ഓട്ടവ: കാനഡയിൽ ജനിക്കുന്ന എല്ലാ നവജാത ശിശുക്കൾക്കും ഹെപ്പറ്റൈറ്റിസ് ബി വാക്സിൻ നൽകണമെന്ന് നാഷണൽ അഡ്വൈസറി കമ്മിറ്റി ഓൺ ഇമ്മ്യൂണൈസേഷൻ (NACI) ശുപാർശ ചെയ്തു. കുട്ടികൾക്ക് സ്കൂൾ പ്രായത്തിൽ വാക്സിൻ നൽകുന്നതിന് പകരം ജനിച്ച് ആദ്യ മാസങ്ങളിൽ തന്നെ പ്രതിരോധ കുത്തിവയ്പ്പ് നൽകണമെന്നാണ് സമിതിയുടെ നിർദേശം. രാജ്യത്തെ എല്ലാ കുട്ടികൾക്കും ഒരേ രീതിയിൽ രോഗപ്രതിരോധം ഉറപ്പാക്കുകയാണ് ലക്ഷ്യം.
പുതിയ ശുപാർശ പ്രകാരം കുഞ്ഞ് ജനിച്ച് ആദ്യ 24 മണിക്കൂറിനുള്ളിലോ അല്ലെങ്കിൽ രണ്ട് മാസം പ്രായമാകുമ്പോൾ നൽകുന്ന ആദ്യ വാക്സിനേഷൻ ഘട്ടത്തിലോ ഹെപ്പറ്റൈറ്റിസ് ബി വാക്സിൻ നൽകാം. ഡിഫ്തീരിയ, ടെറ്റനസ്, വില്ലൻചുമ, പോളിയോ തുടങ്ങിയ രോഗങ്ങൾക്കെതിരായ വാക്സിനുകൾ നൽകുന്ന സമയത്ത് തന്നെ ഹെപ്പറ്റൈറ്റിസ് ബി വാക്സിനും നൽകാനാകും.
നവജാത ശിശുക്കൾക്ക് രോഗസാധ്യത കൂടുതൽ
കരളിനെ ബാധിക്കുന്ന വൈറസ് രോഗമാണ് ഹെപ്പറ്റൈറ്റിസ് ബി. നവജാത ശിശുക്കളിൽ വൈറസ് ബാധയുണ്ടായാൽ അത് വിട്ടുമാറാത്ത രോഗാവസ്ഥയായി മാറാനുള്ള സാധ്യത കൂടുതലാണെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു. ചികിത്സ ലഭിക്കാതെ ദീർഘകാലം തുടരുന്ന അണുബാധ കരൾ സിറോസിസ്, കരൾ കാൻസർ തുടങ്ങിയ ഗുരുതര ആരോഗ്യപ്രശ്നങ്ങളിലേക്ക് നയിക്കാം.
രക്തത്തിലൂടെയും ശരീരദ്രവങ്ങളിലൂടെയുമാണ് വൈറസ് പ്രധാനമായും പകരുന്നത്. പ്രസവസമയത്ത് അമ്മയിൽ നിന്ന് കുഞ്ഞിലേക്ക് അണുബാധ പകരാം. രക്തത്തിന്റെ അംശം പുരണ്ട നഖം വെട്ടുന്ന ഉപകരണങ്ങൾ പോലുള്ളവ പങ്കുവെക്കുന്നതിലൂടെയും രോഗബാധയുണ്ടാകാം. എന്നാൽ ആലിംഗനം, ചുംബനം, ഒരുമിച്ച് ഭക്ഷണം കഴിക്കൽ, പാത്രങ്ങൾ പങ്കിടൽ തുടങ്ങിയ സാധാരണ ഇടപെടലുകളിലൂടെ ഹെപ്പറ്റൈറ്റിസ് ബി പകരില്ല.
ചില വിഭാഗങ്ങളിൽ രോഗബാധാ നിരക്ക് കൂടുതൽ
കാനഡയിൽ പൊതുവെ ഹെപ്പറ്റൈറ്റിസ് ബി ബാധിതരുടെ നിരക്ക് കുറവാണെങ്കിലും വിദേശരാജ്യങ്ങളിൽ നിന്ന് എത്തിയ ചില വിഭാഗങ്ങളിൽ രോഗബാധ കൂടുതലാണെന്ന് NACI ചൂണ്ടിക്കാട്ടുന്നു. പ്രത്യേകിച്ച് രോഗവ്യാപനം കൂടുതലുള്ള രാജ്യങ്ങളിൽ നിന്നുള്ളവരിൽ കൂടുതൽ ജാഗ്രത ആവശ്യമാണ്.
ഗർഭിണികളിൽ ഹെപ്പറ്റൈറ്റിസ് ബി പരിശോധന നടത്താറുണ്ടെങ്കിലും പരിശോധന, രോഗനിർണയം, തുടർചികിത്സ എന്നിവയിൽ ചില പോരായ്മകൾ ഇപ്പോഴും നിലനിൽക്കുന്നുണ്ടെന്നാണ് ആരോഗ്യപ്രവർത്തകരുടെ വിലയിരുത്തൽ.
പ്രവിശ്യകളിൽ വാക്സിനേഷൻ രീതിയിൽ വ്യത്യാസം
കാനഡയിലെ വിവിധ പ്രവിശ്യകളിൽ ഹെപ്പറ്റൈറ്റിസ് ബി വാക്സിൻ നൽകുന്ന പ്രായത്തിൽ വ്യത്യാസമുണ്ട്. ബ്രിട്ടീഷ് കൊളംബിയ, ആൽബർട്ട, കെബെക്, പ്രിൻസ് എഡ്വേഡ് ഐലൻഡ് തുടങ്ങിയ പ്രദേശങ്ങളിൽ നവജാത ശിശുക്കൾക്ക് വാക്സിൻ നൽകുന്നുണ്ട്.
അതേസമയം ഒന്റാരിയോ, മാനിറ്റോബ, സസ്കാച്വാൻ, നോവസ്കോഷ, ന്യൂഫിൻലൻഡ് ആൻഡ് ലബ്രഡോർ തുടങ്ങിയ പ്രവിശ്യകളിൽ കുട്ടികൾക്ക് ആറാം ക്ലാസ് അല്ലെങ്കിൽ ഏഴാം ക്ലാസ് എത്തുമ്പോഴാണ് വാക്സിൻ നൽകുന്നത്.
പുതിയ ശുപാർശ നടപ്പിലാക്കുന്നതിലൂടെ പ്രവിശ്യകൾക്കിടയിലെ വാക്സിനേഷൻ രീതികളിലുള്ള വ്യത്യാസം കുറയ്ക്കാനും എല്ലാ കുട്ടികൾക്കും തുല്യമായ രോഗപ്രതിരോധ സംരക്ഷണം ഉറപ്പാക്കാനും കഴിയുമെന്നാണ് സമിതിയുടെ പ്രതീക്ഷ.
മാറ്റം നടപ്പിലാക്കാൻ പ്രവിശ്യകൾക്ക് സമയം
പുതിയ വാക്സിനേഷൻ ഷെഡ്യൂളിലേക്ക് മാറാൻ പ്രവിശ്യകൾക്ക് ആവശ്യമായ സമയം അനുവദിക്കുമെന്ന് NACI വ്യക്തമാക്കി. ഇതുമായി ബന്ധപ്പെട്ട് പ്രവിശ്യാ അധികൃതരുമായി കൂടിയാലോചനകൾ നടത്തിയ ശേഷമായിരിക്കും മാറ്റങ്ങൾ നടപ്പിലാക്കുക.
മാറ്റത്തിന്റെ കാലയളവിൽ മുതിർന്ന കുട്ടികൾക്കുള്ള നിലവിലെ വാക്സിനേഷൻ പദ്ധതികൾ തുടരും. കാനഡയിൽ ഇതുവരെ നടപ്പിലാക്കിയ ഹെപ്പറ്റൈറ്റിസ് ബി വാക്സിനേഷൻ പരിപാടികൾ രോഗവ്യാപനം കുറയ്ക്കുന്നതിൽ ഫലപ്രദമായിരുന്നുവെന്നും അധികൃതർ വ്യക്തമാക്കി.
