ഓട്ടവ: ശത്രു ഡ്രോണുകള് ഉയര്ത്തുന്ന ഭീഷണികളെ നേരിടാന് സ്ഫോടനങ്ങളോ നേരിട്ടുള്ള കൂട്ടിയിടികളോ ഇല്ലാതെ തന്നെ ഡ്രോണുകളെ തകര്ക്കാന് കഴിയുന്ന നൂതന ഇന്റര്സെപ്റ്റര് മിസൈലുമായി ഓട്ടവ ആസ്ഥാനമായുള്ള പ്രതിരോധ കമ്പനി രംഗത്ത്. എ.ഐ.ആര് ഷെയര് (A.I.RShare) വികസിപ്പിച്ചെടുത്ത ഈ മിസൈലിനെ ലോകത്തിലെ ഏറ്റവും സൗഹൃദപരമായ മിസൈല് എന്നാണ് കമ്പനി വിശേഷിപ്പിക്കുന്നത്.
ഓവര്വാച്ച് (Overwatch) എന്ന് പേരിട്ടിരിക്കുന്ന ഈ ഇന്റര്സെപ്റ്റര് മിസൈലുകള് ശബ്ദത്തേക്കാള് വേഗത്തില് സഞ്ചരിച്ച ശേഷം, പ്രത്യേകതരം ലാറ്റക്സ് നാരുകളുടെ ഒരു മേഘം ആകാശത്ത് സൃഷ്ടിച്ചാണ് ഡ്രോണുകളെ പ്രവര്ത്തനരഹിതമാക്കുന്നത്. ഡ്രോണുകള്ക്ക് ആകാശത്ത് പറന്നുയരാന് ആവശ്യമായ ലിഫ്റ്റ് (lift) ഇല്ലാതാക്കുകയാണ് ഈ സാങ്കേതികവിദ്യയിലൂടെ ചെയ്യുന്നതെന്ന് കമ്പനി സ്ഥാപകനും സിഇഒയുമായ റിക്ക് വിറ്റേക്കര് (Rick Whittaker) വ്യക്തമാക്കി. മിസൈലില് നിന്ന് പുറന്തള്ളുന്ന കാസ്പര് ലിഫ്റ്റ് ഡിസ്റപ്റ്ററുകള് (Casper lift disruptors) എന്നറിയപ്പെടുന്ന ലാറ്റക്സ് നാരുകള് 60 അടി ചുറ്റളവില് വായുവില് തങ്ങിനില്ക്കുകയും സാവധാനം താഴേക്ക് പതിക്കുകയും ചെയ്യും. ഇതിലൂടെ കടന്നുപോകുന്ന ഡ്രോണുകളുടെ പ്രൊപ്പല്ലറുകളില് ഈ നാരുകള് കുടുങ്ങുകയും എയര് ഇന്ടേക്ക് ബ്ലോക്ക് ആവുകയും ചെയ്യുന്നതോടെ ഡ്രോണ് നിയന്ത്രണം വിട്ട് താഴെ വീഴുന്നു.

20,000 ഡോളര് വിലയുള്ള ഒരു ഡ്രോണ് തകര്ക്കാന് ഒരു ദശലക്ഷം ഡോളര് ചെലവുള്ള പരമ്പരാഗത മിസൈലുകള് ഉപയോഗിക്കുന്നത് സാമ്പത്തികമായി പ്രായോഗികമല്ലെന്ന് വിറ്റേക്കര് ചൂണ്ടിക്കാട്ടി. ജനവാസ മേഖലകള്ക്ക് മുകളില് വെച്ച് ഡ്രോണുകള് സ്ഫോടനത്തിലൂടെ തകര്ക്കുന്നത് വലിയ അപകടങ്ങള്ക്ക് കാരണമാകും എന്നതിനാല് കുറഞ്ഞ ചെലവിലും സുരക്ഷിതമായും ഡ്രോണുകളെ വീഴ്ത്താന് കഴിയുന്ന സംവിധാനമാണ് സൈന്യത്തിന് ആവശ്യം.
ഏകദേശം ഒരു കിലോഗ്രാം മാത്രം ഭാരമുള്ള ഈ മിസൈലുകള്ക്ക് മാക് 1.4 വേഗതയില് നാല് കിലോമീറ്റര് ദൂരപരിധിയിലുള്ള ലക്ഷ്യങ്ങളെ തകര്ക്കാന് സാധിക്കും. ഒരു ട്യൂബില് നിന്ന് വിക്ഷേപിക്കാന് കഴിയുന്ന രീതിയിലാണ് ഇവ രൂപകല്പ്പന ചെയ്തിരിക്കുന്നത്. നിലവില് അമേരിക്കയിലും യുദ്ധമേഖലകള് ഉള്പ്പെടെയുള്ള മറ്റ് വിദേശ രാജ്യങ്ങളിലും കമ്പനിക്ക് ഉപഭോക്താക്കളുണ്ട്. ആഴ്ചയില് ഏകദേശം 50 യൂണിറ്റുകള് വീതമാണ് കമ്പനി കയറ്റുമതി ചെയ്യുന്നത്.
ഏഴാം തലമുറ സാങ്കേതികവിദ്യയിലേക്ക് എത്തിയ ഈ മിസൈലുകള് 40 അടി ഷിപ്പിംഗ് കണ്ടെയ്നറിനുള്ളില് വെച്ച് പോലും അതിവേഗം നിര്മ്മിച്ചെടുക്കാന് സാധിക്കുമെന്നത് വിതരണ ശൃംഖലയിലെ പ്രതിസന്ധികള് പരിഹരിക്കാന് സഹായിക്കും. പ്രത്യേക 3D പ്രിന്റിംഗ് സാങ്കേതികവിദ്യ ഉപയോഗിക്കുന്നതിനാല് ആഴ്ചയുടെ തുടക്കത്തില് രൂപകല്പ്പന ചെയ്യുന്ന ഭാഗങ്ങള് നിര്മ്മിച്ച് ആഴ്ചാവസാനത്തോടെ പരീക്ഷിക്കാന് സാധിക്കുന്നുണ്ടെന്ന് മിസൈല് ആന്ഡ് ഫയര് കണ്ട്രോള് എന്ജിനീയറായ ലൂക്ക് സ്കിന്നര് (Luke Skinner) പറഞ്ഞു.
കനേഡിയന് സര്ക്കാരിന്റെ പിന്തുണയോടെ ഓട്ടവയിലെ പ്രവര്ത്തനങ്ങള് കൂടുതല് വിപുലീകരിക്കാനും അന്താരാഷ്ട്ര വിപണിയില് സാന്നിധ്യം ശക്തമാക്കാനും ഒരുങ്ങുകയാണ് എ.ഐ.ആര് ഷെയര്.
