ന്യൂ ഓര്‍ലീന്‍സ്: അമേരിക്കയിലെ വടക്കന്‍ ഗള്‍ഫ് തീരത്തേക്ക് ‘ഐസയാസ്’ കൊടുങ്കാറ്റ് അടുക്കുന്നു. ഈ ആഴ്ചയുടെ അവസാനത്തോടെ മേഖലയില്‍ കനത്ത മഴയ്ക്കും ശക്തമായ കാറ്റിനും സാധ്യതയുണ്ടെന്നും വാരാന്ത്യത്തോടെ കൊടുങ്കാറ്റ് കരതൊടുമെന്നുമാണ് കാലാവസ്ഥാ പ്രവചനം. അറ്റ്‌ലാന്റിക് സമുദ്രത്തില്‍ നിലനില്‍ക്കുന്ന ശക്തമായ എല്‍ നിനോ പ്രതിഭാസം കൊടുങ്കാറ്റുകളുടെ രൂപീകരണത്തെ ഒരുപരിധി വരെ പ്രതിരോധിക്കുന്നുണ്ടെങ്കിലും, ഗള്‍ഫ് മേഖലയിലെ സമുദ്രജലത്തിലെ ഉയര്‍ന്ന ചൂട് ഐസയാസിന് ശക്തി പകരാന്‍ കാരണമാകുന്നുണ്ടെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നു.
കഴിഞ്ഞ 72 മണിക്കൂറിനുള്ളില്‍ കൂടുതല്‍ ശക്തിപ്രാപിച്ച ഐസയാസ് വെള്ളിയാഴ്ചയോടെ ലൂസിയാനയുടെ തെക്കുകിഴക്കന്‍ മേഖലയിലേക്ക് എത്തിയേക്കും. കാറ്റഗറി 2 ഗ്രേഡിലുള്ള കൊടുങ്കാറ്റായിട്ടാകും ഇത് കരയിലേക്ക് കടക്കുക. നിലവിലെ കാലാവസ്ഥാ വ്യതിയാനങ്ങള്‍ പ്രകാരം മൂന്ന് സാധ്യതകളാണ് പ്രവചിക്കപ്പെടുന്നതെങ്കിലും, ശക്തമായ കാറ്റും കനത്ത മഴയും രൂക്ഷമായ കടലാക്രമണവും ഉണ്ടാകാനാണ് കൂടുതല്‍ സാധ്യത.
അലബാമ, ജോര്‍ജിയ, ഫ്‌ലോറിഡ പാന്‍ഹാന്‍ഡില്‍, തെക്കുകിഴക്കന്‍ ലൂസിയാന, മിസിസിപ്പി എന്നീ പ്രദേശങ്ങളാണ് പ്രധാനമായും കനത്ത മഴയുടെ ഭീഷണിയിലുള്ളത്. വെള്ളിയാഴ്ചയോടെ തീരപ്രദേശങ്ങളില്‍ ആരംഭിക്കുന്ന മഴ വാരാന്ത്യത്തോടെ കൂടുതല്‍ ഉള്ളിലേക്ക് വ്യാപിക്കും. ചില പ്രദേശങ്ങളില്‍ പെട്ടെന്നുള്ള വെള്ളപ്പൊക്കത്തിനും (Flash Floods) സാധ്യതയുണ്ട്. ആഗോള കാലാവസ്ഥാ വ്യതിയാനത്തിന്റെ ഭാഗമായി സമുദ്രോപരിതലത്തിലെ ചൂട് കൂടുന്നത് ഇത്തരത്തിലുള്ള ഉഷ്ണമേഖലാ കൊടുങ്കാറ്റുകളില്‍ മഴയുടെ അളവും കാറ്റിന്റെ വേഗതയും വര്‍ദ്ധിപ്പിക്കാന്‍ കാരണമാകുന്നുണ്ടെന്ന് ശാസ്ത്രജ്ഞര്‍ ചൂണ്ടിക്കാണിക്കുന്നു.
