കാല്‍ഗറി: ആല്‍ബര്‍ട്ട പ്രവിശ്യയില്‍ എഡ്യൂക്കേഷന്‍ പ്രോപ്പര്‍ട്ടി ടാക്‌സ് നിരക്കുകള്‍ ഏകീകരിക്കാനും കുറയ്ക്കാനും സര്‍ക്കാര്‍ തീരുമാനിച്ചു. 2027-ലെ ബജറ്റ് മുതല്‍ നടപ്പിലാക്കുന്ന പുതിയ നിരക്കുകള്‍ തുടര്‍ച്ചയായി മൂന്ന് വര്‍ഷത്തേക്ക് മാറ്റമില്ലാതെ തുടരുമെന്ന് പ്രീമിയര്‍ ഡാനിയല്‍ സ്മിത്ത് വെള്ളിയാഴ്ച കാല്‍ഗറിയില്‍ നടന്ന പ്രഖ്യാപനത്തില്‍ വ്യക്തമാക്കി. പ്രവിശ്യയിലെ എല്ലാ മുനിസിപ്പാലിറ്റികളിലും ഒരുപോലെ സുതാര്യവും കൃത്യവുമായ നികുതി വ്യവസ്ഥ ഉറപ്പാക്കുന്നതിനൊപ്പം വസ്തു ഉടമകള്‍ക്ക് ഏകദേശം 100 ദശലക്ഷം ഡോളറിന്റെ സാമ്പത്തിക ഇളവ് നല്‍കാനും ഈ നീക്കം ലക്ഷ്യമിടുന്നു.
ധനമന്ത്രി ജെയ്‌സണ്‍ നിക്‌സണ്‍ വ്യക്തമാക്കിയതനുസരിച്ച്, 2027 മുതല്‍ താമസസ്ഥലങ്ങള്‍ക്കും കൃഷിഭൂമികള്‍ക്കും 1,000 ഡോളര്‍ മൂല്യത്തിന് $2.65 നിരക്കിലും, വാണിജ്യേതര വസ്തുക്കള്‍ക്ക് 1,000 ഡോളര്‍ മൂല്യത്തിന് $3.975 നിരക്കിലുമായിരിക്കും നികുതി ഈടാക്കുക. നിലവില്‍ ഓരോ നഗരത്തിലും വ്യത്യസ്ത നിരക്കുകളായതിനാല്‍ നികുതി ബില്ലുകള്‍ മനസ്സിലാക്കാന്‍ ബുദ്ധിമുട്ടായിരുന്നു. പുതിയ മാറ്റമനുസരിച്ച് നികുതി നിരക്ക് കുറയുന്നതോടെ വസ്തു ഉടമകള്‍ക്ക് സാമ്പത്തിക ബാധ്യത കുറയും. എന്നാല്‍ പുതിയ നിരക്ക് മൂലം ചില പ്രദേശങ്ങളില്‍ നികുതി കൂടാന്‍ സാധ്യതയുണ്ടെങ്കില്‍, അത് പരിഹരിക്കാന്‍ 2027-ല്‍ ഒരു ഒറ്റത്തവണ ‘ട്രാന്‍സിഷന്‍ ടാക്‌സ് ക്രെഡിറ്റ്’ നല്‍കുമെന്നും സ്മിത്ത് അറിയിച്ചു.
ഈ തീരുമാനത്തെ കാല്‍ഗറി മേയര്‍ ജെറോമി ഫാര്‍കാസ്, എഡ്മണ്ടണ്‍ മേയര്‍ ആന്‍ഡ്രൂ നാക്ക് എന്നിവര്‍ സ്വാഗതം ചെയ്തു. തദ്ദേശ സ്ഥാപനങ്ങള്‍ ബജറ്റ് തയ്യാറാക്കുമ്പോള്‍ കൂടുതല്‍ വ്യക്തത ലഭിക്കാന്‍ ഇത് സഹായിക്കുമെന്ന് അവര്‍ അഭിപ്രായപ്പെട്ടു. എന്നാല്‍, പ്രതിപക്ഷ കക്ഷിയായ എന്‍.ഡി.പി (NDP) നേതാവ് നാഹിദ് നെന്‍ഷി ഈ പ്രഖ്യാപനത്തെ വിമര്‍ശിച്ചു. മുന്‍വര്‍ഷങ്ങളില്‍ വരുത്തിയ വലിയ നികുതി വര്‍ദ്ധനവിന് മുന്നില്‍ ഈ ഇളവ് വളരെ ചെറുതാണെന്ന് അദ്ദേഹം ആരോപിച്ചു. കൂടാതെ, അല്‍ബെര്‍ട്ട മുനിസിപ്പാലിറ്റീസ് ഓര്‍ഗനൈസേഷനും തങ്ങളുടെ പൂര്‍ണ്ണമായ അതൃപ്തി രേഖപ്പെടുത്തിയിട്ടുണ്ട്.
