വാൻകൂവർ : കനത്ത മഴയും ശക്തമായ കാറ്റും തുടരുന്ന തെക്കുപടിഞ്ഞാറൻ ബ്രിട്ടിഷ് കൊളംബിയയുടെ ചില ഭാഗങ്ങളിൽ പ്രത്യേക കാലാവസ്ഥാ മുന്നറിയിപ്പ് തുടരുന്നു. വാൻകൂവർ ഐലൻഡിലെ കെന്നഡി ലേക്കിൽ കഴിഞ്ഞ 24 മണിക്കൂറിനുള്ളിൽ 132 മില്ലിമീറ്റർ മഴ പെയ്തതായി എൻവയൺമെന്റ് കാനഡ അറിയിച്ചു.
ലോവർ മെയിൻലാൻഡിലും തെക്കുപടിഞ്ഞാറൻ ബിസിയിലും 102 മില്ലീമീറ്റർ മഴയും റും മിഷൻ, പോർട്ടോ കോവ്, പിറ്റ് മെഡോസ് എന്നിവിടങ്ങളിൽ യഥാക്രമം 97, 91, 90 മില്ലിമീറ്റർ മഴ പെയ്തു. വാൻകൂവർ ഐലൻഡിന്റെ വടക്കേ അറ്റത്തുള്ള സാർട്ടൈൻ ദ്വീപിൽ മണിക്കൂറിൽ 150 കിലോമീറ്ററും ഹൈദ ഗ്വായിലെ സാൻഡ്‌സ്പിറ്റിൽ മണിക്കൂറിൽ 115 കിലോമീറ്ററും വേഗതയിൽ കാറ്റ് വീശിയതായി കാലാവസ്ഥ ഏജൻസി അറിയിച്ചു.
കനത്ത മഴയെ തുടർന്ന് തെക്കുപടിഞ്ഞാറൻ ബ്രിട്ടിഷ് കൊളംബിയയിലെ പല പ്രധാന റോഡ്‌വേകളിലും വെള്ളം കെട്ടിനിന്ന് നാശം വിതച്ചു. റിച്ച്‌മണ്ടിലെ ഹൈവേ 99, പോർട്ട് കോക്വിറ്റ്‌ലാമിലെ ഹൈവേ 7B, സറേയിലെ ഹൈവേ 1 എന്നിവിടങ്ങളിൽ ചെറിയ വെള്ളപ്പൊക്കം ഉണ്ടായതായി റിപ്പോർട്ടുകൾ ഉണ്ട്. കൂടാതെ കനത്ത മഴ മൂലം ലിറ്റണിന് തെക്ക് ഫ്രേസർ കാന്യോണിലെ ഹൈവേ 1 ന്റെ ഒരു ഭാഗം അടച്ചിരുന്നു. ഫ്രേസർ വാലിയിലും ഫ്രേസർ കാന്യോണിലും മഴ മുന്നറിയിപ്പുകൾ നിലവിലുണ്ട്.
ഗ്രേറ്റർ വിക്ടോറിയ, കോക്വിറ്റ്‌ലാം, ടെക്‌സാഡ ഐലൻഡ് എന്നിവിടങ്ങളിൽ വൈദ്യുതി ലൈനുകളിൽ മരം വീണതിനെ തുടർന്ന് വൈദ്യുതി നഷ്ടപ്പെട്ടതായി ബിസി ഹൈഡ്രോ റിപ്പോർട്ട് ചെയ്തു. തെക്ക് പടിഞ്ഞാറൻ ബിസിയിൽ മറ്റ് നിരവധി തകരാറുകൾ സംഭവിച്ചിട്ടുണ്ട്.
മെട്രോ വാൻകൂവർ, സൗത്ത് കോസ്റ്റ്, ലോവർ ഫ്രേസർ മേഖലകളിൽ വെള്ളപ്പൊക്ക മുന്നറിയിപ്പ് തുടരുന്നതായി ബിസി റിവർ ഫോർകാസ്റ്റ് സെന്റർ അറിയിച്ചു.
