ടൊറന്റോ: ടൊറന്റോ ബില്ലി ബിഷപ്പ് വിമാനത്താവളത്തിൽ ജെറ്റ് വിമാനങ്ങൾ ഇറങ്ങുന്നതിനായി റൺവേ വികസിപ്പിക്കാനുള്ള പ്രീമിയർ ഡഗ് ഫോഡിന്റെ നീക്കം നഗരത്തിലെ ഭവന നിർമ്മാണ പദ്ധതികളെ തകിടം മറിക്കുമെന്ന് പരാതി. വിമാനത്താവള വികസനം വാട്ടർ ഫ്രണ്ട് മേഖലയിലെ ഭാവി ഭവന നിർമ്മാണത്തെ എങ്ങനെ ബാധിക്കുമെന്ന് പഠിക്കാൻ സിറ്റി കൗൺസിലർ ജോഷ് മാറ്റ്ലോ സിറ്റി പ്ലാനിംഗ് ആൻഡ് ഹൗസിംഗ് കമ്മിറ്റിയോട് ആവശ്യപ്പെട്ടു. വിമാനത്താവളത്തിന്റെ ലാൻഡിംഗ് പാത വികസിപ്പിക്കുന്നത് അടുത്തുള്ള പ്രദേശങ്ങളിലെ കെട്ടിടങ്ങളുടെ ഉയരവും സാന്ദ്രതയും കുറയ്ക്കാൻ കാരണമാകുമെന്ന് മാറ്റ്ലോ ചൂണ്ടിക്കാട്ടി. ഇത് ടൊറന്റോ നേരിടുന്ന ഭവന പ്രതിസന്ധി പരിഹരിക്കാനുള്ള നീക്കങ്ങൾക്ക് തിരിച്ചടിയാകുമെന്നാണ് ആശങ്ക. പോർട്ട് ലാൻഡ്സ് ഉൾപ്പെടെയുള്ള വാട്ടർ ഫ്രണ്ട് മേഖലകളിൽ പുതിയ വീടുകൾ നിർമ്മിക്കാനുള്ള അവസരം വിമാനത്താവള വികസനത്തോടെ എന്നെന്നേക്കുമായി നഷ്ടപ്പെടുമെന്ന് മാറ്റ്ലോ പറഞ്ഞു. ഉയരം കുറഞ്ഞ കെട്ടിടങ്ങൾ മാത്രമേ നിർമ്മിക്കാനാവൂ എങ്കിൽ താങ്ങാനാവുന്ന വിലയിലുള്ള ഭവന പദ്ധതികൾ നടപ്പിലാക്കുന്നത് പ്രായോഗികമാകില്ലെന്നും അദ്ദേഹം ചൂണ്ടിക്കാട്ടി. വിമാനങ്ങളുടെ ഇരമ്പലും വായു മലിനീകരണവും ഈ പ്രദേശത്തെ താമസക്കാരുടെ ജീവിത നിലവാരത്തെ ബാധിക്കുമെന്നും അദ്ദേഹം മുന്നറിയിപ്പ് നൽകി.
നഗരസഭയുടെ ഉടമസ്ഥതയിലുള്ള സ്ഥലം ഏറ്റെടുത്ത് വിമാനത്താവളം വികസിപ്പിക്കാനാണ് ഡഗ് ഫോഡ് സർക്കാരിന്റെ തീരുമാനം. ഇതിനായി പുതിയ നിയമനിർമ്മാണം നടത്താനും ഈ പ്രദേശത്തെ ‘പ്രത്യേക സാമ്പത്തിക മേഖല’യായി പ്രഖ്യാപിക്കാനും പ്രവിശ്യാ സർക്കാർ ലക്ഷ്യമിടുന്നു. ടൊറന്റോയിലെ ജനങ്ങളുടെ ജനാധിപത്യപരമായ അവകാശങ്ങളെ അടിച്ചമർത്താനാണ് പ്രീമിയർ ശ്രമിക്കുന്നതെന്ന് കൗൺസിലർ ഗോർഡ് പെർക്സ് കുറ്റപ്പെടുത്തി. ബില്ലി ബിഷപ്പ് വിമാനത്താവളം നിലവിൽ ടൊറന്റോ നഗരസഭ, ഫെഡറൽ ഗവൺമെന്റ്, പോർട്ട് അതോറിറ്റി എന്നിവയുടെ സംയുക്ത കരാറിന് കീഴിലാണ് പ്രവർത്തിക്കുന്നത്. എന്നാൽ പ്രവിശ്യാ സർക്കാർ നേരിട്ട് ഇടപെട്ട് ഇത് ഏറ്റെടുക്കാനുള്ള നീക്കം കൗൺസിലർമാർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. വസ്തുതകൾ പഠിച്ച ശേഷം മാത്രമേ ഇത്തരം വലിയ തീരുമാനങ്ങൾ എടുക്കാവൂ എന്നും സിറ്റി ഉദ്യോഗസ്ഥരോട് അടിയന്തരമായി പഠന റിപ്പോർട്ട് സമർപ്പിക്കാൻ ആവശ്യപ്പെട്ടിട്ടുണ്ടെന്നും മാറ്റ്ലോ വ്യക്തമാക്കി.
