സെൻ്റ് ജോൺസ് : പ്രവിശ്യാ തിരഞ്ഞെടുപ്പിൽ നേരിയ ഭൂരിപക്ഷത്തിൽ തോറ്റ മൂന്ന് റൈഡിങ്ങുകളിൽ ജുഡീഷ്യൽ റീകൗണ്ടിങ് ആവശ്യപ്പെട്ട് ന്യൂഫിൻലൻഡ് ആൻഡ് ലാബ്രഡോർ ലിബറൽ പാർട്ടി. ടോപ്സെയിൽ–പാരഡൈസ്, പ്ലാസൻഷ്യ വെസ്റ്റ്–ബെല്ലെവ്യൂ റൈഡിങ്ങുകളിൽ റീകൗണ്ടിങിനായി പാർട്ടി പ്രവിശ്യാ സുപ്രീം കോടതിയിൽ അപേക്ഷ നൽകി. ഈ റൈഡിങുകളിൽ ലിബറൽ സ്ഥാനാർത്ഥികൾ യഥാക്രമം 102, 64 വോട്ടുകൾക്കാണ് പരാജയപ്പെട്ടത്. ലെവിസ്പോർട്ടെ–ട്വിലിംഗേറ്റ് റൈഡിങ്ങിൽ പ്രോഗ്രസീവ് കൺസർവേറ്റീവ് സ്ഥാനാർത്ഥി മാർക്ക് ബട്ടിനോട് വെറും 18 വോട്ടുകൾക്ക് പരാജയപ്പെട്ട ലിബറൽ സ്ഥാനാർത്ഥി ഡെറക് ബെന്നറ്റ് വെള്ളിയാഴ്ച റീകൗണ്ടിങ് ആവശ്യപ്പെട്ടിരുന്നു. ഒക്ടോബർ 14-ന് നടന്ന പ്രവിശ്യാ തിരഞ്ഞെടുപ്പിൽ പ്രോഗ്രസീവ് കൺസർവേറ്റീവുകൾ 40 സീറ്റുകളിൽ 21 എണ്ണം നേടി ഭരണത്തിലെത്തിയിരുന്നു. ലിബറൽ പാർട്ടി 15 സീറ്റുകളാണ് നിലവിലുള്ളത്.
ഈ റൈഡിങുകളിൽ ജുഡീഷ്യൽ റീകൗണ്ടിങ് നടത്തുന്നതിലൂടെ നിയമനിർമ്മാണത്തിന് അനുസൃതമായി ഓരോ വോട്ടും ശരിയായി എണ്ണപ്പെടുന്നുവെന്ന് ഉറപ്പാക്കുമെന്ന് ലിബറൽ പാർട്ടി പറയുന്നു. 10 വോട്ടുകളുടെയോ അതിൽ കുറവോ ഭൂരിപക്ഷമുള്ള റൈഡിങിൽ സ്വയമേവ ജുഡീഷ്യൽ റീകൗണ്ടിങ് നടത്തണമെന്ന് പ്രവിശ്യാ തിരഞ്ഞെടുപ്പ് നിയമം അനുശാസിക്കുന്നു.
