കല്പ്പറ്റ: വയനാട് മുണ്ടക്കൈ-ചൂരല്മല ഉരുള്പൊട്ടല് ദുരന്തബാധിതര്ക്കായി നിര്മിച്ച ടൗണ്ഷിപ്പിന്റെ ഉദ്ഘാടനം മുഖ്യമന്ത്രി പിണറായി വിജയന് നിര്വഹിച്ചു. ആദ്യഘട്ടത്തില് നിര്മാണം പൂര്ത്തിയായ 178 വീടുകളുടെ കൈമാറ്റവും പട്ടയ വിതരണവും മുഖ്യമന്ത്രി നടത്തി.
അടുത്ത മഴക്കാലത്തിന് മുമ്പ് ഉരുള്പൊട്ടല് ദുരന്തബാധിതരായ എല്ലാവര്ക്കും വീടുകള് കൈമാറുമെന്ന് മുഖ്യമന്ത്രി വ്യക്തമാക്കി. ശേഷിക്കുന്നവര്ക്കും കുറച്ച് മാസങ്ങള്ക്കുള്ളില് വീടുകള് ലഭ്യമാക്കുമെന്ന് അദ്ദേഹം പറഞ്ഞു. ദുരന്തബാധിതരെ സഹായിക്കാന് സമൂഹത്തിലെ നിരവധി ആളുകള് മുന്നോട്ടുവന്നതായും സഹായം വാഗ്ദാനം ചെയ്ത പലരും വാക്ക് പാലിച്ചതായും മുഖ്യമന്ത്രി നന്ദിയോടെ പരാമര്ശിച്ചു.
ഉദ്ഘാടനത്തിന് മുന്പ് ടൗണ്ഷിപ്പില് നിര്മാണം പൂര്ത്തിയായ ഒരു വീട് മുഖ്യമന്ത്രി സന്ദര്ശിച്ചു. ഉദ്ഘാടന പ്രസംഗത്തിനുശേഷമാണ് ദുരന്തബാധിതര്ക്ക് പട്ടയം വിതരണം ചെയ്തത്. ദുരന്തത്തില് ഗുരുതരമായി പരിക്കേറ്റ വ്യക്തിക്കാണ് ആദ്യ പട്ടയം കൈമാറിയത്.
ഇതിനോടനുബന്ധിച്ച് കല്പ്പറ്റ ജനറല് ആശുപത്രിയുടെ അനെക്സ് ബ്ലോക്കിന്റെ ഉദ്ഘാടനവും മുഖ്യമന്ത്രി നിര്വഹിച്ചു. ദുരന്തബാധിതര്ക്ക് സുരക്ഷിത താമസവും അടിസ്ഥാന സൗകര്യങ്ങളും ഉറപ്പാക്കുന്നതില് സംസ്ഥാന സര്ക്കാര് പ്രതിബദ്ധമാണെന്ന് അദ്ദേഹം കൂട്ടിച്ചേര്ത്തു.
