ഹാലിഫാക്സ്: നോവസ്കോഷയിൽ വാടക നിരക്കുകൾ സാധാരണക്കാർക്ക് താങ്ങാനാവാത്ത വിധം കുതിച്ചുയരുന്നു. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം, കഴിഞ്ഞ വർഷം ജൂലൈ മാസത്തെ അപേക്ഷിച്ച് ഈ വർഷം ജൂലൈയിൽ മാത്രം ശരാശരി 8.7 ശതമാനത്തിന്റെ വർധനവാണ് രേഖപ്പെടുത്തിയത്.
ചരിത്രപരമായ കണക്കുകളുമായി താരതമ്യം ചെയ്യുമ്പോൾ നിലവിലെ വർധനവ് വളരെ ഉയർന്നതാണെന്ന് സാമ്പത്തിക വിദഗ്ധർ ചൂണ്ടിക്കാണിക്കുന്നു. 1998 മുതൽ 2018 വരെയുള്ള രണ്ടു പതിറ്റാണ്ടുകാലം പ്രവിശ്യയിലെ വാടക വർധനവ് കേവലം 2 ശതമാനത്തിൽ താഴെ മാത്രമായിരുന്നു. എന്നാൽ കൊവിഡിന് ശേഷം സ്ഥിതിഗതികൾ മാറിമറിഞ്ഞു. 2023 ഒക്ടോബറിൽ വാടക വർധനവ് റെക്കോർഡ് നിരക്കായ 14.6 ശതമാനത്തിൽ എത്തിയിരുന്നു. അതിനുശേഷം നിരക്കുകളിൽ നേരിയ കുറവുണ്ടായെങ്കിലും, നിലവിലുള്ള 8.7 ശതമാനം വർധനവും സാധാരണക്കാരുടെ കുടുംബ ബഡ്ജറ്റുകളെ താളംതെറ്റിക്കുന്നതാണ്.
വാടക വർധനവിലെ പ്രധാന കാരണങ്ങൾ:
ജനസംഖ്യാ വളർച്ചയും വീടുകളുടെ ക്ഷാമവും: നോവസ്കോഷയിയിലേക്ക് കുടിയേറിപ്പാർക്കുന്നവരുടെ എണ്ണത്തിൽ വൻ വർധനവാണ് ഉണ്ടാകുന്നത്. എന്നാൽ ഇതിനനുസരിച്ച് പുതിയ വീടുകളുടെ നിർമാണം നടക്കുന്നില്ല. നിലവിലുള്ള നിർമാണപ്രവർത്തനങ്ങളിൽ ഭൂരിഭാഗവും ഹാലിഫാക്സ് കേന്ദ്രീകരിച്ച് മാത്രമായതിനാൽ പ്രവിശ്യയിലെ മറ്റിടങ്ങളിൽ വീടുകൾക്ക് കടുത്ത ക്ഷാമം അനുഭവപ്പെടുന്നു.
നിയമത്തിലെ ലൂപ്പ്ഹോൾ (Tenant Turnover): പ്രവിശ്യയിൽ നിലവിലുള്ള താമസക്കാർക്ക് പ്രതിവർഷം പരമാവധി 5% മാത്രമേ വാടക വർധിപ്പിക്കാൻ പാടുള്ളൂ എന്ന നിയമമുണ്ട് (Rent Cap). എന്നാൽ, പഴയ താമസക്കാരൻ ഒഴിഞ്ഞുപോവുകയും പുതിയൊരാൾ വരികയും ചെയ്യുമ്പോൾ ഈ നിയന്ത്രണം ബാധകമല്ല. ഇത്തരത്തിൽ പുതിയതായി എത്തുന്ന വാടകക്കാരിൽ നിന്നും ഭൂവുടമകൾ വിപണി നിരക്കനുസരിച്ച് വളരെ ഉയർന്ന തുകയാണ് ഈടാക്കുന്നത്. ഇത് ശരാശരി വാടക നിരക്ക് ഉയരാൻ പ്രധാന കാരണമാകുന്നു.
പുതിയ അപ്പാർട്ടുമെന്റുകളുടെ നിർമാണം വേഗത്തിലാക്കുന്നുണ്ടെങ്കിലും, കുറഞ്ഞ വരുമാനക്കാർക്ക് താങ്ങാനാവുന്ന വിധത്തിൽ (Affordable housing) വീടുകളുടെ ക്ഷാമം പരിഹരിക്കാൻ പ്രവിശ്യാ ഭരണകൂടം കൂടുതൽ ശക്തമായ ഇടപെടലുകൾ നടത്തണമെന്നാണ് പൊതുജനങ്ങളുടെ ആവശ്യം.
