റിയാദ്: മധ്യപൂര്വേഷ്യയിലെ സംഘര്ഷാവസ്ഥയെത്തുടര്ന്ന് എണ്ണ വിതരണ ശൃംഖലയില് സുപ്രധാന മാറ്റങ്ങള് വരുത്തി സൗദി അരാംകോ. ആഗോള വിപണിയിലേക്കുള്ള ക്രൂഡ് ഓയില് വിതരണം സുഗമമായി തുടരുന്നുവെന്ന് ഉറപ്പാക്കാന് കയറ്റുമതി താല്ക്കാലികമായി ചെങ്കടല് തീരത്തെ യാമ്പു (Yanbu) തുറമുഖത്തേക്ക് മാറ്റിയതായി കമ്പനി അറിയിച്ചു. ഹോര്മുസ് കടലിടുക്ക് വഴിയുള്ള യാത്ര നിലവിലെ സാഹചര്യത്തില് സുരക്ഷിതമല്ലാത്തതിനാലാണ് ഈ അടിയന്തര നീക്കം.
സുരക്ഷാ മുന്കരുതലുകളുടെ ഭാഗമായാണ് ഈ മാറ്റമെങ്കിലും, ഇത് ആഗോള വിപണിയില് എണ്ണവില വര്ധിക്കുന്നതിനും ഉല്പ്പാദനത്തില് നേരിയ കുറവ് വരുന്നതിനും കാരണമായേക്കുമെന്ന് അരാംകോ വൃത്തങ്ങള് സൂചിപ്പിക്കുന്നു. ഹോര്മുസ് കടലിടുക്കിലെ ഭൗമരാഷ്ട്രീയ പ്രതിസന്ധികള് മറികടന്ന് വിതരണം തടസ്സമില്ലാതെ എത്തിക്കാനാണ് കമ്പനി മുന്ഗണന നല്കുന്നത്. നിലവിലെ സാഹചര്യങ്ങള് കമ്പനി സൂക്ഷ്മമായി നിരീക്ഷിച്ചു വരികയാണ്.
മേഖലയിലെ സംഘര്ഷങ്ങള്ക്ക് അയവ് വരുന്ന മുറയ്ക്ക് കയറ്റുമതി പഴയ രീതിയിലേക്ക് പുനഃസ്ഥാപിക്കുന്നത് പരിഗണിക്കുമെന്നും അരാംകോ വ്യക്തമാക്കി. നിലവില് യാമ്പു തുറമുഖം വഴിയുള്ള കയറ്റുമതി വര്ദ്ധിപ്പിക്കാനുള്ള എല്ലാ തയ്യാറെടുപ്പുകളും പൂര്ത്തിയായിട്ടുണ്ട്. ആഗോള ഊര്ജ്ജ വിപണിയിലെ സുസ്ഥിരത ഉറപ്പാക്കാന് സൗദി അറേബ്യ പ്രതിജ്ഞാബദ്ധമാണെന്നും അധികൃതര് കൂട്ടിച്ചേര്ത്തു.
