Sunday, November 22, 2026

നെതന്യാഹുവിന്റെ ലിക്കുഡ് പാർട്ടിയെയും ചർച്ചയ്ക്ക് ക്ഷണിച്ച് ഐസൻകോട്ട്

ഇസ്രയേലിൽ പുതിയ സർക്കാർ രൂപീകരിക്കാനുള്ള ശ്രമങ്ങളുടെ ഭാഗമായി പ്രധാനമന്ത്രി ബെഞ്ചമിൻ നെതന്യാഹുവിന്റെ ലിക്കുഡ് പാർട്ടിയെ ചർച്ചയ്ക്ക് ക്ഷണിച്ച് ഗാദി ഐസൻകോട്ട്. ഐസൻകോട്ടിന്റെ യഷാർ പാർട്ടിയാണ് ലിക്കുഡ് പ്രതിനിധികളെ മുന്നണി ചർച്ചകൾക്കായി ക്ഷണിച്ചത്. ഞായറാഴ്ച മുതൽ വിപുലമായ ചർച്ചകൾ നടത്താനാണ് തീരുമാനം.

പുതിയ സർക്കാർ രൂപീകരിക്കുന്നതിനുള്ള എല്ലാ സാധ്യതകളും പരിശോധിക്കുകയാണ് ലക്ഷ്യമെന്ന് യഷാർ പാർട്ടി പ്രസ്താവനയിൽ വ്യക്തമാക്കി. കഴിയുന്നത്ര വിശാലമായ സർക്കാർ രൂപീകരിക്കാനുള്ള ആത്മാർഥമായ ശ്രമത്തിന്റെ ഭാഗമായാണ് നീക്കമെന്നും പാർട്ടി അറിയിച്ചു.

ഒക്ടോബർ 27ന് നടന്ന തിരഞ്ഞെടുപ്പിൽ ഒരു രാഷ്ട്രീയ മുന്നണിക്കും വ്യക്തമായ ഭൂരിപക്ഷം ലഭിച്ചിരുന്നില്ല. ഇതോടെയാണ് പുതിയ സർക്കാർ രൂപീകരിക്കാനുള്ള ചുമതല മുൻ സൈനിക മേധാവി കൂടിയായ ഐസൻകോട്ടിനെ പ്രസിഡന്റ് ഐസക് ഹെർസോഗ് ഏൽപ്പിച്ചത്. ഡിസംബർ ആറുവരെ 28 ദിവസമാണ് ഇതിനായി അനുവദിച്ചിരിക്കുന്നത്. ആവശ്യമെങ്കിൽ 14 ദിവസം കൂടി നീട്ടാനാകും.

അതേസമയം, നെതന്യാഹുവിനെ പ്രധാനമന്ത്രിയാക്കാത്ത ഐക്യസർക്കാരിനെയാണ് മുൻ പ്രധാനമന്ത്രി നഫ്താലി ബെന്നറ്റ് പിന്തുണയ്ക്കുന്നത്. ഐസൻകോട്ടിന്റെ നേതൃത്വത്തിലുള്ള സയണിസ്റ്റ് ഐക്യസർക്കാരിന് പിന്തുണ നൽകുമെന്നും നെതന്യാഹുവിന്റെ മുന്നണിയിൽ ചേരില്ലെന്നും ബെന്നറ്റ് വ്യക്തമാക്കിയിട്ടുണ്ട്.

നെതന്യാഹുവിന്റെ ലിക്കുഡ് പാർട്ടിയുമായി ചർച്ചയ്ക്ക് തയ്യാറായെങ്കിലും പ്രധാനമന്ത്രി സ്ഥാനത്തെക്കുറിച്ചുള്ള ഐസൻകോട്ടിന്റെ നിലപാട് നിർണായകമാകും. ലിക്കുഡുമായി ചേരുന്ന ഐക്യസർക്കാരിലും പ്രധാനമന്ത്രി സ്ഥാനം തനിക്കായിരിക്കണമെന്നാണ് ഐസൻകോട്ടിന്റെ നിലപാടെന്ന് റിപ്പോർട്ടുകളുണ്ട്.

ഇസ്രയേലിലെ രാഷ്ട്രീയ അനിശ്ചിതത്വം അവസാനിപ്പിച്ച് പുതിയ സർക്കാർ രൂപീകരിക്കാനുള്ള ചർച്ചകൾക്ക് ഈ നീക്കം വഴിയൊരുക്കുമോയെന്നാണ് ഇനി ശ്രദ്ധിക്കപ്പെടുന്നത്. എന്നാൽ ചർച്ചകൾക്കൊടുവിൽ സർക്കാർ രൂപീകരണം ഉറപ്പായിട്ടില്ല.

Advertisement

Stay Connected
16,985FansLike
2,458FollowersFollow
61,453SubscribersSubscribe
Must Read
Related News
error: Content is protected !!