റിയാദ്: സൗദി അറേബ്യയിലെ ജിദ്ദ കിങ് അബ്ദുല് അസീസ് അന്താരാഷ്ട്ര വിമാനത്താവളം ആഗോള വ്യോമയാന രംഗത്ത് ഐതിഹാസികമായ നേട്ടം കൈവരിച്ചു. പ്രമുഖ റേറ്റിങ് ഏജന്സിയായ ‘സ്കൈ ട്രാക്സ്’ (Skytrax) പ്രസിദ്ധീകരിച്ച 2026-ലെ പട്ടിക പ്രകാരം, പ്രതിവര്ഷം 5 മുതല് 6 കോടി വരെ യാത്രക്കാര്ക്ക് സേവനം നല്കുന്ന ‘മെഗാ എയര്പോര്ട്ട്’ വിഭാഗത്തില് ലോകത്തെ മികച്ച മൂന്നാമത്തെ വിമാനത്താവളമായി ജിദ്ദ തിരഞ്ഞെടുക്കപ്പെട്ടു. ലണ്ടനില് നടന്ന പാസഞ്ചര് ടെര്മിനല് എക്സ്പോയിലാണ് ഈ അഭിമാനകരമായ പ്രഖ്യാപനം ഉണ്ടായത്.
ആഗോളതലത്തിലെ മികച്ച 100 വിമാനത്താവളങ്ങളുടെ പട്ടികയില് ജിദ്ദ വിമാനത്താവളം വന് മുന്നേറ്റമാണ് നടത്തിയത്. കഴിഞ്ഞ വര്ഷത്തെ അപേക്ഷിച്ച് 17 സ്ഥാനങ്ങള് മെച്ചപ്പെടുത്തി ഇപ്പോള് 27-ാം റാങ്കിലെത്താന് ജിദ്ദയ്ക്ക് സാധിച്ചു. കൂടാതെ, ലോകത്ത് ഏറ്റവും കൂടുതല് പുരോഗതി കൈവരിച്ച വിമാനത്താവളങ്ങളുടെ പട്ടികയില് അഞ്ചാം സ്ഥാനവും ജിദ്ദ സ്വന്തമാക്കി. യാത്രക്കാരുടെ എണ്ണത്തിലും സേവന നിലവാരത്തിലും ഉണ്ടായ ദ്രുതഗതിയിലുള്ള വളര്ച്ചയാണ് ഈ അംഗീകാരങ്ങളിലൂടെ അടിവരയിടുന്നത്.
സൗദി അറേബ്യയുടെ ‘വിഷന് 2030’ പദ്ധതിയുടെ ഭാഗമായി വിമാനത്താവളങ്ങളില് നടപ്പിലാക്കിയ ലോകോത്തര പരിഷ്കാരങ്ങളാണ് ഈ വിജയത്തിന് പിന്നിലെന്ന് ജിദ്ദ എയര്പോര്ട്ട്സ് കമ്പനി സിഇഒ മസെന് ജോഹര് വ്യക്തമാക്കി. ഹജ്ജ്, ഉംറ തീര്ത്ഥാടകരുടെ പ്രധാന കവാടം എന്ന നിലയില്, യാത്രക്കാര്ക്ക് നല്കുന്ന സേവനങ്ങളുടെ ഗുണനിലവാരം ഉയര്ത്താന് നടത്തിയ കൂട്ടായ പരിശ്രമങ്ങളുടെ ഫലമാണിതെന്നും അദ്ദേഹം കൂട്ടിച്ചേര്ത്തു. ഈ നേട്ടം രാജ്യത്തെ ടൂറിസം മേഖലയ്ക്കും വിദേശ സഞ്ചാരികളെ ആകര്ഷിക്കുന്നതിനും വലിയ കരുത്തേകും.
