മാഡ്രിഡ് : ഏപ്രിലില് റെട്രോ മാച്ച് ഡേ പ്രഖ്യാപിച്ച് ലാലീഗ. ഏപ്രില് 10 മുതല് 13 വരെയുള്ള തീയതികളില് ‘റെട്രോ മാച്ച് ഡേ’ (Retro Matchday) ആഘോഷിക്കാനാണ് ലീഗ് അധികൃതര് തീരുമാനിച്ചിരിക്കുന്നത്. ലീഗിലെ 20 ടീമുകളും തങ്ങളുടെ ചരിത്രപ്രധാനമായ പഴയകാല ജേഴ്സികള് ധരിച്ച് മത്സരത്തിനിറങ്ങുക എന്നതാണ് ഈ വാരത്തിന്റെ പ്രത്യേകത. യൂറോപ്യന് ടോപ്പ് ഡിവിഷന് ലീഗുകളില് ഇതാദ്യമായാണ് ഇത്തരമൊരു വിപുലമായ നീക്കം.
എന്നാല്, ലാലീഗയുടെ ഈ നീക്കത്തിന് തുടക്കത്തിലേ തിരിച്ചടി നേരിട്ടിരിക്കുകയാണ്. ലീഗിലെ വമ്പന്മാരായ റയല് മാഡ്രിഡും ബാഴ്സലോണയും ഈ ക്യാമ്പയിനില് നിന്ന് വിട്ടുനില്ക്കാന് തീരുമാനിച്ചതായാണ് റിപ്പോര്ട്ടുകള്. ലോജിസ്റ്റിക്കല് തടസ്സങ്ങളും തയ്യാറെടുപ്പിനുള്ള സമയക്കുറവുമാണ് ഇതിന് കാരണമായി ബാഴ്സലോണ ചൂണ്ടിക്കാട്ടുന്നത്. റയല് മാഡ്രിഡ് തങ്ങളുടെ വിയോജിപ്പിന് വ്യക്തമായ കാരണം വ്യക്തമാക്കിയിട്ടില്ലെങ്കിലും, അവര് റെട്രോ കിറ്റുകള് ധരിക്കാന് സാധ്യതയില്ലെന്നാണ് സൂചന. ഇവര്ക്ക് പുറമെ റയോ വയ്യക്കാനോ, ഗെറ്റാഫെ എന്നീ ക്ലബ്ബുകളും ഈ പദ്ധതിയില് പങ്കാളികളായേക്കില്ല.
കളിക്കാര്ക്ക് പുറമെ മാച്ച് ഒഫീഷ്യലുകളും റെഫറിമാരും പ്രത്യേക റെട്രോ യൂണിഫോമിലായിരിക്കും മൈതാനത്തെത്തുക. ടിവി ഗ്രാഫിക്സുകള്, മാച്ച് ബോളുകള് തുടങ്ങി മത്സരത്തിന്റെ എല്ലാ മേഖലകളിലും പഴയകാല ഫുട്ബോളിന്റെ അനുഭവം കൊണ്ടുവരാന് ലാലീഗ ഒരുങ്ങിക്കഴിഞ്ഞു. പ്രധാന ക്ലബ്ബുകളുടെ പിന്മാറ്റം ഉണ്ടെങ്കിലും, ആരാധകര്ക്ക് ഏറെ ആവേശം നല്കുന്ന ഒന്നായിരിക്കും ഈ റെട്രോ വാരമെന്ന് സംഘാടകര് കരുതുന്നു.
