ടൊറന്റോ: നഗരത്തിലുണ്ടായ ബേസ്മെന്റ് അപ്പാർട്ട്മെന്റ് തീപിടിത്തത്തിൽ കുട്ടികളടക്കം നാല് പേർക്ക് പരുക്ക്. ടൊറന്റോയുടെ പടിഞ്ഞാറൻ മേഖലയിലുള്ള ബൂസ്റ്റഡ് അവന്യൂവിലെ (Boustead Avenue) ഒരു വീട്ടിലാണ് പുലർച്ചെ മൂന്ന് മണിയോടെ അപകടമുണ്ടായത്.ഡണ്ടാസ് സ്ട്രീറ്റ് വെസ്റ്റ്, ബ്ലൂർ സ്ട്രീറ്റ് വെസ്റ്റ് എന്നിവയ്ക്ക് സമീപമാണ് ഈ പ്രദേശം.
അപകടത്തിൽ ഗുരുതരമായി പൊള്ളലേറ്റ ഒരു യുവാവിനെ വിദഗ്ധ ചികിത്സയ്ക്കായി ഉടൻ തന്നെ ബേൺ സെന്ററിലേക്ക് മാറ്റി. പുക ശ്വസിച്ച് അസ്വസ്ഥതകൾ അനുഭവപ്പെട്ട മറ്റൊരു മുതിർന്ന വ്യക്തിയെയും രണ്ട് കുട്ടികളെയും പ്രാദേശിക ആശുപത്രിയിലും പ്രവേശിപ്പിച്ചു. ഇവരുടെ ആരോഗ്യനില തൃപ്തികരമാണെന്നാണ് റിപ്പോർട്ടുകൾ.
തീപിടിത്തം ഉണ്ടായ ഉടൻ തന്നെ ഫയർഫോഴ്സ് സംഘം സ്ഥലത്തെത്തി രക്ഷാപ്രവർത്തനം ആരംഭിക്കുകയും തീ പൂർണ്ണമായും നിയന്ത്രണവിധേയമാക്കുകയും ചെയ്തു. ബേസ്മെന്റിൽ നിന്നാണ് തീ പടർന്നതെന്നാണ് പ്രാഥമിക നിഗമനം. തീപിടിത്തത്തിന്റെ കൃത്യമായ കാരണം കണ്ടെത്താൻ ടൊറന്റോ ഫയർ സർവീസും പൊലീസും സംയുക്തമായി അന്വേഷണം ആരംഭിച്ചിട്ടുണ്ട്.
