ഓട്ടവ: കാനഡയിലെ ഏപ്രിൽ മാസത്തിലെ പണപ്പെരുപ്പ നിരക്കുകൾ സ്റ്റാറ്റിസ്റ്റിക്സ് കാനഡ ഇന്ന് പുറത്തുവിടും. ഇറാനിലെ യുദ്ധത്തെത്തുടർന്നുണ്ടായ ആഗോള എണ്ണപ്രതിസന്ധി കാരണം 2023-ന് ശേഷം ആദ്യമായി രാജ്യത്തെ വാർഷിക പണപ്പെരുപ്പ നിരക്ക് 3 ശതമാനത്തിന് മുകളിലേക്ക് ഉയർന്നേക്കുമെന്നാണ് കണക്കാക്കുന്നത്. മാർച്ച് മാസത്തിൽ 2.4 ശതമാനമായിരുന്ന പണപ്പെരുപ്പം ഏപ്രിലിൽ 3.1 ശതമാനമായി ഉയർന്നേക്കാമെന്ന് റോയിട്ടേഴ്സ് നടത്തിയ സാമ്പത്തിക വിദഗ്ദ്ധരുടെ സർവേ വ്യക്തമാക്കുന്നു. യു.എസ്-ഇസ്രായേൽ ആക്രമണങ്ങൾക്ക് മറുപടിയായി ഫെബ്രുവരി അവസാനത്തോടെ ഇറാൻ ‘സ്ട്രീറ്റ് ഓഫ് ഹോർമുസ്’ വഴിയുള്ള കപ്പൽ ഗതാഗതം തടസ്സപ്പെടുത്തിയതാണ് അന്താരാഷ്ട്ര വിപണിയിൽ എണ്ണവില കുത്തനെ ഉയരാൻ കാരണമായത്.
ഇന്ധനവില വർദ്ധനവ് മൂലമുണ്ടാകുന്ന താൽക്കാലിക വിലക്കയറ്റത്തെ ബാങ്ക് ഓഫ് കാനഡ നിരീക്ഷിച്ചുവരികയാണ്. വിപണിയിലെ വിലക്കയറ്റ സമ്മർദ്ദം നിയന്ത്രണാതീതമാകാതിരിക്കാൻ ആവശ്യമായ നടപടികൾ സ്വീകരിക്കുമെന്ന് കേന്ദ്ര ബാങ്ക് സൂചന നൽകിയിട്ടുണ്ട്. പലിശനിരക്കുകൾ സംബന്ധിച്ച ബാങ്കിന്റെ അടുത്ത ഔദ്യോഗിക പ്രഖ്യാപനം ജൂൺ 10-ന് ഉണ്ടാകും.
