ഓട്ടവ : അമേരിക്കയുമായുള്ള വ്യാപാര ചർച്ചകളിൽ നിന്ന് കാനഡ പിന്മാറിയത് രാഷ്ട്രീയ കാരണങ്ങളാലാണെന്ന യുഎസ് കൊമേഴ്സ് സെക്രട്ടറി ഹോവാർഡ് ലുറ്റ്നിക്കിന്റെ ആരോപണം പ്രധാനമന്ത്രി മാർക്ക് കാർണി നിഷേധിച്ചു. ചർച്ചകൾ അവസാനിച്ചതിന് പിന്നിൽ രാഷ്ട്രീയ താൽപര്യങ്ങളല്ലെന്നും, കനേഡിയൻ സമ്പദ്വ്യവസ്ഥയ്ക്കും തൊഴിലാളികൾക്കും ദോഷകരമായ വ്യവസ്ഥകൾ അംഗീകരിക്കാൻ സർക്കാർ തയ്യാറാകാത്തതാണ് കാരണമെന്നും കാർണി വ്യക്തമാക്കി.
കെബെക്കിലെ ഡേവി ഷിപ്പ്യാർഡിൽ നടത്തിയ പ്രസംഗത്തിലാണ് പ്രധാനമന്ത്രി കാനഡയുടെ നിലപാട് വിശദീകരിച്ചത്. അമേരിക്ക മുന്നോട്ടുവച്ച ചില വ്യാപാര വ്യവസ്ഥകൾ കനേഡിയൻ വ്യവസായങ്ങൾക്കും തൊഴിലാളികൾക്കും പ്രതികൂലമായ പ്രത്യാഘാതങ്ങൾ സൃഷ്ടിക്കുമെന്ന ആശങ്കയാണ് ചർച്ചകളിലെ പ്രധാന വിഷയമെന്ന് അദ്ദേഹം പറഞ്ഞു. രാജ്യത്തിന്റെ സാമ്പത്തിക താൽപര്യങ്ങളും തൊഴിലവസരങ്ങളും സംരക്ഷിക്കുന്ന കരാറിനാണ് സർക്കാർ മുൻഗണന നൽകുന്നതെന്നും കാർണി വ്യക്തമാക്കി.
അതേസമയം, അമേരിക്കയുമായുള്ള വ്യാപാര ചർച്ചകൾ പുനരാരംഭിക്കുന്നതിനുള്ള വാതിൽ കാനഡ അടച്ചിട്ടില്ലെന്നും പ്രധാനമന്ത്രി സൂചിപ്പിച്ചു. പരസ്പര ബഹുമാനത്തോടെയും ഇരുരാജ്യങ്ങളുടെയും താൽപര്യങ്ങൾ പരിഗണിച്ചുമുള്ള ചർച്ചകൾക്ക് കാനഡ തയ്യാറാണെന്ന് അദ്ദേഹം പറഞ്ഞു. എന്നാൽ, കനേഡിയൻ താൽപര്യങ്ങൾക്ക് ഹാനികരമായ വ്യവസ്ഥകൾ അംഗീകരിക്കുന്നതിൽ സർക്കാർ വിട്ടുവീഴ്ച ചെയ്യില്ലെന്നും കാർണി വ്യക്തമാക്കി.
