ഹെയ്തിക്കെതിരായ മത്സരത്തിൽ നെയ്മർ ഇല്ലാതെയാണ് ബ്രസീൽ ഇറങ്ങിയതെങ്കിലും ആധികാരിക ജയം നേടാൻ അവർക്കായിരുന്നു. എന്നാൽ സ്കോട്ട്ലൻഡിനെതിരായ മത്സരം കൂടുതൽ കടുപ്പമേറിയതാകുമെന്നും, അതിൽ നെയ്മറുടെ സാന്നിധ്യം ടീമിന് അത്യന്താപേക്ഷിതമാണെന്നും ആൻസലോട്ടി വ്യക്തമാക്കി.
താരത്തിന്റെ പരിക്കുമായി ബന്ധപ്പെട്ട ആശങ്കകൾ പൂർണ്ണമായും അകന്നതായാണ് ബ്രസീൽ ക്യാമ്പിൽ നിന്നുള്ള റിപ്പോർട്ടുകൾ സൂചിപ്പിക്കുന്നത്.
പരിക്കിന്റെ പിടിയിലായിരുന്നെങ്കിലും നെയ്മർ കഴിഞ്ഞ ദിവസങ്ങളിൽ ഗ്രൗണ്ടിലിറങ്ങി പരിശീലനം പുനരാരംഭിച്ചിട്ടുണ്ട്. മെഡിക്കൽ ടീമിന്റെ പച്ചക്കൊടി ലഭിച്ചാൽ ആദ്യ ഇലവനിൽ തന്നെ നെയ്മർ ഇറങ്ങാനാണ് സാധ്യത.
വിനീഷ്യസ് ജൂനിയറിനും കഴിഞ്ഞ മത്സരത്തിൽ ഇരട്ട ഗോൾ നേടിയ മത്തേയൂസ് കുഞ്ഞയ്ക്കുമൊപ്പം നെയ്മർ കൂടി ചേരുന്നതോടെ ബ്രസീലിന്റെ മുന്നേറ്റ നിര കൂടുതൽ അപകടകാരികളാകും എന്ന് ഉറപ്പാണ്.
സ്കോട്ട്ലൻഡിനെതിരെ നിർണായക പോരാട്ടം
ഗ്രൂപ്പിലെ ഒന്നാം സ്ഥാനം നിലനിർത്താനും നോക്കൗട്ടിലേക്ക് കൂടുതൽ ആത്മവിശ്വാസത്തോടെ മുന്നേറാനും ബ്രസീലിന് സ്കോട്ട്ലൻഡിനെതിരായ ജയം അനിവാര്യമാണ്. ഈ ലോകകപ്പിൽ മികച്ച പോരാട്ടം കാഴ്ചവെയ്ക്കുന്ന സ്കോട്ട്ലൻഡിനെതിരെ നെയ്മറുടെ മാന്ത്രിക നീക്കങ്ങൾ ബ്രസീലിന് വലിയ ഊർജ്ജം നൽകും.