ഫ്രിബർഗ് (സ്വിറ്റ്സർലൻഡ്): പുരുഷന്മാരുടെ ലോക ഐസ് ഹോക്കി ചാമ്പ്യൻഷിപ്പിൽ കാനഡയ്ക്ക് തുടർച്ചയായ മൂന്നാം വിജയം. സ്വിറ്റ്സർലൻഡിലെ ഫ്രിബർഗിൽ നടന്ന ആവേശകരമായ മത്സരത്തിൽ ഡെന്മാർക്കിനെ ഒന്നിനെതിരെ അഞ്ച് ഗോളുകൾക്കാണ് കാനഡ തകർത്തത്. ആദ്യ രണ്ട് പീരിയഡുകളിലും ഇരുടീമുകൾക്കും ഗോളൊന്നും നേടാനായില്ലെങ്കിലും, മൂന്നാം പീരിയഡിൽ കാനഡ നടത്തിയ അവിശ്വസനീയമായ ആക്രമണമാണ് ഡെന്മാർക്കിന്റെ പ്രതിരോധം തകർത്തത്. കാനഡയുടെ ഇതിഹാസ താരം സിഡ്നി ക്രോസ്ബി നാല് അസിസ്റ്റുകളുമായി (ഗോളിന് മത്സരത്തിൽ തിളങ്ങി. പോർട്ടർ മാർട്ടോൺ ഒരു ഗോളും ഒരു അസിസ്റ്റും നേടി മികച്ച പ്രകടനം കാഴ്ചവെച്ചു.
ആദ്യ രണ്ട് പീരിയഡുകളിലും ഡെന്മാർക്ക് കാനഡയെ ശക്തമായി പ്രതിരോധിച്ചു നിർത്തിയിരുന്നു. എന്നാൽ മൂന്നാം പീരിയഡ് ആരംഭിച്ച് വെറും 28 സെക്കന്റുകൾക്കുള്ളിൽ പോർട്ടർ മാർട്ടോണിലൂടെ കാനഡ ആദ്യ ഗോൾ നേടി. തുടർന്ന് കളി പൂർണ്ണമായും കാനഡയുടെ കൈകളിലായി. 3 മിനിറ്റും 33 സെക്കന്റും പിന്നിട്ടപ്പോഴേക്കും ഗബ്രിയേൽ വിലാർഡി, ഡെന്റൺ മാറ്റെചുക് എന്നിവരിലൂടെ കാനഡ ലീഡ് 3-0 ആക്കി ഉയർത്തി. പോർട്ടർ മാർട്ടോൺ, ഗബ്രിയേൽ വിലാർഡി,
ഡെന്റൺ മാറ്റെചുക്, റയാൻ ഒറെയ്ലി, പാർക്കർ വോദർസ്പൂൺ എന്നിവർ കാനഡയ്ക്കു വേണ്ടി ഗോൾ വേട്ടക്കാരായി.
മത്സരത്തിന്റെ 10:12 മിനുറ്റിൽ നിക്ക് ഒലെസെനിലൂടെ ഡെന്മാർക്ക് ഒരു ഗോൾ മടക്കിയെങ്കിലും കാനഡയുടെ വിജയത്തെ അത് ബാധിച്ചില്ല. തൊട്ടടുത്ത മിനിറ്റുകളിൽ റയാൻ ഒറെയ്ലിയും, മത്സരം അവസാനിക്കാൻ 29 സെക്കന്റുകൾ ബാക്കിയുള്ളപ്പോൾ പാർക്കർ വോദർസ്പൂണും കാനഡയ്ക്കായി വീണ്ടും ഗോളുകൾ നേടി വിജയം ഉറപ്പിച്ചു. ഈ വിജയത്തോടെ ഗ്രൂപ്പ് എ-യിൽ 3 മത്സരങ്ങളിൽ നിന്ന് 9 പോയിന്റുമായി കാനഡ ഒന്നാം സ്ഥാനത്ത് തുടരുകയാണ്. ഒരു മത്സരം പോലും ജയിക്കാനാകാത്ത ഡെന്മാർക്ക് പട്ടികയിൽ അവസാന സ്ഥാനത്താണ്. വരും ദിവസങ്ങളിൽ നടക്കുന്ന അടുത്ത മത്സരത്തിൽ കാനഡ നോർവേയെ നേരിടും
