മിസ്സിസാഗ : സീറോ മലബാർ കത്തോലിക്കാ സഭ മിസ്സിസാഗ രൂപതയുടെ പത്താം വാർഷികാഘോഷം നാളെ (സെപ്റ്റംബർ 20 ശനിയാഴ്ച) വിവിധ പരിപാടികളോടെ സമാപിക്കും. മിസ്സിസാഗ സെൻ്റ് അൽഫോൻസാ സീറോ മലബാർ കത്തീഡ്രലിലാണ് സമാപന ചടങ്ങുകൾ സംഘടിപ്പിച്ചിരിക്കുന്നത്. നാളെ രാവിലെ ഒമ്പത് മണിക്ക് മേജർ ആർച്ച് ബിഷപ്പ് മാർ റാഫേൽ തട്ടിലിന്‍റെ മുഖ്യകാർമ്മികത്വത്തിൽ നടക്കുന്ന വിശുദ്ധ കുർബാനയോട് കൂടി സമാപന ചടങ്ങുകൾ ആരംഭിക്കും. ചടങ്ങിൽ ടൊറൻ്റോ അതിരൂപത ആർച്ച് ബിഷപ്പ് കർദിനാൾ ഫ്രാൻസിസ് ലിയോ, ഷിക്കാഗോ രൂപതയുടെ പ്രഥമ മെത്രാൻ മാർ ജേക്കബ് അങ്ങാടിയാത്ത്, ടൊറൻ്റോ യുക്രെയ്ൻ കാത്തലിക് രൂപത അധ്യക്ഷൻ മാർ ബ്രയാൻ ബയ്ടാ, മിസ്സിസാഗ രൂപതാ അധ്യക്ഷൻ മാർ ജോസ് കല്ലുവേലി തുടങ്ങിയവർ മുഖ്യാതിഥികളായിരിക്കും.
വിശുദ്ധ കുർബാനയ്ക്കും തുടർന്ന് നടക്കുന്ന സമാപന സമ്മേളനത്തിലും അമ്പതോളം വൈദികരും കാനഡയുടെ വിവിധ ഭാഗങ്ങളിൽ നിന്നുള്ള രാഷ്ട്രീയ സാമൂഹിക സാംസ്കാരിക നേതാക്കന്മാരും വിവിധ ഇടവകകളിൽ നിന്നുള്ള പ്രതിനിധികളും പങ്കെടുക്കും. ചടങ്ങിൽ രൂപതയുടെ പത്ത് വർഷത്തെ പ്രവർത്തനങ്ങളെക്കുറിച്ചുള്ള പ്രത്യേക അവതരണവും തുടർന്ന് സ്നേഹവിരുന്നും ഒരുക്കിയിട്ടുണ്ടെന്ന് സംഘാടകർ അറിയിച്ചു.
