2026 ഫിഫ ലോകകപ്പിൽ ഓസ്ട്രിയയെ നേരിടാനൊരുങ്ങുന്ന അർജന്റീനയ്ക്ക് ഈ മത്സരം ഒരു സാധാരണ പോരാട്ടമല്ല. ഫുട്ബോൾ ഇതിഹാസം ഡിയഗോ മറഡോണയുടെ ചരിത്ര നിമിഷങ്ങൾ ഓർമ്മിപ്പിക്കുന്ന പ്രത്യേക ദിനത്തിലാണ് അർജന്റീന കളത്തിലിറങ്ങുന്നത്.
1986 ജൂൺ 22-ന് ഇംഗ്ലണ്ടിനെതിരായ ക്വാർട്ടർ ഫൈനലിൽ മറഡോണ നേടിയ പ്രശസ്തമായ “ഹാൻഡ് ഓഫ് ഗോഡ്” ഗോളിനും “ഗോൾ ഓഫ് ദ സെഞ്ച്വറി”ക്കും 40 വർഷം പൂർത്തിയാകുന്ന ദിവസത്തിലാണ് അർജന്റീനയും ഓസ്ട്രിയയും ഏറ്റുമുട്ടുന്നത്. ഈ ദിവസം അർജന്റീനയിൽ “അർജന്റൈൻ ഫുട്ബോൾ ദിനം” ആയി ആചരിക്കുന്നു.
മറഡോണയുടെ നിര്യാണത്തിന് വർഷങ്ങൾ കഴിഞ്ഞിട്ടും അദ്ദേഹത്തിന്റെ ഓർമ്മകളും ഫുട്ബോൾ പാരമ്പര്യവും അർജന്റീന ആരാധകരുടെ മനസ്സിൽ ശക്തമായി തുടരുകയാണ്. ചരിത്രത്തിലെ ആ മഹത്തായ നിമിഷങ്ങളെ വീണ്ടും ഓർമിപ്പിച്ചുകൊണ്ടാണ് ലോകകപ്പിലെ ഈ മത്സരത്തിന് ആരാധകർ കാത്തിരിക്കുന്നത്.
അർജന്റീന പരിശീലകൻ ലയണൽ സ്കലോണിയും മറഡോണയുടെ 1986ലെ പ്രകടനത്തിന്റെ ഓർമ്മകൾ പങ്കുവെച്ചിരുന്നു. 1980ൽ ഓസ്ട്രിയക്കെതിരെയാണ് മറഡോണ തന്റെ ഏക അന്താരാഷ്ട്ര ഹാട്രിക്ക് നേടിയതെന്ന പ്രത്യേകതയും ഈ മത്സരത്തിനുണ്ട്.
നിലവിലെ ലോക ചാമ്പ്യന്മാരായ അർജന്റീന, ആദ്യ മത്സരത്തിൽ അൾജീരിയയെ 3-0ന് തോൽപ്പിച്ച ആത്മവിശ്വാസത്തോടെയാണ് ഓസ്ട്രിയയെ നേരിടുന്നത്. ഓസ്ട്രിയയും ആദ്യ മത്സരത്തിൽ ജോർദാനെ 3-1ന് പരാജയപ്പെടുത്തി മികച്ച തുടക്കമാണ് നേടിയത്.
