ഒന്റാരിയോ: രാജ്യത്തെ തൊഴിലാളികളുടെ തൊഴില്സുരക്ഷ ഉറപ്പാക്കുന്നതിനും നൈപുണ്യവികസനം പ്രോത്സാഹിപ്പിക്കുന്നതിനുമായി ഒന്റാരിയോ സര്ക്കാരും ഫെഡറല് സര്ക്കാരും ചേര്ന്ന് 7.2 മില്യണ് ഡോളറിലധികം തുകയുടെ നിക്ഷേപം പ്രഖ്യാപിച്ചു. ‘കാനഡ-ഒന്റാരിയോ വര്ക്ക്ഫോഴ്സ് താരിഫ് റെസ്പോണ്സ്’ (Canada-Ontario Workforce Tariff Response) പദ്ധതിക്ക് കീഴിലാണ് ഈ ധനസഹായം ലഭ്യമാക്കുന്നത്. 500-ലധികം വരുന്ന തൊഴിലാളികള്ക്ക് ആധുനിക നൈപുണ്യ പരിശീലനം നല്കാനും, തൊഴില്മാറ്റങ്ങള്ക്ക് അവരെ പ്രാപ്തരാക്കാനും, പ്രാദേശിക സ്ഥാപനങ്ങള്ക്ക് ആവശ്യമായ വൈദഗ്ധ്യമുള്ള തൊഴില്ശക്തിയെ ഒരുക്കാനുമാണ് പദ്ധതി ലക്ഷ്യമിടുന്നത്.
‘സ്കില്സ് അഡ്വാന്സ് ഒന്റാരിയോ’ (Skills Advance Ontario) പദ്ധതി വഴിയാണ് ഈ സാമ്പത്തിക സഹായം വിതരണം ചെയ്യുന്നത്. തൊഴിലുടമകള്, പരിശീലന കേന്ദ്രങ്ങള് എന്നിവരുമായി നേരിട്ട് സഹകരിച്ച് പ്രവര്ത്തിക്കുന്നതിലൂടെ, കനേഡിയന് സാമ്പത്തിക വളര്ച്ചയ്ക്ക് നിര്ണായകമായ വ്യാവസായിക മേഖലകളിലേക്ക് തൊഴിലാളികളെ തിരിച്ചുവിടാനും അവര്ക്ക് ആവശ്യമായ പരിശീലനം ഉറപ്പാക്കാനും പദ്ധതിയിലൂടെ സാധിക്കും. ഉത്തര ഒന്റാരിയോയിലെ നാല് പ്രധാന സ്ഥാപനങ്ങള്ക്കാണ് ഈ പദ്ധതിയുടെ പ്രയോജനം ആദ്യഘട്ടത്തില് ലഭിക്കുന്നത്.
പദ്ധതി പ്രകാരം ‘അല്ഗോമ സ്റ്റീല്’ (Algoma Steel Inc.) എന്ന സ്ഥാപനത്തിന് 250 ജീവനക്കാരുടെ നൈപുണ്യം മെച്ചപ്പെടുത്തുന്നതിനായി 1.48 മില്യണ് ഡോളര് അനുവദിച്ചു. കൂടാതെ ‘കനേഡിയന് സ്കില്സ് ട്രെയിനിങ് ആന്ഡ് എംപ്ലോയ്മെന്റ് കൊയലിഷന്’ (CSTEC) 1.55 മില്യണ് ഡോളര് ലഭ്യമാക്കും. നിര്മാണമേഖലയിലെ 120 തൊഴിലാളികള്ക്ക് വെല്ഡിങ്, ഇന്ഡസ്ട്രിയല് മെക്കാനിക്ക് തുടങ്ങിയ സാങ്കേതിക ട്രേഡുകളില് നാല് മുതല് 18 ആഴ്ച വരെ നീളുന്ന പ്രായോഗിക പരിശീലനം നല്കാന് ഇത് ഉപയോഗിക്കും. വ്യവസായ അംഗീകൃത സുരക്ഷാ സര്ട്ടിഫിക്കേഷനും ശമ്പളത്തോടുകൂടിയ തൊഴില്പരിചയവും ഈ ട്രെയിനിംഗിന്റെ ഭാഗമായി തൊഴിലാളികള്ക്ക് ലഭിക്കും.
അതേസമയം, ‘കോണ്ഫെഡറേഷന് കോളേജ് ഓഫ് അപ്ലൈഡ് ആര്ട്സ് & ടെക്നോളജി’ക്ക് 2.78 മില്യണ് ഡോളറാണ് അനുവദിച്ചിട്ടുള്ളത്. തണ്ടര് ബേ മേഖലയിലെ വനവല്ക്കരണം, പള്പ്പ്-പേപ്പര് വ്യവസായങ്ങളിലുണ്ടായ പുനഃസംഘടനയെ തുടര്ന്ന് തൊഴില് നഷ്ടപ്പെട്ടതോ പ്രതിസന്ധിയിലായതോ ആയ 110 തൊഴിലാളികള്ക്കും തൊഴിലന്വേഷകര്ക്കും പുതിയ പരിശീലനം നല്കും. ഹെവി ഇക്വിപ്പ്മെന്റ് ഓപ്പറേഷന്, മില്റൈറ്റിംഗ്, വെല്ഡിംഗ്, ഇലക്ട്രിക്കല്, കൊമേഴ്സ്യല് ഡ്രൈവിംഗ് തുടങ്ങിയ മേഖലകളിലാണ് ഇവരെ സജ്ജരാക്കുന്നത്.
കൂടാതെ ‘വാഷഗമിസ് ബേ ഇന്വെസ്റ്റ്മെന്റ് കോര്പ്പറേഷന്’ 1.39 മില്യണ് ഡോളര് നല്കാനും തീരുമാനമായിട്ടുണ്ട്. കെനോറ മേഖലയിലെ 40 തൊഴിലന്വേഷകര്ക്കും, പ്രത്യേകിച്ച് ‘ട്രീറ്റി 3’ മേഖലയിലെ തദ്ദേശീയ സമൂഹാംഗങ്ങള്ക്കും ഭവനനിര്മാണം, വനവല്ക്കരണം, ടെലികമ്മ്യൂണിക്കേഷന് അടിസ്ഥാനസൗകര്യ വികസനം തുടങ്ങിയ മേഖലകളില് പ്രത്യേക തൊഴില്പരിശീലനം നല്കാന് ഈ ഫണ്ട് വിനിയോഗിക്കും.
