കോഴിക്കോട്: മാസപ്പടി കേസുമായി ബന്ധപ്പെട്ട എൻഫോഴ്സ്മെന്റ് ഡയറക്ടറേറ്റിന്റെ നടപടികളെ പരിഹസിച്ച് പി.എ മുഹമ്മദ് റിയാസ്. തങ്ങളാരും യാതൊരു തെറ്റും ചെയ്തിട്ടില്ലെന്നും ഏത് അന്വേഷണവും നേരിടാൻ തയ്യാറാണെന്നും മുഹമ്മദ് റിയാസ് പറഞ്ഞു.
ഇ ഡി തയ്യാറാക്കിയ തിരക്കഥ നല്ലതാണെന്നും അന്വേഷണത്തെ ഭയപ്പെടുന്നില്ലെന്നും അദ്ദേഹം പ്രതികരിച്ചു. അന്വേഷണം നിയമപരമായി തന്നെ നേരിടുമെന്നും രാഷ്ട്രീയ നീക്കങ്ങളെ ഒരുതരത്തിലും ഭയപ്പെടുന്നില്ലെന്നും മുഹമ്മദ് റിയാസ് വ്യക്തമാക്കി.
“ഒരു തരത്തിലുള്ള തെറ്റും ഞങ്ങളാരും ചെയ്തിട്ടില്ല. ഏത് അന്വേഷണവും നടക്കട്ടെ. അന്വേഷണത്തെ നിയമപരമായി തന്നെ നേരിടും. ഇത്തരം രാഷ്ട്രീയ നീക്കങ്ങളെ ഒരുതരത്തിലും ഭയപ്പെടുന്നില്ല,” എന്നാണ് അദ്ദേഹത്തിന്റെ പ്രതികരണം.
ഏത് തരത്തിലുള്ള അന്വേഷണം നടത്തിയാലും നിരപരാധിത്വം നിലനിൽക്കുമെന്ന ആത്മവിശ്വാസമുണ്ടെന്നും മുഹമ്മദ് റിയാസ് പറഞ്ഞു. അന്വേഷണത്തിന്റെ പേരിൽ ഭയന്നുപോയെന്ന് ആരും കരുതേണ്ടെന്നും അദ്ദേഹം കൂട്ടിച്ചേർത്തു.
അതേസമയം, ഇ ഡിയുടെ നിർദേശപ്രകാരം കേസെടുക്കണമോയെന്ന കാര്യം യുഡിഎഫ് സർക്കാർ തീരുമാനിക്കട്ടെയെന്നും മുഹമ്മദ് റിയാസ് പ്രതികരിച്ചു.
അഴിമതി നിരോധന നിയമപ്രകാരം മുഖ്യമന്ത്രി പിണറായി വിജയനെതിരെ കേസെടുക്കണമെന്നാവശ്യപ്പെട്ട് ഇ ഡി ഡിജിപിക്ക് കത്ത് നൽകിയ സംഭവത്തിൽ സിപിഎം സംസ്ഥാന സെക്രട്ടേറിയറ്റ് രാഷ്ട്രീയ വിമർശനം ഉന്നയിച്ചിരുന്നു. ഇ ഡിയുടെ നടപടി രാഷ്ട്രീയ ലക്ഷ്യത്തോടെയുള്ളതാണെന്നാണ് സിപിഎം വിലയിരുത്തൽ.
ഇ ഡി നടപടിയെ രാഷ്ട്രീയമായി പ്രതിരോധിക്കാനാണ് സിപിഎം തീരുമാനം. വിഷയത്തിൽ യുഡിഎഫ് സർക്കാർ സ്വീകരിക്കുന്ന നടപടികൾ നിരീക്ഷിച്ച ശേഷമായിരിക്കും പാർട്ടിയുടെ തുടർനീക്കങ്ങൾ.
