വൻകൂവർ : ബ്രിട്ടിഷ് കൊളംബിയയുടെ വടക്കൻ തീരമേഖലയിലെ ചില ഭാഗങ്ങളിൽ തിങ്കളാഴ്ച 200 മില്ലിമീറ്റർ വരെ മഴ പെയ്യുമെന്ന് എൻവയൺമെൻ്റ് കാനഡ മുന്നറിയിപ്പ് നൽകി. പ്രിൻസ് റൂപർട്ടിന് ചുറ്റുമാണ് ഏറ്റവും ശക്തമായ മഴ പ്രതീക്ഷിക്കുന്നതെന്ന് കാലാവസ്ഥാ ഏജൻസി പറയുന്നു. അതേസമയം, ഹൈദ ഗ്വായിയിൽ 110 മില്ലിമീറ്റർ വരെ മഴ ലഭിക്കുമെന്നും ഏജൻസി അറിയിച്ചു. കിറ്റിമാറ്റിന് സമീപം 100 മില്ലിമീറ്റർ വരെ മഴ പെയ്യുമെന്നും കാലാവസ്ഥാ വകുപ്പ് പ്രവചിക്കുന്നു. ഹൈദ ഗ്വായിലും വടക്കൻ തീരമേഖലയിലും വെള്ളപ്പാക്കമുണ്ടാകാൻ സാധ്യതയുണ്ടെന്ന് ബി.സി. റിവർ ഫോർകാസ്റ്റ് സെന്റർ മുന്നറിയിപ്പ് നൽകി. കനത്ത മഴയും മഞ്ഞുരുകിയുള്ള വെള്ളവും കൂടിച്ചേരുമ്പോൾ പ്രിൻസ് റൂപർട്ടിനടുത്തുള്ള പുറം തീരപ്രദേശങ്ങളിലും ഹൈദ ഗ്വായ്യിലും നദികൾ കരകവിയും.
അലാസ്കൻ പാൻഹാൻഡിൽ, യൂകോൺ എന്നിവയെ ബ്രിട്ടിഷ് കൊളംബിയയുമായി ബന്ധിപ്പിക്കുന്ന രണ്ട് പ്രധാന റോഡുകളിലും, സൗത്ത് ക്ലോണ്ടൈക്ക് ഹൈവേ, ഹെയ്ൻസ് റോഡ് എന്നിവയിലും 40 സെന്റീമീറ്റർ വരെ മഞ്ഞുവീഴ്ച ഉണ്ടാകുമെന്ന് കാലാവസ്ഥാ ഏജൻസി പ്രവചിക്കുന്നു. കൂടാതെ ബ്രിട്ടിഷ് കൊളംബിയ-യൂകോൺ അതിർത്തിയിലെ കാസിയാർ പർവതനിരകളിൽ 15 സെന്റീമീറ്റർ വരെ മഞ്ഞുവീഴ്ചയ്ക്ക് സാധ്യതയുണ്ടെന്നും എൻവയൺമെൻ്റ് കാനഡ മുന്നറിയിപ്പ് നൽകിയിട്ടുണ്ട്.
