കാനഡയിലെ ജനപ്രിയ ലോട്ടറിയായ ലോട്ടോ മാക്സിൽ ഏപ്രിൽ 10 മുതൽ വലിയ മാറ്റങ്ങൾ വരുന്നു. ടിക്കറ്റ് നിരക്ക് വർദ്ധിപ്പിക്കുന്നതിനൊപ്പം ജാക്ക്പോട്ട് തുകയിലും സമ്മാനഘടനയിലും മാറ്റങ്ങൾ വരുത്താനാണ് അധികൃതരുടെ തീരുമാനം.
ഒരു ടിക്കറ്റിന്റെ വില 5 ഡോളറിൽ നിന്ന് 6 ഡോളറായി ഉയരും. നിലവിൽ ഒരു ടിക്കറ്റിൽ 3 ലൈനുകളാണ് ലഭിക്കുന്നതെങ്കിൽ, പുതിയ മാറ്റത്തോടെ 4 ലൈനുകൾ ലഭിക്കും. 50 നമ്പറുകൾക്ക് പകരം ഇനി 52 നമ്പറുകളിൽ നിന്നാണ് 7 എണ്ണം തിരഞ്ഞെടുക്കേണ്ടത്. പരമാവധി ജാക്ക്പോട്ട് തുക 80 മില്യൺ ഡോളറിൽ നിന്ന് 90 മില്യൺ ഡോളറായി ഉയർത്തി.
വാട്ടർലൂ സർവകലാശാലയിലെ വിദഗ്ധരുടെ അഭിപ്രായത്തിൽ, ടിക്കറ്റിൽ കൂടുതൽ നമ്പറുകൾ ഉൾപ്പെടുത്തിയതിനാൽ വൻ സമ്മാനങ്ങൾ നേടാനുള്ള സാധ്യതയിൽ നേരിയ കുറവുണ്ടാകാം. എന്നാൽ ഒരു ടിക്കറ്റിൽ അധികമായി ലഭിക്കുന്ന നാലാമത്തെ ലൈൻ ഈ കുറവ് പരിഹരിക്കാൻ സഹായിക്കും.
പുതിയ മാറ്റങ്ങൾ വരുന്നതോടെ ചെറിയ സമ്മാനങ്ങൾ നേടാനുള്ള സാധ്യത മെച്ചപ്പെട്ടിട്ടുണ്ട്. അതായത്, ലോട്ടറി എടുക്കുന്നവർക്ക് ചെറിയ തുകകളെങ്കിലും സമ്മാനമായി ലഭിക്കാനുള്ള അവസരം ഇനി കൂടും. കൂടാതെ, മാക്സ് മില്യൺ നറുക്കെടുപ്പുകൾക്ക് പുറമെ ഒരു ലക്ഷം ഡോളറിന്റെ അധിക സമ്മാനങ്ങളും പുതിയ ഫോർമാറ്റിൽ ലഭ്യമാകും. ടിക്കറ്റ് വില കൂടുമെങ്കിലും വലിയ ജാക്ക്പോട്ട് തുകയും കൂടുതൽ വിജയസാധ്യതകളുമാണ് ലോട്ടോ മാക്സ് മാറ്റങ്ങൾ വാഗ്ദാനം ചെയ്യുന്നതിലൂടെ ലക്ഷ്യം വെക്കുന്നത്.
