ഓട്ടവ: കാനഡയിലെ കടുത്ത കാട്ടുതീയും ഉഷ്ണതരംഗവും ജനങ്ങളിൽ കാലാവസ്ഥാ ആശങ്ക വൻതോതിൽ വർധിപ്പിച്ചതായി പുതിയ അഭിപ്രായ സർവേ ഫലങ്ങൾ വ്യക്തമാക്കുന്നു. കഴിഞ്ഞ കുറച്ചുകാലമായി ജീവിതച്ചെലവ് പോലുള്ള സാമ്പത്തിക പ്രശ്നങ്ങൾക്ക് പിന്നിലേക്ക് പോയിരുന്ന ഈ വിഷയം, വനനശീകരണവും വായുമലിനീകരണവും രൂക്ഷമായതോടെ വീണ്ടും ജനങ്ങളുടെ പ്രധാന ചർച്ചാവിഷയമായി മാറിയിരിക്കുകയാണ്.
ആംഗസ് റീഡ് ഇൻസ്റ്റിറ്റ്യൂട്ടിന്റെ ഏറ്റവും പുതിയ സർവേ പ്രകാരം, ജൂലൈയിൽ കാനഡക്കാരിൽ 21 ശതമാനം പേർ പരിസ്ഥിതിയും കാലാവസ്ഥാ വ്യതിയാനവും തങ്ങളുടെ പ്രധാന മൂന്ന് ആശങ്കകളിൽ ഒന്നായി ചൂണ്ടിക്കാട്ടി. മാർച്ചിലെ കണക്കുമായി താരതമ്യം ചെയ്യുമ്പോൾ ഇത് 50 ശതമാനത്തിന്റെ വർധനവാണ്.
18 മുതൽ 34 വയസ്സ് വരെയുള്ളവരിൽ 25 ശതമാനം പേരും, 35 മുതൽ 55 വയസ്സ് വരെയുള്ളവരിൽ 23 ശതമാനം പേരും, 55 വയസ്സിന് മുകളിലുള്ളവരിൽ 16 ശതമാനം പേരും കാലാവസ്ഥാ വ്യതിയാനത്തെ പ്രധാന വിഷയമായി പരിഗണിക്കുന്നതായി സർവേ കണ്ടെത്തി.
ജൂലൈ അവസാന വാരത്തിൽ നടത്തിയ സർവേയിൽ 1,770 മുതിർന്ന കനേഡിയൻ പൗരന്മാരാണ് പങ്കെടുത്തത്. ഇതിന് സമാനമായി അബാക്കസ് ഡാറ്റ നടത്തിയ സർവേയിലും കാലാവസ്ഥാ വ്യതിയാനത്തെ പ്രധാന വിഷയമായി കാണുന്നവരുടെ എണ്ണത്തിൽ വർധന രേഖപ്പെടുത്തി. അവരുടെ സർവേയിൽ 18 ശതമാനം പേർ പരിസ്ഥിതിയെയും കാലാവസ്ഥയെയും മുൻഗണനാ വിഷയമായി തിരഞ്ഞെടുത്തു.
കാട്ടുതീ ആശങ്ക വർധിപ്പിച്ചു
ബ്രിട്ടീഷ് കൊളംബിയയിലും വടക്കുപടിഞ്ഞാറൻ ഒന്റാരിയോയിലും ഉൾപ്പെടെ കാനഡയിലെ വിവിധ ഭാഗങ്ങളിൽ തുടരുന്ന കാട്ടുതീയും അതിന്റെ ഫലമായ പുകമഞ്ഞും ജനങ്ങളുടെ ശ്രദ്ധ വീണ്ടും കാലാവസ്ഥാ പ്രശ്നങ്ങളിലേക്ക് തിരിച്ചതായി വിദഗ്ധർ പറയുന്നു.അബാക്കസ് ഡാറ്റയുടെ സി.ഇ.ഒ ഡേവിഡ് കൊലെറ്റോയുടെ അഭിപ്രായത്തിൽ, കാട്ടുതീ, പുകമഞ്ഞ്, ആഗോളതലത്തിലെ അതിശക്തമായ കാലാവസ്ഥാ സംഭവങ്ങൾ എന്നിവ കാലാവസ്ഥാ വ്യതിയാനത്തെ വീണ്ടും പൊതുചർച്ചയിലെ പ്രധാന വിഷയമാക്കി മാറ്റിയിരിക്കുകയാണ്.
എന്നാൽ ഈ വർധിച്ച താൽപര്യം ദീർഘകാലം തുടരുമോ അതോ കാട്ടുതീ പോലുള്ള സംഭവങ്ങളുമായി മാത്രം ബന്ധപ്പെട്ട താൽക്കാലിക പ്രതികരണമാണോ എന്നത് വ്യക്തമല്ലെന്ന് ആംഗസ് റീഡ് ഇൻസ്റ്റിറ്റ്യൂട്ട് പ്രസിഡന്റ് ഷാച്ചി കുർൾ പറഞ്ഞു.
കാലാവസ്ഥാ വ്യതിയാനത്തെക്കുറിച്ചുള്ള ആശങ്ക ഉയർന്നിട്ടുണ്ടെങ്കിലും, 2019ലെ തിരഞ്ഞെടുപ്പ് കാലത്തെ നിലയുമായി താരതമ്യം ചെയ്യുമ്പോൾ ഇപ്പോഴും കുറവാണ്. 2019 ജൂണിൽ നടത്തിയ സർവേയിൽ 40 ശതമാനം കാനഡക്കാരാണ് പരിസ്ഥിതിയും കാലാവസ്ഥയും പ്രധാന വിഷയമായി തിരഞ്ഞെടുത്തത്.
കോവിഡ്-19 മഹാമാരിക്കാലത്ത് ആരോഗ്യസംരക്ഷണം, സമ്പദ്വ്യവസ്ഥ, ജീവിതച്ചെലവ് തുടങ്ങിയ വിഷയങ്ങൾ മുൻഗണന നേടിയതോടെ കാലാവസ്ഥാ വിഷയം പിന്നിലായതായി വിദഗ്ധർ ചൂണ്ടിക്കാട്ടുന്നു.
രാഷ്ട്രീയ ചർച്ച ശക്തമാകുന്നു
2025ലെ ഫെഡറൽ തിരഞ്ഞെടുപ്പിൽ പരിസ്ഥിതി വിഷയങ്ങൾ കാനഡക്കാരുടെ പ്രധാന അഞ്ച് ആശങ്കകളിൽ ഉൾപ്പെട്ടിരുന്നില്ല. പ്രധാനമന്ത്രി മാർക്ക് കാർണി അധികാരത്തിലെത്തിയതിന് പിന്നാലെ ഉപഭോക്തൃ കാർബൺ നികുതി അവസാനിപ്പിച്ചിരുന്നു.
എന്നാൽ പുതിയ സാഹചര്യത്തിൽ കാലാവസ്ഥാ നയങ്ങളെക്കുറിച്ചുള്ള രാഷ്ട്രീയ ചർച്ച വീണ്ടും ശക്തമാകുകയാണ്. പരിസ്ഥിതി പ്രവർത്തകർ പറയുന്നത്, കാലാവസ്ഥാ പ്രശ്നത്തെക്കുറിച്ചുള്ള ജനങ്ങളുടെ ആശങ്ക ഇല്ലാതായിരുന്നില്ലെന്നും മറ്റ് അടിയന്തര വിഷയങ്ങൾ അതിനെ മറികടന്നിരുന്നുവെന്നുമാണ്.കാനഡയിലെ പരിസ്ഥിതി സംഘടനയായ എൻവയോൺമെന്റൽ ഡിഫൻസിലെ കീത്ത് ബ്രൂക്സ്, കാലാവസ്ഥാ പ്രതിസന്ധിയുടെ ഗൗരവം ജനങ്ങൾ കൂടുതൽ തിരിച്ചറിയണമെന്നും സർക്കാർ കൂടുതൽ ശക്തമായ നടപടികൾ സ്വീകരിക്കണമെന്നും ആവശ്യപ്പെട്ടു.
കാട്ടുതീയും അതിശക്തമായ കാലാവസ്ഥാ സംഭവങ്ങളും തുടരുന്ന സാഹചര്യത്തിൽ, കാലാവസ്ഥാ വ്യതിയാനം കാനഡയുടെ രാഷ്ട്രീയ അജണ്ടയിൽ വീണ്ടും സ്ഥിരമായ സ്ഥാനം നേടുമോ എന്നതാണ് ഇനി ശ്രദ്ധേയമായ ചോദ്യം.
