ഡല്ഹി: രൂപയുടെ മൂല്യത്തില് വന് തകര്ച്ച. ഡോളറിനെതിരെ രൂപയുടെ മൂല്യം 94 . 27 ആയി കുറഞ്ഞു. പശ്ചിമേഷ്യന് സംഘര്ഷങ്ങളുടെ പശ്ചാത്തലത്തിലാണ് ചരിത്രത്തിലെ ഏറ്റവും വലിയ തകര്ച്ചയിലേക്ക് രൂപ കൂപ്പുകുത്തിയത്. ഒറ്റ ദിവസം കൊണ്ട് 30 പൈസയുടെ ഇടിവാണ് രേഖപ്പെടുത്തിയത്. ഫെബ്രുവരി 28-ന് ശേഷം മാത്രം രൂപയുടെ മൂല്യത്തില് 3.5 ശതമാനം കുറവുണ്ടായി. നിലവിലെ ഊര്ജ്ജ പ്രതിസന്ധിയും വിദേശ നിക്ഷേപകരുടെ പിന്വാങ്ങലുമാണ് ഈ വന് തകര്ച്ചയ്ക്ക് പ്രധാന കാരണമായി സാമ്പത്തിക വിദഗ്ധര് ചൂണ്ടിക്കാണിക്കുന്നത്.
അന്താരാഷ്ട്ര വിപണിയില് ക്രൂഡ് ഓയില് വില ബാരലിന് 100 ഡോളറിന് മുകളില് തുടരുന്നത് ഇന്ത്യയെപ്പോലുള്ള ഇറക്കുമതിയെ ആശ്രയിക്കുന്ന രാജ്യങ്ങള്ക്ക് കടുത്ത വെല്ലുവിളിയാണ് സൃഷ്ടിക്കുന്നത്. ഈ വര്ഷം മാത്രം രൂപയുടെ മൂല്യത്തില് അഞ്ച് ശതമാനത്തിലധികം ഇടിവ് രേഖപ്പെടുത്തിക്കഴിഞ്ഞു. ഇതോടെ ആഗോള കറന്സികളില് ഏറ്റവും മോശം പ്രകടനം കാഴ്ചവയ്ക്കുന്ന കറന്സിയായി രൂപ മാറി. കഴിഞ്ഞയാഴ്ച 93.98 നിലവാരത്തിലായിരുന്ന രൂപ, വരും ദിവസങ്ങളിലും കൂടുതല് തകര്ച്ച നേരിടാന് സാധ്യതയുണ്ടെന്നാണ് റിപ്പോര്ട്ടുകള് സൂചിപ്പിക്കുന്നത്.
രൂപയ്ക്ക് പുറമെ യൂറോപ്യന് കറന്സികളിലും ഇടിവ് പ്രകടമാണ്. ജര്മ്മനി ഉള്പ്പെടെയുള്ള രാജ്യങ്ങളില് യൂറോയുടെ മൂല്യം ഒരു ശതമാനം ഇടിഞ്ഞ് 0.87-ല് എത്തി. എന്നാല്, ഈ പ്രതിസന്ധികള്ക്കിടയിലും റഷ്യന് കറന്സിയായ റൂബിള് നേരിയ തോതില് കരുത്താര്ജ്ജിക്കുന്നത് ശ്രദ്ധേയമാണ്. ഒരാഴ്ച മുമ്പ് 82.82 നിലവാരത്തിലായിരുന്ന റൂബിള് ഇപ്പോള് 81.38-ലേക്ക് മെച്ചപ്പെട്ടിട്ടുണ്ട്. എന്നിരുന്നാലും, പശ്ചിമേഷ്യയിലെ യുദ്ധസമാനമായ സാഹചര്യം ആഗോള സാമ്പത്തിക ഭദ്രതയെ വരും മാസങ്ങളിലും അനിശ്ചിതത്വത്തിലാക്കാന് സാധ്യതയുണ്ട്.
