ശ്രീനഗർ: ജമ്മു കശ്മീരിലെ കിഷ്ത്വാർ ജില്ലയിൽ സൈന്യത്തിനൊപ്പം പട്രോളിങ്ങിൽ ഏർപ്പെട്ടിരുന്ന രണ്ട് സ്പെഷ്യൽ പൊലീസ് ഓഫീസർമാരെ കാണാതായി. ഇവരെ കണ്ടെത്തുന്നതിനായി സൈന്യം, സി.ആർ.പി.എഫ്, പൊലീസ് എന്നിവ സംയുക്തമായി തിരച്ചിൽ ശക്തമാക്കി.
കിഷ്ത്വാർ ജില്ലയിലെ മർവാർ മേഖലയിലാണ് സംഭവം. 17 രാഷ്ട്രീയ റൈഫിൾസിനൊപ്പം പട്രോളിങ് നടത്തുന്നതിനിടെ ഇന്നലെ ഉച്ചയോടെയാണ് ഉദ്യോഗസ്ഥരെ കാണാതായത്. ബസാന മേഖലയിലെ താൽക്കാലിക ക്യാമ്പിലേക്ക് പോകുന്നതിനിടെയാണ് ഇരുവരും അപ്രത്യക്ഷരായതെന്നാണ് റിപ്പോർട്ടുകൾ.
ആയുധങ്ങളുമായാണ് കാണാതായത്
ദച്ചൻ സ്വദേശികളായ യഷ്പാൽ കുമാർ, ബബി ചന്ദ് എന്നിവരാണ് കാണാതായ സ്പെഷ്യൽ പൊലീസ് ഉദ്യോഗസ്ഥർ. ഇരുവരുടെയും കൈവശം ആയുധങ്ങളുണ്ടായിരുന്നതായാണ് വിവരം.
കാണാതായതിന് തൊട്ടുപിന്നാലെ ഇവരുടെ മൊബൈൽ ഫോണുകളിൽ ബന്ധപ്പെടാൻ കഴിഞ്ഞിരുന്നെങ്കിലും പിന്നീട് ഫോണുകൾ സ്വിച്ച് ഓഫ് ആയി. ഉദ്യോഗസ്ഥരെ കാണാതായ സമയത്ത് കിഷ്ത്വാർ, ദച്ചൻ മേഖലകളിൽ വെടിയൊച്ച കേട്ടിരുന്നതായി പ്രദേശവാസികൾ അറിയിച്ചിട്ടുണ്ട്.
ഭീകരസാന്നിധ്യമുള്ള മേഖലയിൽ തിരച്ചിൽ
കാണാതായി മണിക്കൂറുകൾ പിന്നിട്ടിട്ടും ഉദ്യോഗസ്ഥരെക്കുറിച്ച് വ്യക്തമായ വിവരങ്ങളൊന്നും ലഭിച്ചിട്ടില്ല. രാത്രി വൈകിയും തുടർന്ന സംയുക്ത തിരച്ചിൽ ഇന്ന് രാവിലെയോടെ കൂടുതൽ ശക്തമാക്കി.
ഭീകരസംഘടനയായ ഹിസ്ബുൽ മുജാഹിദീന് മുൻകാലങ്ങളിൽ ശക്തമായ സാന്നിധ്യമുണ്ടായിരുന്ന മേഖലയാണ് കിഷ്ത്വാർ. ഉദ്യോഗസ്ഥരെ കാണാതായ സാഹചര്യത്തിൽ പ്രദേശത്ത് സുരക്ഷാ പരിശോധനകളും തിരച്ചിൽ നടപടികളും ഊർജിതമാക്കിയിട്ടുണ്ട്. സംഭവത്തിന് പിന്നിലെ സാഹചര്യം വ്യക്തമാക്കുന്നതിനും കാണാതായ ഉദ്യോഗസ്ഥരെ കണ്ടെത്തുന്നതിനുമുള്ള അന്വേഷണം തുടരുകയാണ്.
