കോബർഗ്: ഹൈവേ 401-ൽ തിങ്കളാഴ്ച വൈകുന്നേരം നടന്ന ദാരുണമായ അപകടത്തിൽ ഒപിപി സർജന്റ് ബ്രാൻഡൻ മാൽക്കം (33) ഡ്യൂട്ടിക്കിടയിൽ കൊല്ലപ്പെട്ടു. ഒരു മോട്ടോർ സൈക്കിൾ അപകടസ്ഥലത്ത് സഹായത്തിനായി എത്തിയതായിരുന്നു അദ്ദേഹം. ഈ വിയോഗത്തിൽ സ്ട്രാത്രോയ്-കാരാഡോക് പൊലീസ് സർവീസ് (SCPS) ഉൾപ്പെടെയുള്ളവർ അഗാധമായ ദുഃഖം രേഖപ്പെടുത്തി. അദ്ദേഹത്തിന്റെ ധീരതയെയും സേവനത്തെയും പൊലീസ് സേന ആദരിക്കുകയും കുടുംബാംഗങ്ങൾക്കും സഹപ്രവർത്തകർക്കും അനുശോചനം അറിയിക്കുകയും ചെയ്തു.
മാൽക്കമിന്റെ മരണത്തിനിടയാക്കിയ അപകടത്തിന് ശേഷം, അവിടെ സഹായത്തിനെത്തിയ പൊലീസ് ക്രൂയിസറുകൾ മറ്റൊരു വാഹനവുമായി കൂട്ടിയിടിച്ച് രണ്ടാമതൊരു അപകടം കൂടി അതേ സ്ഥലത്ത് നടന്നു. ഈ അപകടത്തിൽപ്പെട്ട മൂന്ന് പൊലീസുകാരെ ആശുപത്രിയിൽ പ്രവേശിപ്പിച്ചെങ്കിലും, പ്രാഥമിക ചികിത്സയ്ക്ക് ശേഷം എല്ലാവരെയും ഡിസ്ചാർജ് ചെയ്തു. നിലവിൽ ഈ രണ്ട് അപകടങ്ങളെക്കുറിച്ചും ചീഫ് കൊറോണറുടെ ഓഫീസും ഒന്റാരിയോ ഫോറൻസിക് പാത്തോളജി സർവീസും ചേർന്ന് വിശദമായ അന്വേഷണം നടത്തിവരികയാണ്.
2020-ൽ ഒപിപിയിൽ ചേർന്ന മാൽക്കം, നോർത്തംബർലാൻഡ് ഡിറ്റാഷ്മെന്റിലെയും പ്രശസ്ത മോട്ടോർ സൈക്കിൾ ടീമായ ‘ഗോൾഡൻ ഹെൽമെറ്റ്സി’ലെയും സജീവ അംഗമായിരുന്നു. അങ്ങേയറ്റം ആദരണീയനായ ഉദ്യോഗസ്ഥനായിരുന്നു അദ്ദേഹമെന്നും ഈ മരണം സേനയ്ക്ക് വലിയ നഷ്ടമാണെന്നും ഒപിപി കമ്മീഷണർ തോമസ് കാരിക്കു വ്യക്തമാക്കി. ഒന്റാരിയോ പ്രീമിയർ ഡഗ് ഫോർഡ് ഉൾപ്പെടെയുള്ളവർ അനുശോചനം അറിയിച്ചു.
