ഓട്ടവ: കാനഡ-യു.എസ് വ്യാപാര ചര്‍ച്ചകളില്‍ അനിശ്ചിതത്വം തുടരുന്നതിനിടയില്‍, ആഗോള വ്യാപാര ചര്‍ച്ചകള്‍ വേഗത്തിലാക്കി കാനഡ. അമേരിക്കയ്ക്ക് പുറത്തുള്ള രാജ്യങ്ങളുമായി സാമ്പത്തിക ബന്ധം വ്യാപിപ്പിക്കാനും വിദേശ നിക്ഷേപം ആകര്‍ഷിക്കാനുമുള്ള നീക്കങ്ങള്‍ ശക്തമാക്കുകയാണ് കാനഡ. ഇതിന്റെ ഭാഗമായി വിവിധ അന്താരാഷ്ട്ര ഉച്ചകോടികളും വ്യാപാര ചര്‍ച്ചകളും വരും ആഴ്ചകളില്‍ നടക്കും.
കഴിഞ്ഞ ദിവസം കാനഡയും യു.എ.ഇയും തമ്മില്‍ പുതിയ തന്ത്രപ്രധാന പങ്കാളിത്തം പ്രഖ്യാപിച്ചു. വെറും 47 ദിവസത്തിനുള്ളില്‍ സമഗ്രമായ സാമ്പത്തിക പങ്കാളിത്ത കരാറാണ് രൂപീകരിച്ചതെന്നും, കാനഡയുടെ ഔദ്യോഗിക സംവിധാനങ്ങളെപ്പോലും അത് അത്ഭുതപ്പെടുത്തുന്നതാണെന്നും പ്രധാനമന്ത്രി മാര്‍ക്ക് കാര്‍ണി വ്യക്തമാക്കി.
വ്യാപാര പങ്കാളിത്തം വ്യാപിപ്പിക്കുന്നതിനായി കാനഡ സമീപകാലത്തായി നിരവധി നിര്‍ണായക സന്ദര്‍ശനങ്ങളും അന്താരാഷ്ട്ര കൂടിക്കാഴ്ചകളുമാണ് നടത്തിയത്. മാര്‍ക്ക് കാര്‍ണിയുടെ സമീപകാല നയതന്ത്ര പര്യടനങ്ങളുടെ വിവരങ്ങള്‍:
ഒക്ടോബര്‍ 21-24: തുര്‍ക്കി സന്ദര്‍ശനം
ഒക്ടോബര്‍ 26-27: അബുദാബി കിരീടാവകാശിയുടെ ഓട്ടവ സന്ദര്‍ശനം
ഒക്ടോബര്‍ 29-30: മണ്‍ട്രിയോളില്‍ കാനഡ-ഇയു ഉച്ചകോടി നടന്നു.
നവംബര്‍ 2 മുതല്‍ 4 വരെ ആന്റിഗ്വ, ബാര്‍ബുഡ എന്നീ രാജ്യങ്ങള്‍ സന്ദര്‍ശിക്കുന്ന കാര്‍ണി, ഫിലിപ്പീന്‍സില്‍ നടക്കുന്ന ആസിയാന്‍ ഉച്ചകോടിയിലും (നവംബര്‍ 16-18), ചൈനയില്‍ നടക്കുന്ന എപെക് ഉച്ചകോടിയിലും (നവംബര്‍ 18-19) പങ്കെടുക്കുമെന്നാണ് പ്രതീക്ഷിക്കുന്നത്. ഇതിനുപുറമെ, ഡിസംബര്‍ 11-12 തീയതികളില്‍ ഇന്ത്യന്‍ പ്രധാനമന്ത്രി കാനഡ സന്ദര്‍ശിക്കുമെന്നും ഔദ്യോഗിക കേന്ദ്രങ്ങള്‍ അറിയിക്കുന്നു.
ഇന്ത്യന്‍ പ്രധാനമന്ത്രിയുടെ ഡിസംബറിലെ സന്ദര്‍ശനത്തിന് മുന്നോടിയായി ഇരുരാജ്യങ്ങളും തമ്മിലുള്ള സ്വതന്ത്ര വ്യാപാര കരാര്‍ അന്തിമഘട്ടത്തിലെത്തുമെന്ന് കാനഡയിലെ ഇന്ത്യന്‍ ഹൈക്കമ്മീഷണര്‍ ദിനേശ് കെ. പട്‌നായിക് പ്രത്യാശ പ്രകടിപ്പിച്ചു. നിയമപരമായ പരിശോധനകള്‍ മാത്രമാണ് ഇനി അവശേഷിക്കുന്നതെന്നും കരാര്‍ ഉടന്‍ സാധ്യമാകുമെന്നും അദ്ദേഹം കൂട്ടിച്ചേര്‍ത്തു.
അതേസമയം, സര്‍ക്കാരിന്റെ പ്രഖ്യാപനങ്ങളെ വിമര്‍ശിച്ച് പ്രതിപക്ഷം രംഗത്തെത്തി. അന്താരാഷ്ട്ര ഉച്ചകോടികളും ഫോട്ടോ സെഷനുകളും കൊണ്ട് മാത്രം കാനഡയിലെ ജനങ്ങള്‍ക്ക് പ്രയോജനമുണ്ടാകില്ലെന്ന് കണ്‍സര്‍വേറ്റീവ് പാര്‍ട്ടി നേതാവ് പിയറി പൊയ്‌ലിവ്‌റെ വിമര്‍ശിച്ചു. കേവലം കരാറുകളുടെ എണ്ണം കൂട്ടാനാണോ സര്‍ക്കാര്‍ ശ്രമിക്കുന്നതെന്ന് അന്താരാഷ്ട്ര വ്യാപാര വിദഗ്ദ്ധനായ സ്റ്റുവര്‍ട്ട് ട്രൂവും സംശയം പ്രകടിപ്പിച്ചു.
അടുത്ത അഞ്ച് വര്‍ഷത്തിനുള്ളില്‍ 1 ട്രില്യണ്‍ ഡോളറിന്റെ വിദേശ നിക്ഷേപം ആകര്‍ഷിക്കുക എന്ന ലക്ഷ്യത്തോടെയാണ് കാര്‍ണി സര്‍ക്കാര്‍ മുന്നോട്ട് പോകുന്നത്. ചൊവ്വാഴ്ച അവതരിപ്പിക്കുന്ന ഫെഡറല്‍ ബജറ്റില്‍ ഇതിനായുള്ള പ്രത്യേക പദ്ധതികള്‍ ഉള്‍പ്പെടുത്തിയേക്കും. എങ്കിലും, പ്രധാന പങ്കാളിയായ അമേരിക്കയുമായുള്ള വ്യാപാര തര്‍ക്കങ്ങളില്‍ ഇതുവരെ നിര്‍ണ്ണായകമായ ഒരു പരിഹാരത്തില്‍ എത്താന്‍ കാനഡയ്ക്ക് സാധിച്ചിട്ടില്ല.
