ഓട്ടവ: കാനഡയുടെ ആർട്ടിഫിഷ്യൽ ഇന്റലിജൻസ് (AI) നയങ്ങൾക്ക് വേഗം പകരാൻ പുതിയ എഐ ഉപദേശക സമിതി. സമിതിയുടെ അജണ്ട നിശ്ചയിക്കുന്നതിലും പ്രവർത്തനങ്ങൾ ഏകോപിപ്പിക്കുന്നതിലും പ്രധാനമന്ത്രി മാർക്ക് കാർണി നേരിട്ട് ഇടപെടും.
വെള്ളിയാഴ്ച പ്രധാനമന്ത്രിയുടെ കാര്യാലയം (PMO) പുറത്തിറക്കിയ പ്രസ്താവനയിലാണ് പുതിയ സമിതിയുടെ പ്രവർത്തനങ്ങളെക്കുറിച്ചുള്ള വിവരങ്ങൾ വ്യക്തമാക്കിയത്. എഐയുമായി ബന്ധപ്പെട്ട വിഷയങ്ങളിൽ വിവിധ സർക്കാർ വകുപ്പുകളെ ഏകോപിപ്പിക്കുന്ന ‘ഓൾ ഓഫ് ഗവൺമെന്റ്’ സമീപനമാണ് സമിതി സ്വീകരിക്കുക.
AI സാങ്കേതികവിദ്യ അതിവേഗം വികസിക്കുന്ന സാഹചര്യത്തിൽ അതിനനുസരിച്ച് സർക്കാർ നടപടികളും വേഗത്തിലാക്കണമെന്നാണ് പ്രധാനമന്ത്രിയുടെ നിലപാട്. വിവിധ വകുപ്പുകളുടെ അധികാരപരിധികൾ തമ്മിൽ ബന്ധപ്പെടുന്ന വിഷയങ്ങളിൽ മികച്ച ഏകോപനം ഉറപ്പാക്കുകയാണ് നേരിട്ടുള്ള ഇടപെടലിലൂടെ ലക്ഷ്യമിടുന്നത്.
പ്രമുഖ AI വിദഗ്ധർ സമിതിയിൽ
കാനഡയുടെ AI പരിവർത്തനത്തിന് സ്വതന്ത്രവും പ്രായോഗികവുമായ നിർദേശങ്ങൾ നൽകുന്നതിനാണ് സമിതി രൂപീകരിച്ചത്. പ്രമുഖ എഐ ഗവേഷകനായ യോഷ്വ ബെഞ്ചിയോ, എഐ അലൈൻമെന്റ്-ഭരണ വിദഗ്ധ ഗിലിയൻ ഹാഡ്ഫീൽഡ്, ടൊറന്റോ സർവകലാശാല അസോസിയേറ്റ് പ്രൊഫസർ സഞ്ജ ഫിഡ്‌ലർ, റാഡിക്കൽ വെഞ്ചേഴ്‌സിന്റെ സഹസ്ഥാപകൻ ജോർദാൻ ജേക്കബ്സ് എന്നിവർ സമിതിയിലെ അംഗങ്ങളാണ്.
മക്കിൻസി ഉപദേഷ്ടാവ് എറിക് ലാമറെ, മുൻ ബാങ്കർ ലൂയിസ് വാക്കോൺ, മുൻ ദേശീയ സുരക്ഷാ ഉപദേഷ്ടാവ് ജോഡി തോമസ്, സെനറ്റർ തോമസ് പിറ്റ്ഫീൽഡ് എന്നിവരും സമിതിയിൽ ഉൾപ്പെടുന്നു.
‘AI ഫോർ ഓൾ’ തന്ത്രത്തിന്റെ പുരോഗതി, കാനഡയുടെ സ്വന്തം എഐ അടിസ്ഥാനസൗകര്യ വികസനം, സുരക്ഷിതമായ എഐ വിന്യാസം, ജനാധിപത്യ സംരക്ഷണം എന്നിവയിൽ സമിതി സർക്കാരിന് മാർഗനിർദേശം നൽകും.
നാലാമത്തെ AI ഉപദേശക സമിതി
ലിബറൽ സർക്കാർ രൂപീകരിക്കുന്ന നാലാമത്തെ എഐ ഉപദേശക സമിതിയാണിത്. ഇന്നൊവേഷൻ കാനഡയിലെ സാങ്കേതിക ഉപദേശക സമിതിക്ക് പുറമെ തൊഴിൽ, സാംസ്കാരിക മേഖലകളിലെ എഐയുടെ സ്വാധീനം പരിശോധിക്കുന്ന സമിതികളും നിലവിലുണ്ട്.
തൊഴിലാളി യൂണിയൻ പ്രതിനിധികളെ ഉൾപ്പെടുത്തി രൂപീകരിച്ച തൊഴിൽ ഉപദേശക സമിതിയുടെ ആദ്യ യോഗം കഴിഞ്ഞ തിങ്കളാഴ്ച എഐ മന്ത്രി ഇവാൻ സോളമന്റെ നേതൃത്വത്തിൽ ചേർന്നു. എഐ അധിഷ്ഠിത പരിവർത്തനത്തിനൊപ്പം തൊഴിലവകാശങ്ങൾ സംരക്ഷിക്കുന്നതും നൈപുണ്യ പരിശീലനം ഉറപ്പാക്കുന്നതുമായിരുന്നു പ്രധാന ചർച്ചകൾ.
സാംസ്കാരിക മന്ത്രി മാർക്ക് മില്ലറുടെ നേതൃത്വത്തിൽ രൂപീകരിച്ച കൾച്ചറൽ എഐ കൗൺസിലും രാജ്യത്തെ സർഗാത്മക മേഖലയുടെ വളർച്ചയും സംരക്ഷണവും ലക്ഷ്യമിട്ട് പ്രവർത്തിക്കുന്നുണ്ട്.
