ടൊറൻ്റോ : ഗ്രേറ്റർ ടൊറൻ്റോയിലും തെക്കൻ ഒൻ്റാരിയോയിലും ശക്തമായ മഞ്ഞുമഴയ്ക്ക് സാധ്യതയുണ്ടെന്ന് കാലാവസ്ഥാ പ്രവചനം. രാവിലെ മുതൽ നേരിയ മഞ്ഞ് മഴയായി മാറുമെന്നും ടൊറൻ്റോ, മിസ്സിസാഗ, ബ്രാംപ്ടൺ, നയാഗ്ര ഫോൾസ് എന്നിവിടങ്ങളിൽ മഴ പെയ്യാനുള്ള സാധ്യത 40 ശതമാനത്തിൽ കൂടുതലാണെന്നും കാലാവസ്ഥാ ഏജൻസി മുന്നറിയിപ്പ് നൽകി. ഹാമിൽട്ടണിലും ഓഷവയിലും പകൽ സമയത്ത് തണുത്തുറഞ്ഞ ചാറ്റൽ മഴയും തുടർന്ന് ജിടിഎയിലുടനീളം തണുത്തുറഞ്ഞ മഴയും ഉണ്ടാകാനുള്ള സാധ്യതയുണ്ടെന്നും കാലാവസ്ഥാ ഏജൻസി പറയുന്നു.
ചൊവ്വാഴ്ച രാത്രി ജിടിഎയിൽ പ്രധാനമായും മേഘാവൃതമായിരിക്കും. ടൊറൻ്റോ, മിസ്സിസാഗ, ബ്രാംപ്ടൺ എന്നിവിടങ്ങളിൽ മണിക്കൂറിൽ 70 കിലോമീറ്റർ വരെ വേഗത്തിൽ കാറ്റ് വീശും. രാത്രിയിലെ താഴ്ന്ന താപനില മൈനസ് 4 ഡിഗ്രി സെൽഷ്യസ് ആയിരിക്കും. പക്ഷേ കാറ്റിനൊപ്പം തണുപ്പ് മൈനസ് 11 ഡിഗ്രി സെൽഷ്യസ് വരെ ആയി അനുഭവപ്പെടാം. ബുധനാഴ്ച ഉയർന്ന താപനില 1 ഡിഗ്രി സെൽഷ്യസും കുറഞ്ഞത് -3 ഡിഗ്രി സെൽഷ്യസുമായിരിക്കും.
