ടൊറൻ്റോ : വരണ്ട കാലാവസ്ഥയെ തുടർന്ന് വടക്കുപടിഞ്ഞാറൻ ഒൻ്റാരിയോയിൽ നിരവധി കാട്ടുതീകൾ നിയന്ത്രണാതീതമായി കത്തിപ്പടരുന്നു. കൂടാതെ മേഖലയിലെ കാട്ടുതീകളുടെ എണ്ണം വർധിച്ചതായി പ്രവിശ്യാ പ്രകൃതിവിഭവ, വനം മന്ത്രാലയം അറിയിച്ചു. ജൂലൈ 17-ന് വൈകുന്നേരത്തോടെ ഈ മേഖലയിൽ നാല് പുതിയ കാട്ടുതീകൾ കൂടി സ്ഥിരീകരിച്ചു. ഷാർപ്പ് ലേക്കിന് സമീപമുള്ള റെഡ് ലേക്ക് 112 പുതിയ തീപിടുത്തങ്ങളിൽ ഉൾപ്പെടുന്നു. കൂടാതെ കെനോറ സെക്ടറിലെ കെനോറ 45, 46, 47 എന്നിവയാണ് മൂന്ന് പുതിയ തീപിടിത്തങ്ങൾ. ഈ മൂന്നെണ്ണവും റോജർ ലേക്കിന് ചുറ്റുമുള്ള പ്രദേശത്താണ് പടരുന്നത്. ഇതോടെ വടക്കുപടിഞ്ഞാറൻ മേഖലയിലുടനീളം നിലവിൽ ആകെ തീപിടിത്തങ്ങളുടെ എണ്ണം 51 ആയി ഉയർന്നു. അവയിൽ 14 എണ്ണം നിയന്ത്രണത്തിലല്ല. തീപിടുത്ത സാഹചര്യങ്ങൾ നിരീക്ഷിക്കുന്നത് തുടരുകയും പ്രാദേശിക നിയന്ത്രണങ്ങൾ പരിശോധിക്കാനും ബാധിത പ്രദേശങ്ങൾ ഒഴിവാക്കാനും പൊതുജനങ്ങൾ ശ്രദ്ധിക്കണമെന്ന് മന്ത്രാലയം നിർദ്ദേശിച്ചു.
അതേസമയം ഫോർട്ട് ഫ്രാൻസെസ്, തണ്ടർ ബേ, നിപിഗൺ സെക്ടറുകളിൽ കാട്ടുതീ അപകടം കുറവാണ്. എന്നാൽ, റെഡ് ലേക്കിന് സമീപമുള്ള പ്രദേശങ്ങളിൽ തീപിടിത്ത സാധ്യത കൂടുതലാണെന്നും മന്ത്രാലയം അറിയിച്ചു. തീപിടുത്തങ്ങളിൽ, റെഡ് ലേക്ക് 62 ഒരു പ്രധാന കേന്ദ്രബിന്ദുവായി തുടരുന്നു. 31,367 ഹെക്ടർ വിസ്തൃതിയിൽ വ്യാപിച്ചുകിടക്കുന്ന ഈ തീ നിയന്ത്രണാതീതമാണ്.
