ഏഥൻസ്: ഗ്രീസിൽ പടരുന്ന ശക്തമായ കാട്ടുതീയെ നിയന്ത്രിക്കാൻ അഗ്നിശമന സേനയുടെ പോരാട്ടം തുടരുന്നതിനിടെ, തീ അണക്കുന്നതിനായി ഉപയോഗിച്ചിരുന്ന രണ്ട് ഹെലികോപ്റ്ററുകൾ കൂട്ടിയിടിച്ച് രണ്ട് ജീവനക്കാർ മരിച്ചു. തലസ്ഥാനമായ ഏഥൻസിന് പടിഞ്ഞാറുള്ള മേഖലയിൽ നൂറുകണക്കിന് അഗ്നിശമന പ്രവർത്തകർ തീയണയ്ക്കാനുള്ള ശ്രമം തുടരുകയാണ്.
തിങ്കളാഴ്ച പുലർച്ചെ അഞ്ച് ജലവർഷണ വിമാനങ്ങളും അഞ്ച് ഹെലികോപ്റ്ററുകളും രക്ഷാപ്രവർത്തനത്തിനായി രംഗത്തെത്തി. മൗണ്ട് കിതെറോണാസ് മേഖലയിലുണ്ടായ തീ പൈൻ വനങ്ങളിലൂടെയും കുറ്റിക്കാടുകളിലൂടെയും അതിവേഗം പടർന്നതിനെ തുടർന്ന് പ്രദേശത്ത് നിന്ന് ആളുകളെ ഒഴിപ്പിക്കേണ്ടിവന്നു.
വെള്ളിയാഴ്ച ആരംഭിച്ച തീ നിയന്ത്രിക്കാൻ ശ്രമിക്കുന്നതിനിടെയാണ് സൈഥ തീരപ്രദേശത്തിന് സമീപം രണ്ട് അഗ്നിശമന ഹെലികോപ്റ്ററുകൾ തമ്മിൽ കൂട്ടിയിടിച്ചത്. അപകടത്തിൽ ഗ്രീക്ക് സ്വദേശിയായ ഒരു ജീവനക്കാരനും ഡാനിഷ് പൗരനായ മറ്റൊരാളും മരിച്ചു. മറ്റൊരു ഹെലികോപ്റ്ററിലുണ്ടായിരുന്ന ഗ്രീക്ക്, ബ്രിട്ടീഷ് ജീവനക്കാരെ ആശുപത്രിയിൽ പ്രവേശിപ്പിച്ചെങ്കിലും പരുക്കുകൾ ഗുരുതരമല്ലെന്നാണ് വിവരം.
ശക്തമായ കാറ്റ് കാരണം പലപ്പോഴും ജലവർഷണ വിമാനങ്ങൾക്ക് പ്രവർത്തിക്കാൻ കഴിയാതിരുന്നത് രക്ഷാപ്രവർത്തനത്തെ ബാധിച്ചു. തിങ്കളാഴ്ച കാറ്റിന്റെ ശക്തി കുറഞ്ഞത് തീയണക്കാനുള്ള ശ്രമങ്ങൾക്ക് പ്രതീക്ഷ നൽകിയിട്ടുണ്ട്. എന്നാൽ താപനില ഉയരാനുള്ള സാധ്യത കണക്കിലെടുത്ത് ഏഥൻസ് ഉൾപ്പെടുന്ന അറ്റിക്ക മേഖലയിലെ വനത്തീ അപകടസാധ്യത ഇപ്പോഴും ഉയർന്ന നിലയിലാണെന്ന് അധികൃതർ മുന്നറിയിപ്പ് നൽകി.
കാട്ടുതീ ബാധിത പ്രദേശങ്ങളിൽ നിന്ന് ഇതിനകം 1,000-ത്തിലധികം ആളുകളെ ഒഴിപ്പിച്ചിട്ടുണ്ട്. ഇതിൽ 250-ലധികം പേരെ കടൽമാർഗം രക്ഷപ്പെടുത്തിയതായി അധികൃതർ അറിയിച്ചു. തീ പടരുന്നത് തടയാൻ വനമേഖലകളിൽ ഫയർ ബ്രേക്ക് സൃഷ്ടിക്കുന്ന പ്രവർത്തനങ്ങളും പുരോഗമിക്കുകയാണ്.
സ്വകാര്യ കാറ്റാടി വൈദ്യുതി പദ്ധതിയിൽ നിന്ന് പ്രധാന വൈദ്യുതി ശൃംഖലയിലേക്ക് പോകുന്ന വൈദ്യുതി ലൈനിലെ തകരാറിൽ നിന്നുണ്ടായ തീപ്പൊരിയാണ് തീപിടിത്തത്തിന് കാരണമെന്നാണ് ഗ്രീക്ക് അഗ്നിശമന വിഭാഗത്തിന്റെ പ്രാഥമിക നിഗമനം. സംഭവവുമായി ബന്ധപ്പെട്ട് ഒരു ഇലക്ട്രിക്കൽ എൻജിനീയറെയും ഒരു കരാറുകാരനെയും അറസ്റ്റ് ചെയ്തിട്ടുണ്ട്. ഇവർക്കെതിരെ ഗുരുതരമായ തീപിടിത്തക്കുറ്റം ചുമത്തിയിട്ടുണ്ട്.
വേനൽക്കാലത്ത് ചൂടും വരണ്ട കാലാവസ്ഥയും ശക്തമായ കാറ്റും കാരണം ഗ്രീസിൽ കാട്ടുതീ പതിവാണ്. അശ്രദ്ധ മൂലമാണ് രാജ്യത്തെ ഭൂരിഭാഗം കാട്ടുതീകളും ഉണ്ടാകുന്നതെന്ന് അധികൃതർ വ്യക്തമാക്കുന്നു. അതേസമയം ചില തീപിടിത്തങ്ങൾ മനഃപൂർവം ഉണ്ടാക്കുന്നതാണെന്നും അന്വേഷണങ്ങൾ തുടരുകയാണെന്നും അറിയിച്ചു.
യൂറോപ്പിലെ വിവിധ ഭാഗങ്ങളിൽ തുടരുന്ന കാട്ടുതീ പ്രതിസന്ധിയുടെ ഭാഗമായാണ് ഗ്രീസിലെ സംഭവവും വിലയിരുത്തപ്പെടുന്നത്. ഫ്രാൻസിലും സ്പെയിനിലും പടർന്ന തീപിടിത്തങ്ങൾ മൂലം ലക്ഷക്കണക്കിന് ആളുകളെ മാറ്റിപ്പാർപ്പിക്കേണ്ടിവന്നിട്ടുണ്ട്.
