ടൊറൻ്റോ : നഗരത്തിലും ഗ്രേറ്റർ ടൊറൻ്റോ മേഖലയിലെ ചില ഭാഗങ്ങളിലും കനത്ത മഞ്ഞുവീഴ്ചയും മഞ്ഞുമഴയും പ്രതീക്ഷിക്കുന്നതിനാൽ യെല്ലോ അലർട്ട് നൽകി എൻവയൺമെൻ്റ് കാനഡ. നഗരത്തിന്റെ പടിഞ്ഞാറൻ പ്രദേശങ്ങളിലും മഞ്ഞുവീഴ്ച മുന്നറിയിപ്പുകളും നൽകിയിട്ടുണ്ട്. അഞ്ച് മുതൽ 10 മില്ലിമീറ്റർ വരെ മഞ്ഞുവീഴ്ച പ്രതീക്ഷിക്കുന്ന കിച്ചനർ, ഗ്വൽഫ്, ഹാമിൽട്ടൺ, സ്റ്റോണി ക്രീക്ക് തുടങ്ങിയ നഗരങ്ങളിൽ ഓറഞ്ച് അലർട്ട് നിലവിലുണ്ട്.
അതേസമയം പ്രാദേശികമായി 15 മില്ലിമീറ്റർ വരെ മഴ പെയ്യാൻ സാധ്യതയുണ്ടെന്നും കാലാവസ്ഥാ വകുപ്പ് പ്രവചിക്കുന്നു. ഇത് കനത്ത വൈദ്യുതി തടസ്സത്തിനുള്ള സാധ്യത വർധിപ്പിക്കുന്നു. ടൊറൻ്റോയിൽ അഞ്ച് മുതൽ 10 സെൻ്റീമീറ്റർ വരെയും യോർക്ക്, ദുർഹം പ്രദേശങ്ങളുടെ ചില ഭാഗങ്ങളിൽ 15 സെൻ്റീമീറ്റർ വരെയും മഞ്ഞുവീഴ്ച പ്രതീക്ഷിക്കുന്നു. കൂടാതെ മണിക്കൂറിൽ 60 കിലോമീറ്റർ വരെ വേഗത്തിൽ കിഴക്കൻ കാറ്റും വീശും. അതിനാൽ വൈദ്യുതി തടസ്സപ്പെടാൻ സാധ്യതയുണ്ട്, മഞ്ഞുവീഴ്ചയുള്ള പ്രദേശങ്ങളിൽ ദൃശ്യപരത മോശമായിരിക്കും.
