ടെഹ്റാൻ: പശ്ചിമേഷ്യയിൽ തുടരുന്ന സംഘർഷാവസ്ഥയ്ക്ക് അറുതിവരുത്താൻ ഇറാൻ പ്രതിജ്ഞാബദ്ധമാണെന്ന് പാർലമെന്റ് സ്പീക്കർ മുഹമ്മദ് ബാഖർ ഖാലിബാഫ്. ‘യുദ്ധവുമില്ല, സമാധാനവുമില്ല’ എന്ന അനിശ്ചിതാവസ്ഥ അവസാനിപ്പിക്കുമെന്നും അതിനായി ശക്തമായ പ്രതിരോധ നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.
പശ്ചിമേഷ്യൻ സംഘർഷത്തിൽ അമേരിക്ക സ്വീകരിക്കുന്ന നിലപാട് കാപട്യം നിറഞ്ഞതാണെന്ന് ഇറാൻ ആരോപിച്ചു. യുദ്ധം നീണ്ടുനിൽക്കണമെന്ന താൽപര്യമാണ് ഇസ്രയേലിനുള്ളതെന്നും ഇറാൻ കുറ്റപ്പെടുത്തി. നയതന്ത്ര ചർച്ചകൾക്കൊപ്പം ശക്തമായ പ്രതിരോധത്തിലൂടെയും നിലവിലെ സാഹചര്യം മാറ്റാൻ കഴിയുമെന്നാണ് ഇറാന്റെ നിലപാട്.
അമേരിക്കയ്ക്ക് ഇറാന്റെ ശക്തമായ മുന്നറിയിപ്പ്
അമേരിക്ക വീണ്ടും ഇറാനെ ആക്രമിച്ചാൽ ശക്തമായ തിരിച്ചടി നേരിടേണ്ടിവരുമെന്ന് ഇറാൻ സുരക്ഷാ വൃത്തങ്ങൾ മുന്നറിയിപ്പ് നൽകി. യൂറോപ്പിലുൾപ്പെടെ വിവിധ മേഖലകളിലുള്ള അമേരിക്കൻ സൈനിക താവളങ്ങൾ ലക്ഷ്യമിടാൻ ഇറാൻ തയ്യാറാകുമെന്നാണ് മുന്നറിയിപ്പ്.
ഇതിനിടെ, 60 ശതമാനം വരെ സമ്പുഷ്ടീകരിച്ച യുറേനിയത്തിന്റെ ശേഖരം മൂന്നാമതൊരു രാജ്യത്തേക്ക് മാറ്റണമെന്ന അമേരിക്കയുടെ നിർദേശം ഇറാൻ തള്ളിയതായി സുരക്ഷാ വൃത്തങ്ങൾ അറിയിച്ചു. ഇറാന്റെ ആണവപദ്ധതിയുമായി ബന്ധപ്പെട്ട ചർച്ചകളിൽ ഈ വിഷയം പ്രധാന തർക്കവിഷയമായി തുടരുകയാണ്.
ഇറാനെതിരെ ട്രംപിന്റെ മുന്നറിയിപ്പ്
ഇറാൻ ആണവായുധം സ്വന്തമാക്കുന്നത് അനുവദിക്കില്ലെന്ന് അമേരിക്കൻ പ്രസിഡന്റ് ഡോണൾഡ് ട്രംപ് വീണ്ടും മുന്നറിയിപ്പ് നൽകി. ഇറാനിൽ കൂടുതൽ നാശനഷ്ടങ്ങൾ വരുത്തേണ്ട സാഹചര്യം ഉണ്ടാകില്ലെന്നാണ് പ്രതീക്ഷയെന്നും അദ്ദേഹം പറഞ്ഞു.
അമേരിക്ക ഇതിനകം തകർത്ത കെട്ടിടങ്ങളും മറ്റ് അടിസ്ഥാന സൗകര്യങ്ങളും പുനർനിർമിക്കാൻ ഇറാന് വലിയ ശ്രമം വേണ്ടിവരുമെന്നും ട്രംപ് പരിഹസിച്ചു.
അമേരിക്കയും ഇറാനും തമ്മിലുള്ള പരസ്പര മുന്നറിയിപ്പുകൾ ശക്തമാകുന്നതിനിടെ പശ്ചിമേഷ്യയിലെ സംഘർഷാവസ്ഥയ്ക്ക് നയതന്ത്ര പരിഹാരം കണ്ടെത്താനാകുമോയെന്ന ആശങ്കയും വർധിക്കുകയാണ്.
