഷണ ഉദ്യോഗസ്ഥർ അറിയിച്ചു. പ്രതി ഏകദേശം അഞ്ചടി പത്തടി ഉയരവും 30 മുതൽ 40 വയസ്സ് വരെ പ്രായമുള്ള, മെലിഞ്ഞ, കരുത്തനായ കറുത്ത വർഗ്ഗക്കാരനാണെന്ന് പൊലീസ് വിശേഷിപ്പിക്കുന്നു. ഇയാളെ അവസാനമായി കാണുമ്പോൾ ഒരു ടി-ഷർട്ടും ഇരുണ്ട നിറമുള്ള പാന്റും ധരിച്ചിരുന്നു. അന്വേഷണം പുരോഗമിക്കുന്നു. സംഭവത്തെക്കുറിച്ച് എന്തെങ്കിലും വിവരം ലഭിക്കുന്നവർ അന്വേഷണ ഉദ്യോഗസ്ഥരുമായി ബന്ധപ്പെടണമെന്ന് ടൊറൻ്റോ പൊലീസ് അഭ്യർത്ഥിച്ചു.
