ഓട്ടവ : ഏറ്റവും പുതിയ എക്സ്പ്രസ് എൻട്രി നറുക്കെടുപ്പിൽ ഫ്രഞ്ച് ഭാഷാ പ്രാവീണ്യമുള്ള 7,500 ഉദ്യോഗാർത്ഥികൾക്ക് ഇൻവിറ്റേഷൻ നൽകി ഇമിഗ്രേഷൻ റെഫ്യൂജീസ് ആൻഡ് സിറ്റിസൺഷിപ്പ് കാനഡ (ഐആർസിസി). ഏറ്റവും കുറഞ്ഞ സമഗ്ര റാങ്കിംഗ് സിസ്റ്റം (CRS) സ്‌കോർ 379 ഉള്ള അപേക്ഷകരെയാണ് ഈ നറുക്കെടുപ്പിനായി പരിഗണിച്ചത്. 2024 ഫെബ്രുവരി 29-ന് ശേഷമുള്ള ഏതൊരു എക്സ്പ്രസ് എൻട്രി നറുക്കെടുപ്പിൻ്റെയും ഏറ്റവും കുറഞ്ഞ CRS കട്ട്-ഓഫ് സ്‌കോറാണിത്.
ഇന്നത്തെ നറുക്കെടുപ്പ് ഈ മാസത്തിലെ നാലാമത്തെയും ഈ ആഴ്‌ചയിലെ രണ്ടാമത്തെയുമാണ്. മാർച്ച് 17-ന് പ്രൊവിൻഷ്യൽ നോമിനി പ്രോഗ്രാം (പിഎൻപി) നറുക്കെടുപ്പും മാസത്തിൻ്റെ തുടക്കത്തിലെ ഫ്രഞ്ച് ഭാഷാ പ്രാവീണ്യ എക്സ്പ്രസ് എൻട്രി നറുക്കെടുപ്പും നടന്നിരുന്നു. ഈ വർഷം ഇതുവരെ, എക്സ്പ്രസ് എൻട്രി നറുക്കെടുപ്പിലൂടെ മൊത്തം 30,683 ഉദ്യോഗാർത്ഥികൾക്ക് ഐആർസിസി ഇൻവിറ്റേഷൻ നൽകിയിട്ടുണ്ട്.
