Thursday, November 19, 2026

B.Cയില്‍ കാറിനുള്ളില്‍ കത്തിക്കരിഞ്ഞ നിലയില്‍ ഇന്ത്യന്‍ യുവാവിന്റെ മൃതദേഹം; ആസൂത്രിത കൊലപാതകമെന്ന് പൊലീസ്

വന്‍കൂവര്‍: ബ്രിട്ടീഷ് കൊളംബിയയിലുള്ള ലാംഗ്ലിയില്‍ (Langley) കത്തിക്കരിഞ്ഞ കാറിനുള്ളില്‍ 25-കാരനായ ഇന്ത്യന്‍ യുവാവിന്റെ മൃതദേഹം കണ്ടെത്തിയ സംഭവത്തില്‍ പോലീസ് അന്വേഷണം ഊര്‍ജ്ജിതമാക്കി. സറേയില്‍ താമസിച്ചിരുന്ന തുഷാര്‍ ശര്‍മ്മയാണ് കൊല്ലപ്പെട്ടതെന്ന് അന്വേഷണ സംഘം തിരിച്ചറിഞ്ഞു. ഇതൊരു ആസൂത്രിത കൊലപാതകമാണെന്നാണ് പ്രാഥമിക അന്വേഷണത്തില്‍ പോലീസ് സംശയിക്കുന്നത്.

കഴിഞ്ഞ മാസം ഒക്ടോബര്‍ 29-ന് രാത്രി 10.30-ഓടെ ലാംഗ്ലിയിലെ റോളിന്‍സണ്‍ ക്രസന്റ് (Rawlinosn Crescent) മേഖലയില്‍ ഒരു വാഹനത്തിന് തീപിടിച്ചതായി വിവരം ലഭിച്ചതിനെ തുടര്‍ന്നാണ് അഗ്‌നിശമന സേനയും പോലീസും സ്ഥലത്തെത്തിയത്. തീയണയ്ക്കുന്നതിനിടെയാണ് വാഹനത്തിനുള്ളില്‍ കത്തിക്കരിഞ്ഞ നിലയില്‍ മനുഷ്യാവശിഷ്ടങ്ങള്‍ കണ്ടെത്തിയത്. തുടര്‍ന്ന് കേസ് ഇന്റഗ്രേറ്റഡ് ഹോമിസൈഡ് ഇന്‍വെസ്റ്റിഗേഷന്‍ ടീം (IHIT) ഏറ്റെടുക്കുകയായിരുന്നു. ചൊവ്വാഴ്ച (നവംബര്‍ 17) പുറത്തിറക്കിയ പൊതു അറിയിപ്പിലാണ് മരിച്ചത് തുഷാര്‍ ശര്‍മ്മയാണെന്ന് പോലീസ് ഔദ്യോഗികമായി സ്ഥിരീകരിച്ചത്.

തെളിവ് നശിപ്പിക്കാന്‍ കാര്‍ കത്തിച്ചെന്ന് സംശയം

തുഷാര്‍ ശര്‍മ്മയുടെ മരണം യാദൃശ്ചികമല്ലെന്നും, അദ്ദേഹത്തെ മനഃപൂര്‍വ്വം കൊലപ്പെടുത്തിയ ശേഷം തെളിവുകള്‍ നശിപ്പിക്കുന്നതിനായി കാറിന് തീയിട്ടതാകാമെന്നുമാണ് പോലീസിന്റെ പ്രാഥമിക നിഗമനം. എന്നാല്‍, കൊലപാതകത്തിന് പിന്നിലെ കാരണമെന്താണെന്നോ പ്രതികള്‍ ആരാണെന്നോ പോലീസ് ഇതുവരെ വെളിപ്പെടുത്തിയിട്ടില്ല.തുഷാര്‍ ശര്‍മ്മയ്ക്ക് ക്രിമിനല്‍ പശ്ചാത്തലമില്ലെന്നും കാനഡയില്‍ അദ്ദേഹത്തിന് വളരെ പരിമിതമായ സൗഹൃദങ്ങള്‍ മാത്രമേ ഉണ്ടായിരുന്നുള്ളൂ എന്നും അന്വേഷണ ഉദ്യോഗസ്ഥര്‍ വ്യക്തമാക്കി. മരണത്തിന് തൊട്ടുമുമ്പുള്ള ദിവസങ്ങളില്‍ അദ്ദേഹം എവിടെയൊക്കെ പോയി എന്നും ആരെയൊക്കെ കണ്ടു എന്നും കണ്ടെത്താനുള്ള ശ്രമത്തിലാണ് പോലീസ്. ഇതിന്റെ ഭാഗമായി കാനഡയിലെയും ഇന്ത്യയിലെയും അദ്ദേഹത്തിന്റെ കുടുംബാംഗങ്ങളുമായും പരിചയക്കാരുമായും അന്വേഷണ സംഘം സംസാരിച്ചുവരികയാണ്.

ഇന്ത്യന്‍ കോണ്‍സുലേറ്റ് ഇടപെട്ടു

തുഷാര്‍ ശര്‍മ്മയുടെ ദാരുണമായ മരണത്തില്‍ വന്‍കൂവറിലെ ഇന്ത്യന്‍ കോണ്‍സുലേറ്റ് ജനറല്‍ അഗാധമായ ദുഃഖം രേഖപ്പെടുത്തി. അദ്ദേഹത്തിന്റെ കുടുംബാംഗങ്ങളുമായും പ്രാദേശിക പോലീസ് അധികാരികളുമായും കോണ്‍സുലേറ്റ് നിരന്തരം ബന്ധപ്പെടുന്നുണ്ടെന്നും കേസിന്റെ പുരോഗതി സൂക്ഷ്മമായി നിരീക്ഷിച്ചുവരികയാണെന്നും ഇന്ത്യന്‍ മിഷന്‍ ‘എക്‌സിലൂടെ’ (X) അറിയിച്ചു. ഒക്ടോബര്‍ 29-ന് മുമ്പ് തുഷാര്‍ ശര്‍മ്മയെ കണ്ടവരോ അദ്ദേഹത്തിന്റെ നീക്കങ്ങളെക്കുറിച്ച് എന്തെങ്കിലും വിവരം ലഭിച്ചവരോ അന്വേഷണ സംഘവുമായി ബന്ധപ്പെടണമെന്ന് കനേഡിയന്‍ പോലീസ് അഭ്യര്‍ത്ഥിച്ചിട്ടുണ്ട്. സംഭവദിവസം പ്രദേശത്തെ സിസിടിവി ദൃശ്യങ്ങളോ ഡാഷ്‌ക്യാം വീഡിയോകളോ ഉള്ളവര്‍ അത് കൈമാറണമെന്നും പോലീസ് നിര്‍ദ്ദേശിച്ചു.

Advertisement

Stay Connected
16,985FansLike
2,458FollowersFollow
61,453SubscribersSubscribe
Must Read
Related News
error: Content is protected !!