തിരുവനന്തപുരം: സംസ്ഥാനത്ത് മഴ മുന്നറിയിപ്പില് മാറ്റം വരുത്തി കേന്ദ്ര കാലാവസ്ഥ വകുപ്പ്. ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദത്തിന്റെ സ്വാധീനത്താല് മഴ ശക്തിപ്പെടുന്ന സാഹചര്യത്തില് ഇടുക്കി, കോട്ടയം ജില്ലകളില് ഓറഞ്ച് അലേര്ട്ട് പ്രഖ്യാപിച്ചു. ഈ ജില്ലകളില് 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെയുള്ള അതിശക്തമായ മഴയ്ക്കാണ് സാധ്യത. അതേസമയം കണ്ണൂര്, വയനാട്, എറണാകുളം, പത്തനംതിട്ട, തിരുവനന്തപുരം ജില്ലകളില് യെല്ലോ അലേര്ട്ടും പുറപ്പെടുവിച്ചിട്ടുണ്ട്.
വടക്കന് ആന്ഡമാന് കടലിനും സമീപ പ്രദേശങ്ങള്ക്കും മുകളിലായി രൂപപ്പെട്ട ചക്രവാതച്ചുഴി പടിഞ്ഞാറ്-വടക്കുപടിഞ്ഞാറ് ദിശയിലേക്ക് നീങ്ങുകയാണ്. ഇത് തിങ്കളാഴ്ചയോടെ മധ്യ-കിഴക്കന് ബംഗാള് ഉള്ക്കടലില് തീവ്ര ന്യൂനമര്ദ്ദമായും (Depression), ചൊവ്വാഴ്ച മധ്യ-പടിഞ്ഞാറന് ബംഗാള് ഉള്ക്കടലില് അതിതീവ്ര ന്യൂനമര്ദ്ദമായും (Deep Depression) ശക്തി പ്രാപിക്കാന് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നു. ഇതിന്റെ ഫലമായി വരും ദിവസങ്ങളില് കേരളത്തില് മഴ കൂടുതല് സജീവമാകും.
