ഹാലിഫാക്സ്: ആഗോള സുരക്ഷാ വെല്ലുവിളികളും ഭൗമരാഷ്ട്രീയ സാഹചര്യങ്ങളും ചർച്ച ചെയ്യുന്നതിനായി ലോകത്തിന്റെ വിവിധ ഭാഗങ്ങളിൽ നിന്നുള്ള പ്രതിരോധ വിദഗ്ധരും നയതന്ത്ര നേതാക്കളും നോവസ്കോഷയിലെ ഹാലിഫാക്സിൽ ഒത്തുചേർന്നു. എഴുപതിലധികം രാജ്യങ്ങളിൽ നിന്നുള്ള പ്രതിനിധികൾ പങ്കെടുക്കുന്ന 18-ാമത് ഹാലിഫാക്സ് ഇന്റർനാഷണൽ സെക്യൂരിറ്റി ഫോറത്തിന് (HISF) തുടക്കമായി. മൂന്ന് ദിവസം നീളുന്ന സമ്മേളനത്തിൽ കാനഡയുടെ ആഭ്യന്തരവും അന്താരാഷ്ട്രവുമായ പ്രതിരോധ ഉത്തരവാദിത്തങ്ങൾക്കൊപ്പം നിലവിലെ ആഗോള സുരക്ഷാ സാഹചര്യങ്ങളും വിശദമായി ചർച്ച ചെയ്യും.
നയരൂപീകരണ വിദഗ്ധരിലേക്ക് മികച്ച ആശയങ്ങളും നിർദേശങ്ങളും എത്തിക്കുകയാണ് സമ്മേളനത്തിന്റെ പ്രധാന ലക്ഷ്യമെന്ന് ഫോറം പ്രസിഡന്റ് പീറ്റർ വാൻ പ്രാഗ് വ്യക്തമാക്കി. പ്രതിരോധ മേഖലയിൽ കാനഡ ചരിത്രപരമായ നിക്ഷേപങ്ങളാണ് നടത്തിവരുന്നതെന്നും രാജ്യത്തിന്റെ വ്യാവസായിക ശേഷി പുനർനിർമിക്കുന്നതിനൊപ്പം സഖ്യകക്ഷികളുമായുള്ള സഹകരണം ശക്തിപ്പെടുത്തുകയാണെന്നും സമ്മേളനം ഉദ്ഘാടനം ചെയ്ത കനേഡിയൻ പ്രതിരോധ മന്ത്രി ഡേവിഡ് മക്ഗിന്റി പറഞ്ഞു.
രാജ്യത്തെ സൈനിക കേഡറ്റ് പ്രോഗ്രാമുകളിൽ വെട്ടിക്കുറവ് വരുത്തുമെന്ന റിപ്പോർട്ടുകളും മന്ത്രി തള്ളി. കഴിഞ്ഞ മൂന്ന് വർഷത്തിനിടെ കേഡറ്റ് പ്രസ്ഥാനത്തിൽ ചേരുന്നവരുടെ എണ്ണത്തിൽ 59 ശതമാനം വർധനയുണ്ടായതായും ഈ വർഷം ഏകദേശം 265 മില്യൺ കനേഡിയൻ ഡോളർ പദ്ധതിക്കായി വകയിരുത്തിയതായും അദ്ദേഹം വ്യക്തമാക്കി.
കാനഡയും അമേരിക്കയും തമ്മിലുള്ള വ്യാപാര-നികുതി തർക്കങ്ങൾ ഇരുരാജ്യങ്ങളും തമ്മിലുള്ള ബന്ധത്തിൽ വിള്ളലുകൾ സൃഷ്ടിച്ച പശ്ചാത്തലത്തിലാണ് ഇത്തവണത്തെ സുരക്ഷാ ഫോറം നടക്കുന്നത്. അഞ്ച് വർഷത്തോളമായി തുടരുന്ന റഷ്യ-യുക്രെയ്ൻ യുദ്ധവും സമ്മേളനത്തിലെ പ്രധാന ചർച്ചാവിഷയങ്ങളിലൊന്നാണ്. അന്താരാഷ്ട്ര സംവിധാനങ്ങളെ റഷ്യ വെല്ലുവിളിക്കുന്ന സാഹചര്യത്തിൽ യുക്രെയ്നിൽ നടക്കുന്ന സംഭവവികാസങ്ങൾ കാനഡയുടെ സുരക്ഷയെയും നേരിട്ട് ബാധിക്കുന്നതാണെന്ന് പീറ്റർ വാൻ പ്രാഗ് അഭിപ്രായപ്പെട്ടു.

അതിനിടെ, വ്യാഴാഴ്ച ചൈനയിലെ ഷെൻഷെനിൽ അമേരിക്കൻ പ്രസിഡന്റ് ഡോണൾഡ് ട്രംപ്, റഷ്യൻ പ്രസിഡന്റ് വ്ലാഡിമിർ പുടിൻ, ചൈനീസ് പ്രസിഡന്റ് ഷി ജിൻപിങ് എന്നിവർ നടത്തിയ കൂടിക്കാഴ്ചയും സമ്മേളനത്തിൽ പങ്കെടുക്കുന്നവർക്കിടയിൽ ചർച്ചകൾക്ക് വഴിവെച്ചിട്ടുണ്ട്. ആഗോള ശക്തികൾ തമ്മിലുള്ള ബന്ധത്തിലും അന്താരാഷ്ട്ര സുരക്ഷാ ക്രമീകരണങ്ങളിലും ഈ കൂടിക്കാഴ്ച സൃഷ്ടിക്കാവുന്ന പ്രത്യാഘാതങ്ങളും നിരീക്ഷകർ വിലയിരുത്തുന്നു.
അതേസമയം, ട്രംപ് ഭരണകൂടത്തിന്റെ പ്രതിനിധികളാരും ഇത്തവണത്തെ സുരക്ഷാ ഫോറത്തിൽ പങ്കെടുക്കാത്തത് രാഷ്ട്രീയ നിരീക്ഷകർക്കിടയിൽ വിമർശനങ്ങൾക്ക് ഇടയാക്കിയിട്ടുണ്ട്. വിമർശനങ്ങൾ നേരിടുന്നത് ഒഴിവാക്കാനാണ് അമേരിക്കൻ പ്രതിനിധികൾ സമ്മേളനത്തിൽ നിന്ന് വിട്ടുനിൽക്കുന്നതെന്ന് ഡൽഹൗസി സർവകലാശാലയിലെ ഇന്റർനാഷണൽ ഡെവലപ്മെന്റ് സ്റ്റഡീസ് പ്രൊഫസർ റോബർട്ട് ഹുയിഷ് വിലയിരുത്തി. ഇറാനുമായുള്ള യുദ്ധത്തിൽ പലതവണ വിജയം പ്രഖ്യാപിച്ചിട്ടും ട്രംപ് ഭരണകൂടം ഇപ്പോഴും പ്രതിസന്ധി നേരിടുകയാണെന്നും അദ്ദേഹം വിമർശിച്ചു.
യുദ്ധങ്ങളും നയതന്ത്ര സംഘർഷങ്ങളും മാത്രമല്ല, ആഗോള ഭക്ഷ്യസുരക്ഷയും ഇത്തവണത്തെ സമ്മേളനത്തിലെ പ്രധാന ചർച്ചാവിഷയമാണ്. ലോകത്തിന്റെ വിവിധ ഭാഗങ്ങളിലേക്ക് ഭക്ഷ്യവസ്തുക്കൾ തടസ്സമില്ലാതെ എത്തിക്കുന്നതിന് ഹോർമുസ് കടലിടുക്ക്, പനാമ കനാൽ, ജിബ്രാൾട്ടർ കടലിടുക്ക് തുടങ്ങിയ തന്ത്രപ്രധാനമായ കപ്പൽപാതകളുടെ സുരക്ഷ ഉറപ്പാക്കേണ്ടതിന്റെ ആവശ്യകതയും വിദഗ്ധർ ചർച്ച ചെയ്യും. ആഗോള വ്യാപാരത്തെയും ഭക്ഷ്യവിതരണ ശൃംഖലയെയും ബാധിക്കുന്ന സുരക്ഷാ വെല്ലുവിളികൾക്ക് കൂട്ടായ പരിഹാരം കണ്ടെത്തുകയാണ് സമ്മേളനത്തിന്റെ ലക്ഷ്യം.
