ന്യൂഡല്ഹി: രാജ്യത്ത് ഇന്ധനവില വീണ്ടും വര്ധിപ്പിച്ചു. പൊതുമേഖലാ എണ്ണക്കമ്പനികള് പെട്രോള് ലിറ്ററിന് 87 പൈസയും ഡീസല് ലിറ്ററിന് 91 പൈസയുമാണ് കൂട്ടിയത്. അന്താരാഷ്ട്ര വിപണിയില് അസംസ്കൃത എണ്ണവില കുതിച്ചുയരുന്ന പശ്ചാത്തലത്തിലാണ് ഈ നടപടി. കഴിഞ്ഞ 10 ദിവസത്തിനിടെ ഇത് മൂന്നാം തവണയാണ് രാജ്യത്ത് ഇന്ധന നിരക്ക് വര്ധിപ്പിക്കുന്നത്. ഇതോടെ ഈ ചുരുങ്ങിയ ദിവസങ്ങള്ക്കുള്ളില് പെട്രോളിനും ഡീസലിനും മൊത്തം അഞ്ച് രൂപയോളമാണ് വര്ധിച്ചത്.
മെയ് 15-നായിരുന്നു ഈ സീരീസിലെ ആദ്യത്തെ വന് വിലവര്ധനവ്. അന്ന് പെട്രോളിനും ഡീസലിനും ലിറ്ററിന് മൂന്ന് രൂപ വീതം വര്ധിപ്പിച്ചിരുന്നു. ദീര്ഘനാളത്തെ ഇടവേളയ്ക്ക് ശേഷമായിരുന്നു ഈ മാറ്റം. ഇതിന് തൊട്ടുപിന്നാലെ കഴിഞ്ഞ ദിവസവും പെട്രോളിന് 86 പൈസയും ഡീസലിന് 83 പൈസയും വീണ്ടും കൂട്ടി. വരും ദിവസങ്ങളിലും കൃത്യമായ ഇടവേളകളില് നേരിയ തോതില് നിരക്ക് വര്ധിപ്പിച്ച് മൊത്തം എട്ട് രൂപ വരെ കൂട്ടാനാണ് എണ്ണക്കമ്പനികള് ലക്ഷ്യമിടുന്നത് എന്നാണ് സൂചനകള്.
പശ്ചിമേഷ്യയില്, പ്രത്യേകിച്ച് ഇറാനിലുണ്ടായ കടുത്ത സംഘര്ഷങ്ങളാണ് ആഗോള എണ്ണ വിതരണ ശൃംഖലയെ (Global Supply Chain) പ്രതിസന്ധിയിലാക്കിയത്. ഇതേത്തുടര്ന്ന് രാജ്യാന്തര വിപണിയില് ക്രൂഡ് ഓയില് വില ബാരലിന് 100 ഡോളറിനും മുകളിലേക്ക് കുതിച്ചുയര്ന്നതാണ് ഇന്ത്യയെയും നേരിട്ട് ബാധിക്കുന്നത്. ഇതിനൊപ്പം തന്നെ ഗാര്ഹിക ആവശ്യങ്ങള്ക്കുള്ള എല്പിജി സിലിണ്ടറുകളുടെ വിലയും വരും ദിവസങ്ങളില് വര്ധിച്ചേക്കുമെന്നാണ് പുറത്തുവരുന്ന റിപ്പോര്ട്ടുകള് സൂചിപ്പിക്കുന്നത്.
തുടര്ച്ചയായുണ്ടാകുന്ന ഈ വിലക്കയറ്റം രാജ്യത്ത് വലിയ ആശങ്കയ്ക്ക് വഴിതുറന്നിട്ടുണ്ട്. ഇന്ധനവില വര്ധിക്കുന്നത് ചരക്കുകൂലിയും പൊതുഗതാഗതച്ചെലവും കുത്തനെ കൂട്ടും. ഇത് വിപണിയില് പച്ചക്കറികള് ഉള്പ്പെടെയുള്ള നിത്യോപയോഗ സാധനങ്ങളുടെ വിലക്കയറ്റത്തിന് കാരണമാകുമെന്ന് സാമ്പത്തിക വിദഗ്ധര് മുന്നറിയിപ്പ് നല്കുന്നു. ടാക്സി-ബസ് സര്വീസുകളെയും സാധാരണക്കാരായ വാഹന ഉടമകളെയും ഈ തീരുമാനം കടുത്ത സാമ്പത്തിക പ്രതിസന്ധിയിലേക്കാണ് തള്ളിവിടുന്നത്. അന്താരാഷ്ട്ര വിപണിയില് ക്രൂഡ് ഓയില് വില ഇനിയും ഉയര്ന്നാല് വരും ദിവസങ്ങളിലും സാധാരണക്കാരന്റെ പോക്കറ്റ് ചോര്ത്തുന്ന ഈ വിലക്കയറ്റം തുടരാനാണ് സാധ്യത.
