ചങ്ങനാശേരി: ജനാധിപത്യം വിജയിക്കണമെന്നും അതിന് നിലവിലുള്ള സാഹചര്യങ്ങൾ പഠിച്ച് ഓരോ വോട്ടും രേഖപ്പെടുത്തണമെന്നും എൻഎസ്എസ് ജനറൽ സെക്രട്ടറി ജി. സുകുമാരൻ നായർ. വാഴപ്പള്ളി സെൻറ് തെരേസാസ് സ്കൂളിലെ ബൂത്തിൽ വോട്ടു രേഖപ്പെടുത്താനെത്തിയ അദ്ദേഹം മാധ്യമങ്ങളോടു പ്രതികരിക്കുകയായിരുന്നു. ഭരണം മാറ്റണമെന്നോ മാറ്റണ്ടെന്നോ ഞങ്ങൾ പറയുന്നില്ല. ആരാണ് ജയിക്കുന്നത് അവർ വരട്ടെ. ജനാധിപത്യം വിജയിക്കുന്നത് അനുസരിച്ചുള്ള നിലപാട് ജനങ്ങളാണ് സ്വീകരിക്കേണ്ടത്. ശബരിമല വിഷയത്തിൽ കേസ് നടന്നുകൊണ്ടിരിക്കുകയാണ്. ഞാൻ അതിൽ കക്ഷി ചേർന്നിരിക്കുന്നയാളാണ്. അതുകൊണ്ട് അതിനെക്കുറിച്ച് പ്രതികരിക്കുന്നില്ലെന്നും അദ്ദേഹം കൂട്ടിച്ചേർത്തു.
ശബരിമല സ്വർണക്കൊള്ളയുടെ കാര്യത്തിൽ കുറ്റക്കാരെ ശിക്ഷിക്കണം. അതിന് യാതൊരു സംശയവുമില്ല. കോടതിയും ഗവൺമെൻറും അതിനെക്കുറിച്ച് അന്വേഷിക്കുന്നുണ്ട് എന്നാണ് താൻ വിശ്വസിക്കുന്നതെന്നും സുകുമാരൻ നായർ കൂട്ടിച്ചേർത്തു.
