ഓട്ടവ: കനേഡിയൻ ഫെഡറൽ ജീവനക്കാർക്കായി പ്രഖ്യാപിച്ച പ്രത്യേക ഏർലി റിട്ടയർമെന്റ് പദ്ധതിയിലേക്ക് (ERI) അപേക്ഷ പ്രവാഹം. പദ്ധതി പ്രകാരം കാനഡ റവന്യൂ ഏജൻസിയിൽ (CRA) നിന്നാണ് ഏറ്റവും കൂടുതൽ ജീവനക്കാർ നേരത്തെയുള്ള വിരമിക്കലിനായി അപേക്ഷ സമർപ്പിച്ചിരിക്കുന്നത്. ട്രഷറി ബോർഡ് പുറത്തുവിട്ട ഏറ്റവും പുതിയ കണക്കുകൾ പ്രകാരം 1,552 സി.ആർ.എ ജീവനക്കാരാണ് ജോലിയിൽ നിന്ന് നേരത്തെ വിരമിക്കാൻ താല്പര്യം പ്രകടിപ്പിച്ചിട്ടുള്ളത്.
ബഡ്ജറ്റ് 2025-ന്റെ ഭാഗമായി സർക്കാർ തസ്തികകളുടെ എണ്ണം കുറയ്ക്കുന്നതിനും ഭരണപരമായ ചെലവുകൾ ചുരുക്കുന്നതിനുമായാണ് കനേഡിയൻ സർക്കാർ ഈ താൽക്കാലിക ആനുകൂല്യ പദ്ധതി കൊണ്ടുവന്നത്. വിരമിക്കൽ ആനുകൂല്യങ്ങളിൽ വലിയ കുറവുകളില്ലാതെ തന്നെ പെൻഷൻ കൈപ്പറ്റാൻ സാധിക്കുമെന്നതാണ് ജീവനക്കാരെ ഇതിലേക്ക് ആകർഷിച്ചത്.
ഏറ്റവും കൂടുതൽ അപേക്ഷകൾ ലഭിച്ച പ്രധാന സർക്കാർ വകുപ്പുകൾ
കാനഡ റവന്യൂ ഏജൻസി (CRA): 1,552 അപേക്ഷകൾ
എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ (ESDC): 1,053 അപേക്ഷകൾ
ഡിപ്പാർട്ട്മെന്റ് ഓഫ് നാഷണൽ ഡിഫൻസ് (DND): 764 അപേക്ഷകൾ
പബ്ലിക് സർവീസസ് ആൻഡ് പ്രൊക്യൂർമെന്റ് കാനഡ (PSPC): 705 അപേക്ഷകൾ
വിവിധ ഫെഡറൽ വകുപ്പുകളിൽ നിന്നായി ആകെ 10,006 അപേക്ഷകളാണ് സർക്കാരിന് ലഭിച്ചത്. ഇതിൽ 9,300-ലധികം അപേക്ഷകൾക്ക് സർക്കാർ ഇതിനകം അംഗീകാരം നൽകിക്കഴിഞ്ഞു. 69 അപേക്ഷകൾ മാത്രമാണ് സാങ്കേതിക കാരണങ്ങളാൽ നിരസിക്കപ്പെട്ടത്.ഈ പദ്ധതി വഴി വിരമിക്കാൻ അനുമതി ലഭിച്ച ജീവനക്കാരുടെ അവസാന ഔദ്യോഗിക സേവന കാലാവധി 2027 ജനുവരി 20 ആയിരിക്കുമെന്ന് അധികൃതർ വ്യക്തമാക്കി.
വൻതോതിൽ ജീവനക്കാർ ഒന്നിച്ച് വിരമിക്കുന്നത് വരും വർഷങ്ങളിൽ കാനഡയിലെ നികുതി പിരിവ് ഉൾപ്പെടെയുള്ള പൊതുസേവനങ്ങളെ എങ്ങനെ ബാധിക്കുമെന്ന ആശങ്കയും ഇതോടൊപ്പം ഉയരുന്നുണ്ട്. എങ്കിലും തസ്തികകൾ പുനഃക്രമീകരിച്ച് കാര്യക്ഷമത വർദ്ധിപ്പിക്കാനാണ് സർക്കാർ ലക്ഷ്യമിടുന്നത്.
