എഡ്മിന്റൻ : വടക്കൻ ആൽബർട്ടയിൽ ജൂനിയർ ഹോക്കി താരങ്ങൾ സഞ്ചരിച്ചിരുന്ന ബസ് അപകടത്തിൽപ്പെട്ട് നിരവധി പേർക്ക് പരുക്കേറ്റു. ഡിസംബർ 12 വെള്ളിയാഴ്ച പുലർച്ചെ എഡ്മിന്റനിൽ നിന്നും ഏകദേശം 140 കിലോമീറ്റർ അകലെ അതബാസ്കയിലെ മഞ്ഞുമൂടിയ ഹൈവേ-2 ലാണ് അപകടമുണ്ടായത്. 15 മുതൽ 19 വയസ്സ് വരെ പ്രായമുള്ള, പ്രാദേശിക ജൂനിയർ എ ഹോക്കി ടീമായ അതബാസ്ക റിവർമെൻ അംഗങ്ങൾ സഞ്ചരിച്ചിരുന്ന ബസ് നിയന്ത്രണം നഷ്ടപ്പെട്ട് ഹൈവേയിൽ നിന്നും തെന്നിമാറി കുഴിയിലേക്ക് മറിയുകയായിരുന്നു. വെള്ളിയാഴ്ച വൈകുന്നേരം നടക്കാനിരുന്ന മത്സരത്തിൽ പങ്കെടുക്കാൻ റിവർമെൻ ടീം തെക്കൻ ആൽബർട്ടയിലേക്ക് പോകുകയായിരുന്നു. മത്സരം റദ്ദാക്കി.
ബസിലുണ്ടായിരുന്ന നിരവധി പേർക്ക് പരുക്കേറ്റിട്ടുണ്ട്. ഇവരിൽ രണ്ടു ജൂനിയർ എ ഹോക്കി കളിക്കാരും ഉൾപ്പെടുന്നു. ഇരുവരെയും എഡ്മിന്റനിലെ ആശുപത്രിയിൽ പ്രവേശിപ്പിച്ചു. ബസിലുണ്ടായിരുന്ന മറ്റുള്ളവർക്ക് ചെറിയ പരുക്കുകളോ വേദനയോ റിപ്പോർട്ട് ചെയ്തു. അവർക്ക് സംഭവസ്ഥലത്ത് തന്നെ ചികിത്സ നൽകി. അപകടസമയത്ത് പ്രദേശത്തെ താപനില ഏകദേശം മൈനസ് 37 ഡിഗ്രി സെൽഷ്യസായിരുന്നു. കൂടാതെ പ്രദേശത്തെ റോഡുകൾ ഭാഗികമായി മഞ്ഞും ഐസും കൊണ്ട് മൂടപ്പെട്ടിരുന്നുവെന്ന് ആർസിഎംപി അറിയിച്ചു. റോഡിന്റെ മോശം അവസ്ഥയാണ് അപകടത്തിന് കാരണമെന്ന് കരുതുന്നു. അന്വേഷണം ആരംഭിച്ചു.
